ഹൂസ്റ്റണ്: ലോകകപ്പ് ഫുട്ബോളില് ചരിത്രം കുറിച്ച് കേപ് വെര്ദെ. ഗ്രൂപ്പ് എച്ചില് മൂന്ന് വമ്പന്മാരെ സമനിലയില് തളച്ച ലോകകപ്പിലെ നവാഗതരും ഇത്തിരിക്കുഞ്ഞന്മാരുമായ കേപ് വെര്ദെ നോക്കൗട്ട് റൗണ്ടിലേക്ക് മുന്നേറി. ഉറുഗ്വെയ്ക്കും സൗദി അറേബ്യയ്ക്കും പുറത്തേക്കുള്ള വഴി തുറന്നുകൊടുത്താണ് കേപ് വെര്ദെയുടെ മുന്നേറ്റം.
ഇന്നലെ നടന്ന ഗ്രൂപ്പിലെ അവസാന മത്സരത്തില് സൗദിയെ സമനിലയില് തളച്ച അവര് സ്പെയിനിന് പിന്നില് മൂന്ന് പോയിന്റുമായി രണ്ടാം സ്ഥാനക്കാരയാണ് അവസാന 32 ടീമുകളിലൊന്നായത്. ആദ്യ കളിയില് സ്പെയിനിനെ ഗോള്രഹിത സമനിലയിലും രണ്ടാം കളിയില് രണ്ട് തവണ ലോകചാമ്പ്യന്മാരായ ഉറുഗ്വെയെ 2-2നും പിടിച്ചുകെട്ടിയതിന്റെ ആത്മവിശ്വാസത്തിലായിരുന്നു ഇന്നലെ അവര് സൗദിക്കെതിരെ ഇറങ്ങിയത്. നോക്കൗട്ട് റൗണ്ടില് അവരെ കാത്തിരിക്കുന്നത് സാക്ഷാല് ലയണല് മെസ്സിയുടെ അര്ജന്റീനയാണ്. ആഫ്രിക്കയുടെ പടിഞ്ഞാറന് തീരത്തുള്ള പത്ത് ചെറുദ്വീപുകളുടെ ഒരു കൂട്ടമാണ് കേപ് വെര്ദെ. അഞ്ച ലക്ഷത്തോളം മാത്രം ജനസംഖ്യയുള്ള കൊച്ചു രാജ്യം. ആ രാജ്യമാണ് ലോക ഫുട്ബോളിലെ വമ്പന്മാരെ അത്ഭുതപ്പെടുത്തി തങ്ങളുടെ പേര് ലോക ഫുട്ബോളിന്റെ ചരിത്രപുസ്തകത്തില് എഴുതിച്ചേര്ത്തിരിക്കുന്നത്. ഈ ലോകകപ്പ് ഫുട്ബോളിന്റെ നോക്കൗട്ട് റൗണ്ടിലെത്തുന്ന ഏറ്റവും ചെറിയ രാജ്യം കൂടിയാണ് കേപ് വെര്ദെ. ഫിഫ റാങ്കിങ്ങില് 67-ാം സ്ഥാനത്തുള്ള കേപ് വെര്ദെ 2006ല് ഘാനയ്ക്ക് ശേഷം ലോകകപ്പ് അരങ്ങേറ്റത്തില് തന്നെ നോക്കൗട്ടില് കടക്കുന്ന ആദ്യ ആഫ്രിക്കന് രാജ്യമായി മാറുകയും ചെയ്തു.
ഇന്നലെ കളിയില് 51 ശതമാനം പന്ത് കൈവശം വെച്ച കേപ് രണ്ട് ഓണ് ടാര്ഗറ്റ് ഷോട്ടുകള് ഉള്പ്പെടെ 15 തവണയാണ് എതിര് വല ലക്ഷ്യമാക്കി പന്തടിച്ചത്. അതേസമയം സൗദി മൂന്ന് ഓണ് ടാര്ഗറ്റ് ഉള്പ്പെടെ 7 ഷോട്ടുകളും.
മുന് മത്സരങ്ങളിലെന്ന പോലെ ഇന്നലെയും കളിയുടെ തുടക്കം മുതല് കരുത്തുറ്റ പ്രതിരോധം തീര്ത്ത കേപ് ആക്രമണങ്ങള്ക്കും മുതിര്ന്നു. 21-ാം മിനിറ്റില് കേപ് വെര്ദെ താരം വില്ലി സെമെദോ ബോക്സിന്റെ ഇടതുവശത്തുനിന്നു തൊടുത്ത ഷോട്ട് പോസ്റ്റിനെ ഉരുമ്മി പുറത്തേക്ക് തെറിച്ചു. തുടര്ന്നും രണ്ട് ടീമുകളും മികച്ച ചില മുന്നേറ്റങ്ങള് നടത്തിയെങ്കിലും ആദ്യപകുതിയില് ഗോള് വിട്ടുനിന്നു. സൗദിയുടെ മുന്നേറ്റങ്ങള്ക്ക് മുന്നില് കേപ് ഗോളി വൊസീഞ്ഞ പാറ പോലെ ഉറച്ചുനില്ക്കുകയും ചെയ്തു.
രണ്ടാം പകുതി ആരംഭിച്ചയുടന് എതിര് വല ലക്ഷ്യമാക്കി സൗദിയുടെ ആക്രമണമുണ്ടായെങ്കിലും കേപ് വെര്ദെയുടെ ഗോള് കീപ്പര് വൊസീഞ്ഞ വന്മതിലായി നിലയുറപ്പിച്ചു. 47-ാം മിനിറ്റില് വെര്ദെയുടെ ഗോള് ശ്രമം സൗദി ഗോള് കീപ്പര് മുഹമ്മദ് അല് ഒവൈസും തടഞ്ഞു. മത്സരത്തിന്റെ അവസാന മിനിറ്റുകളില് കേപ് വെര്ദെ മികച്ച മുന്നേറ്റങ്ങളുമായി കളം നിറഞ്ഞെങ്കിലും സൗദി പ്രതിരോധവും ഗോളിയും മികച്ച പ്രകടനം നടത്തിയതോടെ ഗോള് വിട്ടുനിന്നു. ഇതോടെ കളി ഗോള്രഹിത സമനിലയില് കലാശിച്ചു.
