പേരാമ്പ്ര: റിമോട്ട് കണ്ട്രോളില് പ്രവര്ത്തിപ്പിക്കാവുന്ന എയര്ഗണ് രൂപകല്പന ചെയ്ത് സബ്ബ് ജില്ലാ ശാസ്ത്രമേളയില് ഒന്നാം സ്ഥാനവും എ ഗ്രേഡും നേടിയ വിദ്യാര്ത്ഥിക്ക് ജില്ലാ തലത്തില് എ ഗ്രേഡും നാലാം സ്ഥാനവും നേടിയിട്ടും സ്ക്കൂള് അധികൃതര് അപ്പീല് നല്കാന് വൈകി.
ഇതോടെ വിദ്യാര്ത്ഥിക്ക് സംസ്ഥാന ശാസ്ത്രമേളയില് പങ്കെടുക്കാനുള്ള അവസരം നഷ്ടപ്പെട്ടതായി പരാതി. ട്രൈപ്രോഡില് സ്ഥാപിക്കുന്ന തോക്ക് ദൂരെ നിന്ന് പ്രവര്ത്തിപ്പിക്കാവുന്നതാണ്. പ്രത്യേക കംപ്രസ്സറോ സൈക്കിള്പമ്പോ ഉപയോഗിച്ച് തോക്കില് എയര് ഫിക്സ് ചെയ്ത് റിമോട്ട് കണ്ട്രോള് വഴി തോക്കിനെ ദൂരെ നിന്ന് പ്രവര്ത്തിപ്പിക്കാം. തോക്കില് ഘടിപ്പിച്ചിരിക്കുന്ന ബ്ലൂടൂത്ത് ക്യാമറയിലൂടെ ദൃശ്യങ്ങള് കമ്പ്യൂട്ടര്, മൊബെല് ഫോണ് എന്നിവയിലൂടെ കാണാവുന്നതും തോക്കിന്റെ ആംഗിളുകള് നിശ്ചയിക്കാവുന്നതുമാണ്. നൂറ് മീറ്റര് വരെ റേഞ്ച് ഉള്ളതാണ് ഈ തോക്ക്.
പേരാമ്പ്ര സെന്റ് ഫ്രാന്സിസ് സ്ക്കൂളിലെ പത്താംതരം വിദ്യാര്ത്ഥിയായ ജി.എസ്. അഭിനവ് ആണ് ഡിഡിഇക്കും, ഡിഇഒവിനും വിദ്യഭ്യാസ മന്ത്രിക്കും പരാതി അയച്ചത്. കൈതക്കല് കോയിക്കര ഗിരീഷിന്റെ മകനായ അഭിനവ് ശാസ്ത്ര സാങ്കേതിക രംഗത്ത് ഒട്ടനവധി സമ്മാനങ്ങള് ഇതിനകം നേടിയിട്ടുണ്ട്.
