സര്ക്കാരിന്റെ ഭാഗമായ ജില്ലാ കളക്ടര് നല്കിയ റിപ്പോര്ട്ടിനെ ഒരു മന്ത്രിക്ക് എങ്ങനെ ചോദ്യം ചെയ്യാനാകുമെന്ന ഹൈക്കോടതിയുടെ ചോദ്യം പ്രസക്തം. മന്ത്രിമാര് ഇത്തരം കേസുകള് ഫയല് ചെയ്യുന്നത് അപൂര്വമാണ്.
മന്ത്രി തോമസ് ചാണ്ടി ഉള്പ്പെട്ട ഭൂമികൈയേറ്റം സംബന്ധിച്ച റിപ്പോര്ട്ട് റദ്ദാക്കണമെന്ന് ആവശ്യപ്പെട്ട് തോമസ് ചാണ്ടി ഹൈക്കോടതിയെ സമീപിച്ചത് തെറ്റായ കീഴ്വഴക്കമാണ്. സുപ്രീം കോടതിയെ സമീപിക്കാനൊരുങ്ങുന്നതും ശരിയായ വഴിയല്ല.
എന്നാല് ചാണ്ടിക്കുവേണ്ടി കോണ്ഗ്രസ് എംപിയായ അഭിഭാഷകന് വിവേക് തന്ഖ ഹാജരായതില് അപാകതയില്ല. അഭിഭാഷകന് ആകുമ്പോള്, തന്നെ സമീപിക്കുന്ന കക്ഷികള്ക്ക് മികച്ച സേവനം നല്കുകയെന്നതാണ് ഒരാളുടെ കടമ. അവിടെ രാഷ്ട്രീയം നോക്കേണ്ട കാര്യമില്ല. കോണ്ഗ്രസുകാര്ക്ക് കോണ്ഗ്രസ് വക്കീല്, മാര്ക്സിസ്റ്റ് സഖാക്കള്ക്ക് അവരുടെ വക്കീല്, ബിജെപിക്ക് വേറെ വക്കീല് എന്ന സമീപനം ശരിയല്ല.
മുതിര്ന്ന അഭിഭാഷകനായ വിവേക് തന്ഖയെപ്പോലുള്ളവര് വാദിച്ചാല് കേസിന്റെ ഗതി മാറുമെന്ന് കരുതുന്നത് അസംബന്ധമാണ്, കേസ് കേള്ക്കുന്ന ജഡ്ജിമാരെ അവഹേളിക്കുന്നതിനു തുല്യവുമാണ്. കോടതിയിലേക്ക് എത്തിയ തന്ഖയ്ക്കതിരെ യൂത്ത് കോണ്ഗ്രസ് പ്രവര്ത്തകര് കരിങ്കൊടി കാണിച്ചത് തികച്ചും അപലപനീയമാണ്.
കെ.എ.സോളമന്,
എസ്എല് പുരം
ഇനിയെങ്കിലും സത്യം മനസ്സിലാക്കുക
യജ്ഞങ്ങളും യാഗങ്ങളും മനുഷ്യസംസ്കാരത്തിന് അമൂല്യവും ശാസ്ത്രീയവുമായ സംഭാവനകള് നല്കിയ ഋഷിപരമ്പരകളുടേതാണ്. അതിന്റെ പാരിസ്ഥിതികവും മനശ്ശാസ്ത്രപരവുമായ പ്രസക്തികള് തിരിച്ചറിഞ്ഞുകൊണ്ടിരിക്കുന്ന വര്ത്തമാനകാല സാഹചര്യത്തില് ഇവയെല്ലാം അശാസ്ത്രീയവും പ്രാകൃതവുമാണെന്ന് തള്ളിപ്പറയുന്നത് ശരിയാണോ? ചില പുരോഗമന പ്രസ്ഥാനങ്ങള് വസ്തുതകള്ക്ക് നേരെ കണ്ണടച്ചിരുട്ടാക്കി നമ്മുടെ സംസ്കാരത്തെ പാടെ തള്ളുന്നത് യുക്തിസഹമാണോ? എന്താണ് യാഗ/യജ്ഞങ്ങള്. തികച്ചും പ്രതീകാത്മകവും കാവ്യാത്മകവുമാണ്. യാഗ ഹവിസ്സുകളും അതിന്റെ പുകപടലങ്ങളും അന്തരീക്ഷത്തിലുണ്ടാക്കുന്ന ശുദ്ധീകരണത്തെക്കുറിച്ച് നാം മനസ്സിലാക്കണം.
