ശ്രീകണ്ഠാപുരം: ഒരു കൊച്ചുവീട് നിര്മ്മിക്കുകയെന്ന ബീനയുടെ സ്വപനം സാക്ഷാത്കരിക്കുകയാണ് സേവാഭാരതിയും ജോസ് മാഷും. ശ്രീകണ്ഠപുരം നഗരസഭയില് മടമ്പം ദേശത്ത് താമസിക്കുന്ന ബീനയെയും രണ്ട് മക്കളെയും വര്ഷങ്ങള്ക്ക് മുമ്പേ ഭര്ത്താവ് ഉപേക്ഷിച്ചതാണ്. മടമ്പം ദേശത്ത് എത്തുന്നതിന് മുമ്പ് ചെറുപ്പം മുതലേ ഓട്ടിസം ബാധിച്ച മകനായ മിലാന് ജോണ്സനേയും മകളായ റോസിനയേയും കൂട്ടി കൊയ്ലിലെ ഒരു വാടക വീട്ടിലായിരുന്നു താമസം. കൂലിപ്പണിക്കാരിയായിരുന്ന ബീനക്ക് കൃത്യസമയത്ത് വാടക കൊടുക്കാന് നിവൃത്തിയില്ലാത്തതിനാല് രണ്ട് മക്കളെയും കൂട്ടി അവിടം വിട്ടിറങ്ങേണ്ടി വന്നു. ഓട്ടിസം ബാധിതനായ മകന് മിലന് ശ്രീകണ്ഠപുരം സാന്റ് ജോര്ജിയ സ്കൂളില് അഞ്ചാം വര്ഷ വിദ്യാര്ത്ഥിയും മകള് റോസിന മടമ്പം മേരിലാന്റ് ഹൈസ്കൂളില് മൂന്നാം വര്ഷ വിദ്യാര്ത്ഥിയുമാണ്.
രണ്ട് മക്കളെയും കൂടി വാടകവീട്ടില് നിന്ന് ഇറങ്ങിയ ബീനയ്ക്ക് വീട് നിര്മ്മിക്കാന് സഹയത്തിനായി മടമ്പം വാര്ഡ് കൗണ്സിലറായ ബിനോയ് മാഷിനെ സമീപിക്കുകയും ശ്രീകണ്ഠപുരം നഗരസഭ ബിനോയ് മാഷിന്റെ നിര്ദ്ദേശം മാനിച്ച് പ്രധാനമന്ത്രി ആവാസ് യോജന ഭവനവായ്പ പദ്ധതി പ്രകാരം ലോണ് അനുവദിക്കുകയും ചെയ്തു. എന്നാല് അനുവദിച്ച ലോണ് പ്രകാരം വീട് നിര്മ്മിക്കാന് സ്ഥലത്തിന് വേണ്ടി മുട്ടാത്ത വാതിലുകളില്ലായിരുന്നു. സഹായ ഹസ്തവുമായി പല വീടുകളും കയറിയിറങ്ങിയെങ്കിലും ഫലമുണ്ടായില്ല.ഒടുവില് ബീനയുടെയും മക്കളുടെയും ദുരിത കഥകള് മനസ്സിലാക്കിയ ചിറ്റാട്ടില് സി.ജെ.ജോസ് മാഷ് വീട് നിര്മ്മിക്കാനായി മുന്ന് സെന്റ് ഭൂമി ദാനമായി കൊടുത്തു. പിന്നീട് സഹായഹസ്തവുമായി ശ്രീകണുപുരം സേവാഭാരതിയും എത്തി. വീടു നിര്മ്മാണനത്തിനുള്ള മുഴുവന് സാമഗ്രഹികളും വീടിന്റെ ചുമരുകള് നിര്മ്മിച്ചതും മറ്റ് സേവനങ്ങള് ചെയ്ത് തന്നത് ശ്രീകണ്ഠപുരം സേവാഭാരതിയാണെന്നും മടമ്പം ലൂര്ദ് മാതാ സൊസൈറ്റി മുപ്പതിനായിരം രൂപ വീട്ടാവശ്യങ്ങള്ക്കായി ധനസഹായം നല്കിയെന്നും ബീന പറഞ്ഞു.
വീട് നിര്മ്മിക്കാന് പല ആളുകളുടെയും സമീപത്തേക്ക് സഹായം ചോദിച്ച് പോയെങ്കിലും അവരെല്ലാം കൈയ്യൊഴിഞ്ഞു. അവസാനം ഒരുഗതിയും ഇല്ലാതെ മരണത്തെ മുഖാമുഖം കാണുന്ന അവസ്ഥയിലെത്തി നില്ക്കുന്ന സമയത്താണ് ദൈവതുല്യനെപ്പോലെ ചിറ്റാട്ടില് സി.ജെ.ജോസ് മാഷും ശ്രീകണ്ഠപുരം സേവാഭാരതിയും സഹായവാഗ്ദാനങ്ങളുമായി എന്റെ മുമ്പിലെത്തുന്നതെന്നും, അവര് പറഞ്ഞ സഹായവാഗ്ദാനങ്ങളെല്ലാം പാലിക്കുന്നുണ്ടെന്നും ബീന പറഞ്ഞു. വീട് നിര്മ്മിക്കാന് വേണ്ടി ശ്രീകണ്ഠപുരം നഗരസഭ പ്രധാനമന്ത്രി ആവാസ് യോജന ഭവന വായ്പ പദ്ധതിയുടെ ആദ്യത്തെയും രണ്ടാമത്തെയും ഘഡുവായ ഒരു ലക്ഷത്തി ഇരുപതിനായിരം രൂപ ബീനയ്ക്ക് ലഭിച്ചു കഴിഞ്ഞു.
