തിരുവനന്തപുരം: നഷ്ടപ്പെട്ട ഗ്രാമീണഭംഗിയെയും പ്രകൃതിദൃശ്യങ്ങളെയും ക്യാന്വാസിലാക്കി ശ്രദ്ധേയനാകുകയാണ് യുവ ചിത്രകാരന്. കോഴിക്കോട് വടകര സ്വദേശിയായ ശ്രീജിത്ത് വിലാതപുരം എന്ന കലാപ്രതിഭ മ്യൂസിയം ഓഡിറ്റോറിയത്തില് ഒരുക്കിയിരിക്കുന്ന ചിത്രപ്രദര്ശനമാണ് കാണികള്ക്ക് നവ്യാനുഭവം പകര്ന്ന് നല്കുന്നത്. വര്ണങ്ങളുടെ ചാരുത കൊണ്ടും ഭാവനാ വൈഭവം കൊണ്ടുമാണ് ചിത്രങ്ങള് മികവ് പുലര്ത്തുന്നത്. പ്രകൃതിദൃശ്യങ്ങളെ കലാമൂല്യം ചോരാതെ മനോഹരമായി ക്യാന്വസിലേക്ക് പകര്ത്തി ചിത്രകലാആസ്വാദകരെ മാസ്മരികമായ ഒരു ലോകത്തേക്ക് കൊണ്ടുപോവുകയാണ് ഈ കലാകാരന്. ചിത്രകലയില് തന്റേതായ വ്യക്തിമുദ്ര പതിപ്പിച്ച് ആസ്വാദകരുടെ പ്രശംസകള് ഏറ്റുവാങ്ങിയ ഈ പ്രദര്ശനം ഇന്ന് സമാപിക്കും.
പുതുതലമുറയ്ക്ക് അന്യമായ ഗ്രാമീണകാഴ്ചകളാണ് ശ്രീജിത്തിന്റെ ജലച്ഛായ ചിത്രങ്ങളില് കാണാന് കഴിയുന്നത്. വടകര ചോബാല ആര്ട്ട് ഗാലറി, കോഴിക്കോട് ലളിതകല അക്കാദമി തുടങ്ങിയ സ്ഥലങ്ങളില് ഇതിനകംപ്രദര്ശനം നടന്നു. എല്ലാ ജില്ലകളിലും പ്രദര്ശനമൊരുക്കാനുള്ള തയ്യാറെടുപ്പിലാണ്. ഗ്രാമത്തിലെ അനുഭവങ്ങളും കാഴ്ചകളും തന്റെ ചിത്രങ്ങളിലൂടെ ആസ്വാദകര്ക്ക് പകര്ന്ന് കൊടുക്കുക എന്നതാണ് ലക്ഷ്യം.
കുട്ടിക്കാലം മുതല് ചിത്രകലയെ സ്നേഹിച്ച ശ്രീജിത്ത് പോണ്ടിച്ചേരി യൂണിവേഴ്സിറ്റിയില് നിന്നാണ് ചിത്രകലയില് ബിരുദമെടുത്തത്. ഹൈദ്രാബാദ്, പോണ്ടിച്ചേരി, തമിഴ്നാട്, ബെംഗളൂരു, ദുബായ് എന്നിവിടങ്ങളിലും എക്സിബിഷന് നടത്തിയിട്ടുണ്ട്. ഓയില് പെയിന്റ് അക്രലിക്ക് എന്നിവയിലും രചനകള് നടത്താറുണ്ട്. ചിത്രകല കൂടാതെ മിമിക്രി, അഭിനയം, കവിത, സംഗീതം എന്നിവയിലും കഴിവ് തെളിയിച്ചിട്ടുണ്ട്. പുറമേരിക്കടുത്ത് വിലാതപുരത്തെ മാധവന്റെയും ദേവിയുടെയും മകനായ ശ്രീജിത്ത് അബുദാബിയില് ചിത്രകലാ അദ്ധ്യാപകനായിരുന്നു.
