മയ്യഴി: മാഹി പൂഴിത്തല അയ്യിട്ടവളപ്പില് പൂഴിയില് നകുലന് എന്ന അനിലിനെ മര്ദ്ദിച്ച് പരിക്കേല്പ്പിച്ച സംഭവത്തില് തീരദേശ എസ്ഐ ജയരാജനെ സംരക്ഷിക്കുന്ന നടപടിയാണ് മാഹി പോലീസിന്റേതെന്ന് മാഹി തീരദേശ വികസന സംയുക്തസമരസമിതി ആരോപിച്ചു. മാഹി പോലീസിനെതിരെ പ്രക്ഷോഭം നടത്തുമെന്ന് ഭാരവാഹികള് പത്രസമ്മേളനത്തില് അറിയിച്ചു.
തീരദേശ പോലീസ് സ്റ്റേഷന് പരിസരങ്ങളിലായി നിര്ത്തിയിട്ട ബസ്സുകള് നീക്കണമെന്ന തീരദേശ പോലീസിന്റെ നിര്ദേശവുമായി ബന്ധപ്പെട്ടാണ് നകുലനെ എസ്ഐ ജയരാജന് മര്ദ്ദിച്ചത്. ഇക്കഴിഞ്ഞ 30നായിരുന്നു സംഭവം. നകുലനെ ഭീകരമായി മര്ദ്ദിച്ചതായാണ് സമരസമിതിയുടെ പരാതി. മര്ദ്ദനത്തില് പരിക്കേറ്റ നകുലനെ ആസ്പത്രിയിലെത്തിക്കാന് പോലീസ് തയ്യാറായില്ല. മത്സ്യത്തൊഴിലാളികളാണ് ഇയാളെ മാഹി ആശുപത്രിയിലെത്തിച്ചത്. മര്ദ്ദനത്തില് ചെവിക്ക് മാരകമായി പരിക്കേറ്റ നകുലനെ പിന്നിട് കോഴിക്കോട്ടെ സ്വകാര്യ ആസ്പത്രിയില് പ്രവേശിപ്പിച്ചിരുന്നു. ശക്തമായ ആഘാതത്തെ തുടര്ന്ന് കര്ണ്ണപുടത്തിന് തകരാറ് സംഭവിച്ചതിനാല് ശസ്ത്രക്രിയ വേണമെന്ന് ഡോക്ടര് നിര്ദ്ദേശിച്ചിരുന്നു.
കോഴിക്കോട്ടെ ആശുപത്രിയില് രാത്രിയില് മരുന്നു കഴിച്ചശേഷം ഉറങ്ങുകയായിരുന്ന നകുലനെ 3 ന് രാവിലെ രണ്ടിനാണ് മാഹി പോലീസ് സംഘം ചോദ്യം ചെയ്തത്. ക്ഷീണിതനും പാതിമയക്കത്തിലുമായിരുന്ന നകുലനെ ഭീഷണിപ്പെടുത്തി പ്രസ്താവന ഒപ്പിട്ട് വാങ്ങിയതായി ഭാരവാഹികള് ആരോപിച്ചു. മാഹി ആശുപത്രിയില് നിന്നും നല്കിയതിന് വിരുദ്ധമായ പ്രസ്താവനയിലാണ് പോലീസ് ഒപ്പിടുവിച്ചതെന്നും ആരോപിച്ചു. മാഹി ആശുപത്രിയില് നിന്നും എടുത്ത മൊഴിയും പരാതിയും ഒഴിവാക്കി ലളിതമായ വകുപ്പുകള് ചേര്ത്താണ് പോലീസ് എഫ്ഐആര് റജിസ്റ്റര് ചെയ്തിട്ടുള്ളത്. മാഹി എസ്ഐ വിപല് കുമാറാണ് ആശുപത്രികളിലെത്തി മൊഴിയെടുത്തതും ഭീഷണിപ്പെടുത്തിയതും. പോലീസിലെ ക്രിമിനലും നിരവധി കേസുകളിലെ പ്രതിയുമാണ് എസ്ഐ ജയരാജനെന്നും സമരസമിതി ആരോപിച്ചു.
സംഭവത്തെക്കുറിച്ചും മാഹി പോലീസിന്റ നടപടികളെക്കുറിച്ചും സമഗ്രമായ ഉന്നതതല അന്വേഷണം നടത്തി എസ്ഐയെ സര്വ്വീസില് നിന്നും സസ്പെന്റ് ചെയ്യണമെന്നാവശ്യപ്പെട്ടു. മാഹി പോലീസ് സൂപ്രണ്ടും എസ്ഐ ജയരാജനും തമ്മിലുള്ള അവിശുദ്ധ ബന്ധത്തെക്കുറിച്ചും അന്വേഷണം നടത്തണം. മാഹി പോലീസ് സേനയെ ശുദ്ധീകരിക്കാനുള്ള നടപടികള് വേണമെന്നും കമ്മറ്റി ആവശ്യപ്പെട്ടു. പ്രക്ഷോഭത്തിന്റെ ഭാഗമായി 9ന് തീരദേശ പോലീസ് സ്റ്റേഷന് മുന്നില് ധര്ണ്ണ, 10 ന് നഗരത്തിലെ വിവിധ കേന്ദ്രങ്ങളില് മാഹി പോലീസിനെതിരെ പ്രചരണവും ഒപ്പ് ശേഖരണവും, 11 ന് വൈകുന്നേരം നഗരത്തില് പന്തം കൊളുത്തി പ്രകടനം, 12 ന് വൈകുന്നേരം ആറിന് ബഹുജന കണ്വെന്ഷന് എന്നിവ നടക്കും.
വാര്ത്താ സമ്മേളനത്തില് പി.വി.ചന്ദ്രദാസ്, പി.ഗിരീശന്, എ.സുനില്, വിവിധ രാഷ്ടീയ പാര്ട്ടി നേതാക്കളായ കെ.പി.മനോജ്, പി.മോഹനന്, എ.വി.യൂസഫ്, ഐ.അരവിന്ദന്, ടി.പി.റഷീദ് എന്നിവര് പങ്കെടുത്തു.
