ശിവപുരാണ കീര്‍ത്തനം

മൂന്നാം പാദം

സര്‍വകാര്യത്തിന്റെ നാഥനാം ശങ്കരാ-

സര്‍വ്വശങ്കരാ ദേവാനമോസ്തുതേ

പാഹിമാം ശിവശംഭോ മഹാദേവാ-

കാരുണ്യാദ്രിയാം ദേവാനമോസ്തുതേ

ശങ്കരാഭയില്‍ മുങ്ങിക്കുളിച്ചതാം-

കൈലാസത്തിലെന്‍ കാലകാലേശ്വരന്‍

കനിവോടങ്ങിരുന്നാനന്ദമേകുന്നു-

കാത്തുകൊള്ളണേ ദേവാ നമോസ്തുതേ

ദേവനേനിന്റെ കൂടെയിരിപ്പാനായാ-

കല്യായണേശ്വരി വന്നതാമീക്കഥ

ബ്രഹ്മദേവന്റെ ആജ്ഞകേട്ടന്നതാ-

ദക്ഷന്‍ പ്രാര്‍ത്ഥിച്ചു ദേവാ നമോസ്തുതേ

ദക്ഷപുത്രിയായ് വന്നൊരു ദേവിക്ക്-

കാന്തനാകുവാന്‍ ശങ്കരനുത്തമന്‍

ദക്ഷനോടന്നു ദേവീ മൊഴിഞ്ഞപ്പോള്‍

സന്തോഷിച്ചന്നു ദേവാനമോസ്തുതേ

പണ്ടു പണ്ടു പ്രജാപതിമാരെല്ലാം-

യാഗമൊന്നു നടത്തി ഗംഭീരമായ്

മൂര്‍ത്തികള്‍ മൂവരെത്തിയിരുന്നപ്പോള്‍

വന്ദിച്ചെല്ലാരും ദേവാ നമോസ്തുതേ

ദക്ഷനെത്തിയ നേരത്തു ശങ്കരന്‍-

തൊഴുതെണീറ്റില്ല വന്ദിച്ചതുമില്ല.

എന്നാല്‍ മറ്റുള്ള ദേവിദേവന്മാരു

വന്ദിച്ചെണീറ്റല്ലോ ദേവാ നമോസ്തുതേ

കോപിഷ്ഠനായ ദക്ഷപ്രജാപതി

ലോകനാഥനെ ഭള്ളു പറഞ്ഞുടന്‍

കോപത്താലൊന്നും ചെയ്യാത്ത ശങ്കരാ-

ഞങ്ങളില്‍ വാഴ്ക ദേവാനമോസ്തുതേ.

ശങ്കരനെയൊഴിച്ചെല്ലാസുരന്മാരേം-

പങ്കെടുപ്പിച്ചു യാഗം നടന്നപ്പോള്‍

ദക്ഷയാഗത്തിലെത്തിയ ദേവിയെ-

കാല്‍ക്ഷണം ദക്ഷനക്ഷികൊടുത്തില്ല

ദേവിദുഃഖിച്ചു ദേവാനമോസ്തുതേ

യജ്ഞഹോതാക്കളൊക്കെയും ദേവിയെ-

മാനിച്ചില്ലപമാനിക്കയും ചെയ്തു.

ദേവികോപിച്ചു ദക്ഷനോടോതിയ-

ശൈവമാംകഥ കേട്ടു നമോസ്തുതേ.

വേദനിച്ചുകാര്‍കൂന്തലഴിച്ചിട്ട്

കോപമോടന്നു ശാസിച്ചു ദക്ഷനെ

എന്നിട്ടും ദേവികോപമൊടുങ്ങാതെ-

അഗ്നിയില്‍ ചാടി ദേവാനമോസ്തുതേ.

ഭാഗ്യഹീനനാം ദക്ഷപ്രജാപതി

യാഗമന്നു നടത്താനുമായില്ല

നന്ദിയും വന്നു ഭൂതഗണങ്ങളും-

ദക്ഷനേവീഴ്‌ത്തി ദേവാ നമോസ്തുതേ.

ദക്ഷയാഗത്തിലോടിയണഞ്ഞതാം-

ദക്ഷാരിദക്ഷപുത്രിതന്‍ മേനിയെ

കയ്യിലേറ്റന്നു താണ്ഡവമാടിയ-

ഭക്തരക്ഷകാ ദേവാ നമോസ്തുതേ.

ദേവിതന്‍മേനി ചക്രംകൊണ്ടപ്പോഴേ-

തുണ്ടുതുണ്ടാക്കി മാറ്റി നാരായണന്‍

ഭൂമിയില്‍ വീണതുണ്ടുകളൊക്കെയും-

ദേവിയായ് മാറി ദേവാ നമോസ്തുതേ.

ഇക്കഥ ചൊല്ലി സ്തുതിപ്പവര്‍ക്കൊക്കെയും

സദ്ഗതിവരും നിത്യവും ശാന്തിയും

ഇപ്പുരാണത്തിലെല്ലാം നിറഞ്ഞീടും

ശങ്കരീപതേ ദേവാ നമോസ്തുതേ.