കോട്ടയം: സംസ്ഥാനത്ത് അടുത്ത ദിവസങ്ങളില് മഴ ശക്തമാകുമെന്ന് കേന്ദ്ര കാലാവസ്ഥാ വകുപ്പി(ഐഎംഡി)ന്റെ മുന്നറിയിപ്പ്. വടക്കന് തെലങ്കാനക്കും സമീപപ്രദേശങ്ങള്ക്കും മുകളില് രൂപപ്പെട്ടിരിക്കുന്ന ചക്രവാതച്ചുഴിയും ന്യൂനമര്ദപ്പാത്തിയുമാണ് കേരളത്തില് മഴയുടെ ശക്തി കൂടാന് പ്രധാന കാരണങ്ങള്. സംസ്ഥാനത്തിന്റെ വിവിധ ഭാഗങ്ങളില് വ്യാപകവും ചിലയിടങ്ങളില് അതിശക്തവുമായ മഴക്ക് സാധ്യതയുണ്ടെന്നാണ് മുന്നറിയിപ്പ്. ജൂലൈ ആദ്യവാരത്തിലും മിക്ക ജില്ലകളിലും മഴ തുടരും.
വടക്കന് തെലങ്കാനക്കും സമീപപ്രദേശങ്ങള്ക്കും മുകളിലായി ചക്രവാതച്ചുഴി നിലനില്ക്കുന്നു. തീരദേശ ആന്ധ്രാപ്രദേശ് മുതല് മധ്യമഹാരാഷ്ട്ര വരെ വടക്കന് തെലങ്കാനയിലൂടെയും മറാത്ത്വാഡ മേഖലയിലൂടെയും വ്യാപിച്ചുകിടക്കുന്ന ന്യൂനമര്ദപ്പാത്തിയും സജീവമാണ്. ഈ രണ്ട് കാലാവസ്ഥാ സംവിധാനങ്ങളും പടിഞ്ഞാറന് തീരത്തേക്ക് കൂടുതല് ഈര്പ്പമുള്ള കാറ്റ് എത്തിക്കുന്നതിനാല് കേരളത്തില് മഴ ശക്തമാകാന് അനുകൂല സാഹചര്യമാണുള്ളതെന്ന് ഐഎംഡി പറയുന്നു.
കനത്ത മഴയ്ക്ക് സാധ്യത
28, 29 തീയതികളില് സംസ്ഥാനത്ത് ഒറ്റപ്പെട്ട ഇടങ്ങളില് അതിശക്തമായ മഴയ്ക്ക് സാധ്യതയുണ്ടെന്ന് ഐഎംഡി പ്രവചിക്കുന്നു. ജൂലൈ ഒന്നു വരെ ഒറ്റപ്പെട്ട ഇടങ്ങളില് ശക്തമായ മഴയ്ക്കും സാധ്യത. ഇടിമിന്നല്, ശക്തമായ കാറ്റ് എന്നിവക്കും ചിലയിടങ്ങളില് സാധ്യതയുള്ളതിനാല് ജാഗ്രത പാലിക്കണമെന്ന് അധികൃതര് നിര്ദേശിച്ചു.
അതിശക്തമായ മഴയ്ക്ക് സാധ്യതയുള്ളതിനാല് 28-ന് കോഴിക്കോട്, കണ്ണൂര്, വയനാട്, കാസര്കോട് ജില്ലകളിലും 29-ന് കണ്ണൂര്, കാസര്കോട് ജില്ലകളിലും കാലാവസ്ഥാ വകുപ്പ് ഓറഞ്ച് ജാഗ്രതാ നിര്ദേശം നല്കി.
ശക്തമായ മഴ സാധ്യത കണക്കിലെടുത്ത് 28-ന് കോട്ടയം, ഇടുക്കി, പത്തനംതിട്ട, ആലപ്പുഴ, തിരുവനന്തപുരം, കൊല്ലം, എറണാകുളം, തൃശൂര്, പാലക്കാട്, മലപ്പുറം ജില്ലകളില് മഞ്ഞ ജാഗ്രതാ നിര്ദേശവും നല്കിയിട്ടുണ്ട്.
