അച്ഛനമ്മമാരും അവരുടെ തലമുറകളും എന്നന്നേക്കുമായി മറയുന്നു. അവര്‍ പിതൃക്കളായി അലയുന്നു എന്നും, അല്ലെങ്കില്‍ മക്കളുടെ ബലിതര്‍പ്പണങ്ങളിലൂടെയും സത്കര്‍മ്മങ്ങളിലൂടെയും പരമമായ വിഷ്ണുപദപ്രാപ്തി അഥവാ സദ്ഗതി പ്രാപിക്കുന്നു എന്നും നാം വിശ്വസിക്കുന്നു. മരണശേഷം എന്തു സംഭവിക്കുന്നു എന്നതിന് ശാസ്ത്രീയമായ തെളിവുകളൊന്നും ലഭ്യമല്ല. ലഭിച്ചിരിക്കുന്ന വിവരങ്ങള്‍ അവ്യക്തവുമാണ്. ഋഷീശ്വരന്മാര്‍ നല്‍കിയിരിക്കുന്ന വിവരണങ്ങള്‍ മാത്രമേ നമുക്കാധാരമായിട്ടുള്ളൂ. അതു ശാസ്ത്രീയമാണോ എന്ന് അസന്ദിഗ്ധമായി വ്യക്തമാക്കുവാന്‍ സാധ്യമല്ല.
എന്നാല്‍ വിശ്വാസത്തിന്റെ മണ്ഡലത്തില്‍ നിന്നു നോക്കുന്നവര്‍ക്കും അനുഭവിക്കുന്നവര്‍ക്കും പ്രയോജനപ്പെടുത്താന്‍ സാധിക്കുന്ന ഒരാചാരഭാഗമുണ്ട്. പിതൃതൃപ്തി എന്നത്. ചില വ്യക്തികള്‍ രോഗമുണ്ടെന്ന് തെറ്റിദ്ധരിച്ച് തളര്‍ന്നുകിടക്കുമ്പോള്‍ അവര്‍ക്കു വിശ്വാസമുള്ള ഡോക്ടര്‍മാര്‍, ഉപ്പിന്റെ ഐസോടോണിക് ലായനി ഇഞ്ചക്ഷന്‍ കൊടുത്താല്‍പോലും, അവര്‍ രോഗമുക്തരാകുന്നു. ജീവിതത്തില്‍ പരാജയം നേരിടേണ്ടിവരുമ്പോഴും തുടരെ ദുഃഖസത്യങ്ങള്‍ അഭിമുഖീകരിക്കേണ്ടി വരുമ്പോഴും, തളര്‍ന്ന മനസ്സിനും ശരീരത്തിനും പിതൃക്കളുടെ അതൃപ്തിയില്‍നിന്ന് തൃപ്തിയിലേക്കുള്ള സന്ദേശം ഫലവത്താകാറുണ്ട്. മരിച്ചുപോയവര്‍ക്ക് സദ്ഗതിയുണ്ടായിട്ടില്ല എന്നത് ഒരു കാരണമാണെന്ന് തളര്‍ന്നവനെ ബോധ്യപ്പെടുത്തുക. അതിനുശേഷം കാരണം ഇല്ലാതാക്കുക. അതിനായി നടത്തേണ്ട ചടങ്ങുകള്‍ ഈ കാരണങ്ങളില്ലാതാക്കും. പിതൃക്കളുടെ അനുഗ്രഹംലഭിച്ചു എന്ന് ബോധ്യമായ വ്യക്തി വീണ്ടും കര്‍മ്മനിരതനായെന്നിരിക്കും. ഇതൊരു വിശ്വാസത്തിന്റെയും മനഃശാസ്ത്രത്തിന്റെയും ഗഹനമായ പ്രയോഗമാണ്. ശരീരത്തിനും മനസ്സിനും കുടുംബത്തിനും ദോഷകരമായി (അല്‍പം സാമ്പത്തിക ചെലവ് ഒഴികെ) മറ്റൊന്നും സംഭവിക്കാത്ത നിലവാരം വരെ മാത്രമേ ഈ ആചാരം നന്മ നല്‍കൂ. പിതൃക്കളുടെ പ്രീതിക്കായി മൃഗബലിയും ക്രൂരകര്‍മ്മങ്ങളും ചടങ്ങുകളും നടത്തുന്നു എങ്കിലത് സദാചാരത്തിന്റെ പരിധി കടന്ന് ദുരാചാരമായിത്തീരുമെന്ന് പ്രത്യേകം ഓര്‍മിക്കുക.
