ബോസ്റ്റണ്: ഇന്നലെ നോര്വേയ്ക്കെതിരായ മത്സരത്തില് ഫ്രഞ്ച് നായകന് കിലിയന് എംബപ്പെ ഗോളടിയില് മെസ്സിയുടെ റിക്കോര്ഡ് മറികടക്കുമോ എന്നതായിരുന്നു ആരാധകര്
കാത്തിരുന്നത്. എംബാപ്പെ ഗോളടിച്ചില്ലെങ്കിലും മറ്റൊരു സൂപ്പര് താരമായ ഔസ്മാന് ഡെംബെലെ ഹാട്രിക്കുമായി കളം നിറയുന്നതിനാണ് ഗില്ലറ്റ് സ്റ്റേഡിയം സാക്ഷ്യം വഹിച്ചത്. കളി തുടങ്ങി വെറും 32 മിനിറ്റിനിടെയാണ് താരത്തിന്റെ ഹാട്രിക്. ഇതോടെ ലോകകപ്പില് ഹാട്രിക് നേടുന്ന മൂന്നാമത്തെ ഫ്രഞ്ച് താരമായി ഡെംബെലെ. 1958ലെ സ്വീഡന് ലോകകപ്പില് ജസ്റ്റ് ഫൊണ്ടെയ്നും കഴിഞ്ഞ 2022ലെ ഖത്തര് ലോകകപ്പില് കിലിയന് എംബപ്പെയുമാണ് ഇതിന് മുന്പ് ലോകകപ്പില് ഹാട്രിക് നേടിയ ഫ്രഞ്ച് താരങ്ങള്. കൂടാതെ ഈ ലോകകപ്പിലെ ഗോള് നേട്ടം നാലാക്കി ഉയര്ത്തി മെസ്സിക്ക് തൊട്ടുപിന്നിലെത്തുവാനും താരത്തിന് കഴിഞ്ഞു. എംബാപ്പെ, ബ്രസീല് താരം വിനീഷ്യസ്, നോര്വേ താരം എര്ലിങ് ഹാലന്ഡ് എന്നിവര്ക്കും നാലു ഗോള് വീതമുണ്ട്.
മാത്രമല്ല 1994ലെ അമേരിക്കന് ലോകകപ്പിനുശേഷം ആദ്യപകുതിയില് ഹാട്രിക് നേടുന്ന ആദ്യ താരവുമായി ഇന്നലെ ഡെംബലെ മാറി. അന്ന് കാമറൂണിനെതിരെ റഷ്യയുടെ ഒലഗ് സാലങ്കോയാണ് ഈ നേട്ടം സ്വന്തമാക്കിയത്.
ഈ ലോകകപ്പിലെ മൂന്നാമത്തെ ഹാട്രിക്കാണിത്. അള്ജീരിയയ്ക്കെതിരായ മത്സരത്തില് അര്ജന്റീന സൂപ്പര് താരം ലയണല് മെസ്സിയും ഖത്തറിനെതിരെ കാനഡയുടെ ജൊനാഥന് ഡേവിഡുമാണ് ഹാട്രിക് നേടിയിട്ടുള്ളത്. 2016-ല് ഫ്രഞ്ച് ടീമില് ഇടംപിടിച്ച ഡെംബലെ 62 കളികളില് നിന്ന് 11 ഗോളടിച്ചു. ബൊറൂസിയ ഡോര്ട്ട്മുണ്ട്, ബാഴ്സലോണ എന്നീ ക്ലബ്ബുകള്ക്കായി കളിച്ച ഈ 29കാരന് നിലവില് ഫ്രഞ്ച് ചാമ്പ്യന്മാരായ പിഎസ്ജിയുടെ കുന്തമുനയാണ്.
