ഷിട്ടില്: വാശിയോടെ പോരാടിയ ഇറാനെ 1-1 സമനിലയില് തളച്ച് ഈജിപ്ത് ലോകകപ്പിന്റെ നോക്കൗട്ട് റൗണ്ടില്. ഗ്രൂപ്പ് ജി ജേതാക്കളായ ബെല്ജിയത്തിന് പിന്നില് അഞ്ച് പോയിന്റുമായി രണ്ടാം സ്ഥാനക്കാരായാണ് ഈജിപ്ത് അവസാന 32-ല് ഇടംപിടിച്ചത്. ഒന്നാമതുള്ള ബെല്ജിയത്തിനും 5 പോയിന്റാണുള്ളത്. മറ്റു ഗ്രൂപ്പുകളിലെ അവശേഷിക്കുന്ന മത്സരഫലത്തെ ആശ്രയിച്ചാണ് മൂന്നാമതുള്ള ഇറാന്റെ നോക്കൗട്ട് സാധ്യതകള്. കളിയുടെ ഇഞ്ചുറി സമയത്തിന്റെ മൂന്നാം മിനിറ്റില് ഇറാന്റെ ഖലീല്സാദെ ഈജിപ്ത് വല കുലുക്കി. എന്നാല് വാര് പരിശോധനയ്ക്കുശേഷം റഫറി ഓഫ് സൈഡ് വിധിച്ചതാണ് ഇറാന്റെ സ്വപ്നങ്ങള്ക്ക് തിരിച്ചടിയായത്.
കളിയുടെ അഞ്ചാം മിനിറ്റില് മുഹമ്മദ് സാബര് ഈജിപ്റ്റിനെ മുന്നിലെത്തിച്ചെങ്കിലും 14-ാം മിനിറ്റില് റമിന് റെസായന് ഇറാനെ ഒപ്പമെത്തിക്കുകയായിരുന്നു. കളിയില് മുന്തൂക്കം മുഹമ്മദ് സലായുടെ ഈജിപ്തിനായിരുന്നു. പന്തടക്കത്തിലും അവസരങ്ങള് സൃഷ്ടിക്കുന്നതിലും അവര് മുന്നിട്ടുനിന്നു. 3 ഓണ് ടാര്ഗറ്റ് ഷോട്ടുകള് ഉള്പ്പെടെ 15 തവണ അവര് ഷോട്ട് ഉതിര്ത്തു. ഇറാന് നാല് ഓണ് ടാര്ഗറ്റ് ഉള്പ്പെടെ 13 ഷോട്ടുകളും പായിച്ചു.
കളി തുടങ്ങി അഞ്ചാം മിനിറ്റില് തന്നെ ഈജിപ്ത് മുന്നിലെത്തി. മുഹമ്മദ് സലായുടെ ഷോട്ട് ഇറാന് ഗോളി തടുത്തിട്ടത് കിട്ടിയത് മുഹമ്മദ് സാബറിന്. പന്ത് കിട്ടിയ സാബര് തൊടുത്ത ഷോട്ട് ഈജിപ്ഷ്യന് ഗോളിയെ മറികടന്ന് വലയില് കയറി. 9-ാം മിനിറ്റില് പന്ത് ക്ലിയര് ചെയ്യാനുള്ള ശ്രമത്തിനിടെ മെഹ്ദി താരെമിയെ ഈജിപത്താരം മുഹമ്മദ് അബ്ദുല്മോനെം ഫൗള് ചെയ്തതിനെ തുടര്ന്ന് ഇറാന് പെനാല്റ്റി ലഭിച്ചു. എന്നാല് മെഹ്ദി താരെമിയുടെ പെനാല്റ്റി കിക്ക് ഈജിപ്ഷ്യന് ഗോളി മോസ്തഫ ഷൗബിര് ഡൈവ് ചെയ്ത് തട്ടിയകറ്റി. 14-ാം മിനിറ്റില് ഇറാന് ഗോള് മടക്കി. മിലാദ് മുഹമ്മദി ഗോള്വലയിലേക്ക് പായിച്ച പന്ത് ഈജിപ്ത് ഗോളി മോസ്തഫ ഷൗബിര് തടുത്തെങ്കിലും പന്ത് ലഭിച്ച റമിന് റെസായിയന് നല്ലൊരു ഷോട്ടിലൂടെ പന്ത് വലയിലെത്തിച്ചു.
സ്കോര് തുല്യമായതോടെ എതിര് ഗോള്മുഖം ലക്ഷ്യമാക്കി ഇരുടീമുകളും മികച്ച മുന്നേറ്റങ്ങള് നടത്തിയെങ്കിലും ഗോള് വഴങ്ങാതിരിക്കാന് പ്രതിരോധം ശക്തമാക്കി. ആദ്യപകുതിയുടെ പരിക്ക് സമയത്ത് ഇറാന് ഒരു അവസരം ലഭിച്ചെങ്കിലും മുതലാക്കാന് കഴിയാതിരുന്നതോടെ ആദ്യപകുതി 1-1സമനിലയില്.
രണ്ടാം പകുതിയില് ഈജിപ്ത് തുടര്ച്ചയായി ഇറാന് ഗോള്മുഖത്തേക്ക് ആക്രമണം നടത്തി. ഈജിപ്ഷ്യന് സ്ട്രൈക്കര് ഒമര് മര്മൂഷ് തുടര്ച്ചയായി ആക്രമണം അഴിച്ചുവിട്ട് ഇറാന് പ്രതിരോധത്തിന് തലവേദന സൃഷ്ടിച്ചുകൊണ്ടിരുന്നു. ഇതിനിടെ മൊഹനാദ് ലാഷിന് നല്കിയൊരു പാസ് ഭീഷണിയുയര്ത്തിയെങ്കിലും തട്ടിയകറ്റാന് പ്രതിരോധ നിരയ്ക്കു സാധിച്ചു. മത്സരത്തില് ഈജിപ്ത് പിടിമുറുക്കിയതോടെ ഇറാന്റെ സാധ്യതകള് കൂടുതല് മങ്ങി. 89-ാം മിനിറ്റിലാണ് ഇറാന് മത്സരത്തില് ആദ്യമായി കോര്ണര് ലഭിച്ചത്. മെഹ്ദി താരെമി പോസ്റ്റിലേക്ക് ഉയര്ത്തിയടിച്ച ഷോട്ട് ക്രോസ് ബാറില് തട്ടിയകന്നു. പിന്നീട് പരിക്ക് സമയത്തിന്റെ മൂന്നാം മിനിറ്റില് ഇറാന് ഒരിക്കല് കൂടി ഈജിപ്റ്റ് വല കുലുക്കിയെങ്കിലും വാര് പരിശോധനയ്ക്കൊടുവില് റഫറി ഓഫ് സൈഡ് വിളിച്ചതോടെ കളി സമനിലയില് കലാശിച്ചു.
