പനാജി: ഗോവ മുഖ്യമന്ത്രി മനോഹര് പരീഖര് എഴുതിയതെന്ന പേരില് പ്രചരിക്കുന്ന കുറിപ്പ് വ്യാജമാണെന്ന് ഗോവ മുഖ്യമന്ത്രിയുടെ ഓഫീസ് അറിയിച്ചു. ആശുപത്രിക്കിടക്കയില്, ഓരോ നിമിഷവും മരണത്തോട് അടുത്തുകൊണ്ടിരിക്കുന്നുവെന്ന് വിവരിച്ച് പരീഖര് സ്വയം എഴുതിയതെന്ന പേരില്സാമൂഹ്യ മാദ്ധ്യമങ്ങളില് വ്യാപകമായി പ്രചരിച്ചിച്ച കുറിപ്പ് ആരോ സൃഷ്ടിച്ച് പ്രചരിപ്പിച്ചതാണ്. ”മുഖ്യമന്ത്രിയുടെ ഏത് സന്ദേശവും ഔദ്യോഗികമായ സാമൂഹ്യ മാദ്ധ്യമത്തിലൂടെ മാത്രമേ വരൂ, മറ്റൊന്നും ആധികാരികമോ വിശ്വസനീയമോ ആയിരിക്കില്ലെന്ന്” മുഖ്യമന്ത്രിയുടെ ഓഫീസ് അറിയിച്ചു.
മരണക്കിടക്കയില് കിടന്നുള്ള ചിന്തകള് എന്ന രൂപത്തിലാണ് കത്തിന്റെ ഉള്ളടക്കം ആരോ പ്രചരിപ്പിച്ചത്. ഗോവയിലെ രാഷ്ട്രീയ നേട്ടത്തിനുപോലും ആയിരുന്നിരിക്കണം ഈ ക്രൂര വിനോദം എന്ന് കരുതുന്നു.
ആപ്പിള് സഹ സ്ഥാപകന് സ്റ്റീവ് ജോബ് അന്തരിച്ചതിനു പിന്നാലെ 2011-ല് സമാനമായ കുറിപ്പ് അദ്ദേഹമെഴുതിയതെന്ന പേരില് പ്രചരിച്ചിരുന്നു.
രോഗബാധയെ തുടര്ന്ന് മുഖ്യമന്ത്രി പരീഖര് അമേരിക്കയില് ചികിത്സയിലാണ്. രണ്ടാം ഘട്ട ചികിത്സ തുടങ്ങിയതായി ഗോവ നിയമസഭാ സ്പീക്കര് പ്രമോദ് സാവന്ത് അറിയിച്ചു.
ചീഫ് സെക്രട്ടറി, പ്രിന്സിപ്പല് സെക്രട്ടറി തുടങ്ങിയ ഉദ്യോഗസ്ഥരുമായി ഭരണാവശ്യങ്ങള്ക്ക് മുഖ്യമന്ത്രി സമ്പര്ക്കത്തിലുണ്ടെന്നും ആറാഴ്ചയ്ക്കുള്ളില് ഗോവയില് മടങ്ങിയെത്തി ജോലികളില് വ്യാപൃതനാവുമെന്നും ബിജെപി സംസ്ഥാന നേതാവ് അദ്ധ്യക്ഷന് ഫ്രാന്സിസ് ഡിസൂസ അറിയിച്ചു. നേതൃമാറ്റമുണ്ടാവില്ലെന്നും അദ്ദേഹം പറഞ്ഞു.
