തലശ്ശേരി: പ്രേമിച്ച് ഒളിച്ചോടുന്ന കുട്ടികളെയും രക്ഷിതാക്കളോട് ദ്വേഷ്യപ്പെട്ട് വീട് വിട്ടുപോവുന്ന കുട്ടികളെയും കാണാതാവുമ്പോള് തട്ടിക്കൊണ്ടുപോയതായുള്ള പ്രചരണമാണിപ്പോള് സോഷ്യല് മീഡിയകളിലൂടെ നടക്കുന്നതെന്ന് തലശ്ശേരി എഎസ്പി ചൈത്രാ തെരേസാ ജോണ് അഭിപ്രായപ്പെട്ടു. വീടുകളിലെ ജനല് ഗ്ലാസുകളില് സ്റ്റിക്കര് പതിച്ചു കാണുന്നത് കളവ് നടത്താനാണെന്നും പ്രചരിപ്പിക്കുന്നു.
ഇതിലൊന്നും ഒരു വാസ്തവവുമില്ലെന്ന് അന്വേഷണത്തില് കണ്ടെത്തിയിട്ടുണ്ട്. സോഷ്യല് മീഡിയകളുടെ സൃഷ്ടി മാത്രമാണിത്. ഇത്തരം വ്യാജപ്രചരണങ്ങള് അവയുടെ വിശ്വാസ്യത തന്നെ ഇല്ലാതാക്കുമെന്ന് തലശ്ശേരി പ്രസ് ഫോറത്തില് നടന്ന മുഖാമുഖത്തില് എഎസ്പി പ്രതികരിച്ചു. അങ്ങിങ്ങായി രാഷ്ട്രീയ പ്രശ്നങ്ങളുണ്ടെങ്കിലും എടുത്ത് പറയത്തക്ക മറ്റ് കുറ്റകൃത്യങ്ങള് ഇവിടെയില്ല. സ്ത്രീകള്ക്കും കുട്ടികള്ക്കും നേരെയുണ്ടാവുന്ന അതിക്രമങ്ങളുടെ കണക്കിലും നേരത്തെ ജോലി ചെയ്ത കല്പറ്റയേക്കാള് തലശ്ശേരി ഏറെ പിന്നിലാണ്.
നഗരത്തില് ആഭരണവ്യാപാരിയെ കൊള്ള ചെയ്ത കേസില് അന്വേഷണം തുടരുകയാണ്. സിസിടിവി ദൃശ്യങ്ങള് പരിശോധിച്ച് വരികയാണ്. എസ്ഐ അനിലിനാണ് അന്വേഷണ ചുമതലയെന്നും അവര് പറഞ്ഞു. പ്രസ് ഫോറം പ്രസിഡണ്ട് എന്.പ്രശാന്ത് അദ്ധ്യക്ഷത വഹിച്ചു.
