ന്യൂദല്ഹി:മമത ബാനര്ജിയുടെ തൃണമൂല് കോണ്ഗ്രസ് വിട്ട് എന്ഡിഎയുടെ ഭാഗമായ 20 വിമത എംപിമാര്ക്ക് ലോക്സഭയില് പ്രത്യേക ഇരിപ്പിടം അനുവദിച്ച് ലോക് സഭാ സ്പീക്കര്. ഇതോടെ ലോക് സഭയില് എന്ഡിഎ സര്ക്കാരിന്റെ കരുത്ത് കൂടും. നിര്ണ്ണായക ബില്ലുകള് മണ്സൂണ് കാലസമ്മേളനത്തില് കൊണ്ടുവരാനിരിക്കുന്ന മോദി സര്ക്കാരിന് ഇത് സഹായകരമാകും.
സുദീപ് ബന്ദോപാധ്യായയും കകോലി ദസ്തിദാറും നേതൃത്വം നല്കുന്ന തൃണമൂല് വിമത ഗ്രൂപ്പ് ത്രിപുര കേന്ദ്രമായി പ്രവര്ത്തിക്കുന്ന നാഷണല് സിറ്റിസണ്സ് പാര്ട്ടി ഓഫ് ഇന്ത്യയില് (എന്സിപിഐ) ലയിച്ചിരിക്കുകയായിരുന്നു. അന്നേ ലോക് സഭയില് തൃണമൂലില് നിന്നും വേറിട്ട് പ്രത്യേക ബ്ലോക്കായി ഇരിക്കാന് അനുവദിക്കണമെന്ന് വിമതര് ആവശ്യപ്പെട്ടിരുന്നു. ആ ആവശ്യമാണ് ഇപ്പോള് ലോക് സഭാ സ്പീക്കര് ഓം ബിര്ള അംഗീകരിച്ചിരിക്കുന്നത്.
തൃണമൂലിലെ മൂന്നില് രണ്ട് ഭാഗത്തിലധികം ഉള്ളതിനാല് ഈ എംപിമാരുടെ മറ്റൊരു പാര്ട്ടിയില് ലയിക്കാനുള്ള തീരുമാനത്തിന് കൂറുമാറ്റനിരോധനിയമം ബാധകമല്ലെന്നും സ്പീക്കര് ഓം ബിര്ള പറഞ്ഞു. ഈ വിമത ഗ്രൂപ്പിന്റെ നേതാവിനെ കേന്ദ്ര മന്ത്രി കിരണ് റിജിജു മണ്സൂണ് കാല സമ്മേളനം തുടങ്ങുന്നതിന് മുന്പുള്ള സര്വ്വകക്ഷി യോഗത്തില് പങ്കെടുക്കാന് ക്ഷണിച്ചിട്ടുണ്ട്.
20 വിമതര് പോയതോടെ മമതയുടെ പക്ഷത്ത് അവശേഷിക്കുന്നത് എട്ട് എംപിമാര് മാത്രമാണ്. അഭിഷേക് ബാനര്ജി, കല്യാണ് ബാനര്ജി, മഹുവ മൊയ്ത്ര, സുഗത റോയി, കീര്ത്തി ആസാദ്, ശത്രുഘന് സിന്ഹ, പ്രതിമ മൊണ്ടാല്, സജ്ദ അഹമ്മദ് എനനിവരാണ് മമതയ്ക്കൊപ്പം ഉറച്ചുനില്ക്കുന്നവര്. വിമതരുടെ പക്ഷത്ത് മോദി സര്ക്കാരിനെതിരെ നിലപാടെടുക്കുന്ന യൂസഫ് പത്താന്, സയോണി ഘോഷ് തുടങ്ങിയവര് ഉള്പ്പെടുന്നു.
