കട്ടപ്പന: ഇരട്ടയാര് ഡാമിന്റെ പരിസരത്ത് മാലിന്യം നിക്ഷേപിച്ചയാളെ പോലീസ് പിടികൂടി. പറയന്കവല സ്വദേശി പുളിവള്ളില് ബിനീഷി(29) നെയാണ് കട്ടപ്പന പോലീസ് അറസ്റ്റ് ചെയ്തത്.
ഗ്രാമപഞ്ചായത് വൈസ് പ്രസിഡന്റ് റെജി ഇലിപ്പുലികാട്ടിന്റെ ഇടപെടലാണ് പ്രതിയെ പിടികൂടാന് കാരണമായത്.കഴിഞ്ഞ ദിവസം രാത്രി 9.45നാണ് ഇരട്ടയാര് തുളസിപ്പാറ പാതയില് ഡാമിന്റെ വെള്ളം കയറികിടക്കുന്നസ്ഥലത്ത് ഓട്ടോയിലെത്തിച്ച് മാലിന്യം തള്ളുന്നത് വഴിയാത്രക്കാരന്റെ ശ്രദ്ധയില് പെട്ടത്. തുടര്ന്ന് വഴിയാത്രക്കാരന് വൈസ് പ്രസിഡന്റിനെ ഫോണില് വിളിച്ച് വിവരം അറിയിക്കുകയായിരുന്നു.
വിവരം അറിഞ്ഞ റെജി ബൈക്കുമായി ഓട്ടോറിക്ഷയ്ക്ക് പിന്നാവെ പോവുകയും നമ്പറും പേരും മനസിലാക്കുകയുമായിരുന്നു. പിറ്റേന്ന് പഞ്ചായത്ത് കമ്മിറ്റിയില് വിവരം ധരിപ്പിക്കുകയും സെക്രട്ടറി പോലീസില് വിവരമറിയിക്കുകയുമായിരുന്നു. പോലീസ് പ്രതിയെ പിടികൂടി ചോദ്യം ചെയ്തപ്പോള് കുറ്റം സമ്മതിച്ചു.
