പള്ളിക്കല്: ഭൂവുടമകളുടെ എതിര്പ്പിനെ തുടര്ന്ന് തടസ്സപ്പെട്ടിരുന്ന പള്ളിക്കല്ബസാറിലെ ഓവുചാല് നിര്മ്മാണം തുടങ്ങി. ബിജെപി നേതാക്കളുടെ മധ്യസ്ഥതയില് ഉദ്യോഗസ്ഥര് ഭൂവുടമകളുമായി നടത്തിയ ചര്ച്ചയിലാണ് പ്രശ്നത്തിന് പരിഹാരമായത്.
മുന് എംഎല്എ കെ.എന് .എ.ഖാദറും നിലവിലെ എംഎല്എ അബ്ദുള് ഹമീദും അനുവദിച്ച് ഫണ്ട് ഉപയോഗിച്ചാണ് നിര്മ്മാണം നടക്കുന്നത്. അനധികൃത റോഡ്, നടപ്പാത കൈയേറ്റം എന്നിവ ഒഴിപ്പിക്കുന്നതിനുള്ള പഞ്ചായത്തിന്റെ ശ്രമങ്ങള് പലതവണ പരാജയപ്പെട്ടിരുന്നു. ഭൂവുടമകളും കയ്യേറ്റക്കാരും അവകാശവാദമുന്നയിച്ചത് പദ്ധതി നീളാന് കാരണമായി.
രണ്ടറ്റവും മുട്ടാതെ കിടന്നിരുന്ന ഓവുചാലുകള് ടൗണില് മലിനജലം കെട്ടിനില്ക്കുന്നതിനും പരിസരപ്രദേശത്ത് രോഗഭീതി ഉണ്ടാക്കുന്നതിനും കാരണമായിരുന്നു. പള്ളിക്കല് ബസാറിന്റെ വികസനത്തിനും പതിവായുള്ള ഗതാഗതതടസ്സത്തില് നിന്നുള്ള മോചനത്തിനും പുതിയ ഓവുചാല് നവീകരണം സഹായകരമാകും. ഓവുചാലിന് മുകളില് കോണ്ക്രീറ്റ് സ്ലാബിട്ട് കാല്നടയാത്രക്കാര്ക്ക് പ്രയോജനപ്പെടുത്തുമ്പോള് ഓട്ടോറിക്ഷകളുടെ പാര്ക്കിങ്ങിന് കൂടുതല് സ്ഥലം കണ്ടെത്താനാകും. മുന്നൂറിലധികം വരുന്ന ഓട്ടോറിക്ഷകള് തോന്നുംപോലെ പാര്ക്ക് ചെയ്യുന്നതിനാല് ഇവിടെ ഗതാഗതക്കുരുക്കും വാഹനാപകടങ്ങളും പതിവായിരുന്നു.
രണ്ട് ദേശീയപാതകളെ ബന്ധിപ്പിക്കുന്ന കാക്കഞ്ചേരി-കൊട്ടപ്പുറം റോഡിലെ പ്രധാന ടൗണാണ് പള്ളിക്കല് ബസാര്.
പിഡബ്ല്യൂഡി എക്സിക്യൂട്ടീവ് എഞ്ചിനീയര് ഹരീഷ്, അസി.എഞ്ചിനീയര് ആര്യ, ഓവര്സീയര് ബിജു, ഗ്രാമപഞ്ചായത്ത് പ്രസിഡന്റ് പി.മിഥുന, ബിജെപി നേതാക്കളായ പി.ജയനിദാസന്, വി.സി.നാഗന് എന്നിവര് നേതൃത്വം നല്കി.