യാഗ/യജ്ഞങ്ങളിലും മറ്റ് വൈദിക കര്മ്മങ്ങളിലും നാം നടത്തുന്ന പ്രക്രിയകള് ശ്രദ്ധിക്കുക. ഉദാഹരണമായി മുന്കാലങ്ങളില് ഇതെഴുതുന്നയാളെപ്പോലുള്ളവര് ജീവിച്ച് വളര്ന്ന ഗ്രാമപ്രദേശങ്ങളില് വേനല്ക്കാലത്തിന്റെ മൂര്ദ്ധന്യഘട്ടങ്ങളില് വടക്കേംഭാഗം എന്നൊരു ദൈവസങ്കല്പ്പപ്രക്രിയയുണ്ടായിരുന്നു. ഇത് അവൈദികമാണെങ്കിലും അതിലെ ചേരുവകള് വാഴത്തട, കോല്ത്തിരി, മഞ്ഞളും നൂറും കലക്കിയ ഗുരുസി എന്നിവയായിരുന്നു. ചെണ്ടവാദ്യങ്ങളുടെ അകമ്പടിയോടെ കോമരത്താന്മാര്-വെളിച്ചപ്പാടുകള് ചെയ്തിരുന്നൊരു കര്മ്മമായിരുന്നു അത്. വൈദ്യശാസ്ത്രരംഗം ഇന്നത്തെപ്പോലെ പുരോഗതി പ്രാപിച്ചിട്ടില്ലായിരുന്ന അക്കാലത്ത് വസൂരിപോലുള്ള വേനല്ക്കാലരോഗങ്ങളെ പ്രതിരോധിക്കാന് ഇത്തരം പരിപാടികള് ഉപയുക്തമായിത്തീര്ന്നതായി ഇതെഴുതുന്ന ആളെപ്പോലുള്ളവരുടെ ബാല്യകാലാനുഭവങ്ങളില് ഉണ്ട്.
എന്താണിതിന്റെ ശാസ്ത്രീയത? അത് മനശ്ശാസ്ത്രപരവും പാരിസ്ഥിതികവുമാണ്. രോഗാണുക്കളെ അന്തരീക്ഷത്തില് നിന്ന് മാറ്റാനുള്ള കഴിവ് കത്തിച്ചുവച്ച കോല്ത്തിരികള്ക്കുണ്ട്. മഞ്ഞള്പ്പൊടി തുടങ്ങിയവയൊക്കെ രോഗസംഹാരികളാണെന്ന് ശാസ്ത്രം തെളിയിച്ചുകഴിഞ്ഞതാണ്. ഇതൊരു ചെറിയ ഉദാഹരണം മാത്രം. ഇതിന്റെ വലിയൊരു രൂപം വൈദികകര്മ്മങ്ങളായ യജ്ഞങ്ങളിലും യാഗങ്ങളിലും ഉണ്ട് എന്നുള്ളത് ശാസ്ത്രസമ്മതമാണ്. അതില് ഉപയോഗിക്കുന്ന മൂലകങ്ങള് വന്ധ്യത, മറ്റ് രോഗങ്ങള് തുടങ്ങിയവക്ക് പരിഹാരമേകിയിട്ടുണ്ട്. ഇന്നിപ്പോള് വളരെ പ്രാധാന്യത്തോടെ വൈദ്യശാസ്ത്ര രംഗത്ത് നിറകതിര് ചൊരിഞ്ഞുനില്ക്കുന്ന ആയുര്വേദം തുടങ്ങിയ ചികിത്സാരീതികള് ഇവയുമായി ബന്ധപ്പെട്ടതാണ്.
ഒരു രാഷ്ട്രീയപ്രസ്ഥാനം അതിന്റെ പ്രചാരണോപാധിയായി ഇത്തരം രൂപങ്ങളെ ഉപയോഗപ്പെടുത്തുന്നുണ്ടെങ്കില് അതിന്റെ കുറ്റക്കാര് ഇവിടത്തെ യുക്തിവാദികളും പുരോഗമനത്തിന്റെ പേരിലുള്ള മറ്റ് രാഷ്ട്രീയ സംഘടനകളുമാണ്. വര്ഷങ്ങള്ക്ക് മുമ്പ് ലോകം കണ്ട മഹാശാസ്ത്രജ്ഞന്മാരിലൊരാളായ ജോര്ജ്ജ് സുദര്ശനന് ഇതെഴുതുന്ന ആളോട് പറഞ്ഞ ഒരു കാര്യം ഓര്മ്മവരികയാണ്. ഭാരതീയ വേദങ്ങളും ഇതിഹാസ/പുരാണാദികളും തികച്ചും ശാസ്ത്രപരമാണ്. അതുകൊണ്ട് നാം ഇക്കാര്യങ്ങളെ സംബന്ധിച്ച് പഠിക്കുക, പരിശോധിക്കുക, പരീക്ഷിക്കുക-എന്നിട്ടുമതി എടുത്തുചാട്ടങ്ങള്.
കെ.ടി.രാധാകൃഷ്ണന്, കൂടാളി,
കണ്ണൂര്
