കട്ടപ്പന: കട്ടപ്പനയിലെ സ്വകാര്യ ബസ് സ്റ്റാന്‍ഡ് സംബന്ധിച്ച ജന്മഭൂമി വാര്‍ത്ത തുണയായി, അധികൃതര്‍ ഉണര്‍ന്നു. ബസ് സ്റ്റാന്‍ഡില്‍ ഇതര വാഹനങ്ങള്‍ പ്രവേശിക്കുന്നത് തടയാന്‍ പോലീസ് നടപടി തുടങ്ങി. ഇന്നലെ സ്ഥലത്തെത്തിയ പോലീസ് വാഹനങ്ങള്‍ ഉള്ളില്‍ പ്രവേശിക്കാതിരിക്കാനായി ബാരിക്കേഡുകള്‍ സ്ഥാപിച്ചു.
അനധികൃതമായി പ്രവേശിക്കുന്ന വാഹന ഉടമകളില്‍ നിന്ന് പിഴ ഈടാക്കുകയും ചെയ്തു. വരും ദിവസങ്ങളിലും പരിശോധന തുടരുമെന്ന് കട്ടപ്പന എസ്‌ഐ കെ.ബി. സന്തോഷ്‌കുമാര്‍ പറഞ്ഞു. കഴിഞ്ഞ ദിവസം ബിഎംഎസ് കട്ടപ്പന സ്റ്റാന്‍ഡ് യൂണിയന്‍ പോലീസിലടക്കം പരാതി നല്‍കിയിരുന്നു. എന്നാല്‍ സംഭവത്തില്‍ നടപടിയെടുക്കാന്‍ നഗരസഭ തയ്യാറായിട്ടില്ല. ഇതരവാഹനങ്ങള്‍ ഓടുന്നത് നിരവധി അപകടങ്ങള്‍ക്ക് കാരണമായിരുന്നു. നൂറ് കണക്കിന് യാത്രക്കാര്‍ എത്തുന്ന സ്റ്റാന്‍ഡാണിത്.