അനാചാരങ്ങളും ദുരാചാരങ്ങളും
നന്മയുടെ ഒരു സന്ദേശവും നല്‍കാത്തതും തിന്മയുളവാക്കുന്നതുമായ കുറെ അനുഷ്ഠാനങ്ങള്‍ നാം ആചരിച്ചുപോരുന്നുണ്ട്. അവ അശാസ്ത്രീയമാണ്. അജ്ഞാനത്താലോ, ചില ‘ചിന്തകരുടെ’ ഉപദേശത്താലോ, അവരുടെ രചനകളിലൂടെയോ ആയിരിക്കും ഈ ദുരാചാരങ്ങള്‍ക്ക് തുടക്കം കുറിച്ചത്.
ശൂലംതറയ്‌ക്കല്‍: മനുഷ്യ ശരീരത്തെ ക്ഷേത്രമായും, അഹം ബ്രഹ്മാസ്മി എന്നും ദര്‍ശിച്ചവര്‍ ശരീരത്തില്‍ ശൂലം തറയ്‌ക്കുന്നതും, കൊളുത്തിട്ട് ക്ഷേത്രാചാരത്തിന്റെ ഭാഗമായി തൂക്കം നടത്തുന്നതും ദുരാചാരമാണ്. ശരീരമാദ്യം ഖലു ധര്‍മ്മ സാധനം എന്നുദ്‌ഘോഷിച്ച ഭാരതീയരുടെ ഏതു ദൈവമാണ് ഈ വികൃതമായ ആചാരം കണ്ട് പ്രീതരാകുന്നത്. തീക്കനലിലൂടെ നടക്കുന്നത് മറ്റൊരുവിധ ദുരാചാരമാണ്. ശരീരത്തെ പീഡിപ്പിക്കുന്ന ഒരു കര്‍മ്മം!
ധനിഷ്ടാപഞ്ചകം: അവിട്ടം മുതല്‍ രേവതിവരെ അഞ്ചു നക്ഷത്രങ്ങളെ ധനിഷ്ഠാപഞ്ചകങ്ങള്‍ എന്നുപറയുന്നു. ഈ അഞ്ചുനക്ഷത്രത്തില്‍ ആരെങ്കിലും മരിച്ചാല്‍ ആ വീട്ടില്‍ മറ്റൊരു മരണമുണ്ടാകുമത്രെ. ചിലര്‍ അഞ്ചുമരണമുണ്ടാകുമെന്നും വിശ്വസിക്കുന്നു. അന്ധമായ വിശ്വാസം മാത്രമാണിത്. ഇതിനു പരിഹാരമായി ദക്ഷിണ കേരളത്തില്‍ പുതിയതായി ഒരു ദുരാചാരം തുടങ്ങിയിരിക്കുന്നു. കോഴിയെ അറുത്ത് ശവത്തില്‍ രക്തം ഒഴിക്കുക. മറ്റൊന്ന് അഞ്ച് കോഴിമുട്ട ശവത്തോടൊപ്പം ദഹിപ്പിക്കുക കോഴിയെ അറുത്തതുകൊണ്ട് ‘മരണപാപ’മുണ്ടെങ്കില്‍ തീരുമെന്ന് ഒരു ഗ്രന്ഥത്തിലും വിവരിച്ചിട്ടില്ല. വ്യക്തമായ ദുരാചാരമാണിത്.
ദീപാവലിയും ആട്ടിറച്ചിയും: ദീപാവലിക്ക് സര്‍വ്വസാധാരണയായി ഒരു വിഭാഗം ജനങ്ങള്‍ ആട്ടിറച്ചി ഉപയോഗിക്കുവാന്‍ തുടങ്ങിയിരിക്കുന്നു. ഭാരതീയ ആചാരങ്ങളിലൊന്നിലും ഇറച്ചികൂട്ടിയുള്ള ചടങ്ങുകളില്ല. ഹീനവും നിഷ്ഠുരവുമാണീ ദുരാചാരം. ഉത്തര കേരളത്തില്‍ ബീഫും കട്ടിയും ചേര്‍ത്ത് ഓണമാഘോഷിക്കുന്നതും നികൃഷ്ടമായ ആചാരത്തിന്റെ ഭാഗമാണ്.
