വിഴിഞ്ഞം: വീടിന്റെ നാലു ചുമരുകള്ക്കുള്ളില് പോലും സ്ത്രീകളും കുട്ടികളും സുരക്ഷിതരല്ലാത്ത കാലത്ത് ഏകയായി നാടു ചുറ്റുകയാണ് രാധികറാവു എന്ന ഇരുപത്തിയാറുകാരി. നിര്ഭയ പത്രപ്രവര്ത്തകനെന്നറിയപ്പെട്ടിരുന്ന സ്വദേശാഭിമാനി രാമകൃഷ്ണപിള്ളയുടെ ജന്മനാടായ നെയ്യാറ്റിന്കരയുടെ പാരമ്പര്യം ഈ പെണ്കുട്ടിക്കും അവകാശപ്പെടാനാകും എന്നത് യാദൃശ്ചികമാകാം.
ഏപ്രില് 19 നാണ് ചെന്നൈയില് നിന്ന് രാധിക ഭാരതപര്യടനം ആരംഭിച്ചത്. അതും ഏകയായി സ്വന്തം ഇരുചക്രവാഹനത്തില്. 25000 കിലോമീറ്ററാണ് ഇതുവരെ സഞ്ചരിച്ചത്. 29 സംസ്ഥാനങ്ങളും നാല് കേന്ദ്രഭരണ പ്രദേശങ്ങളും യാത്ര കടന്നു. വടക്കു കിഴക്കന് സംസ്ഥാനങ്ങളിലും ജമ്മു കാശ്മീരിലും സഞ്ചരിച്ചശേഷം കഴിഞ്ഞദിവസം തിരുവനന്തപുരത്ത് എത്തി. യാത്ര ആരംഭിച്ച ചെന്നൈയില് തന്നെയാണ് ഈ മാസം 17 ന് സമാപനവും.
സാഹസികയാത്ര എന്നതിനപ്പുറം ഭാരതത്തിന്റെ പാരമ്പര്യത്തെയും സംസ്കാരത്തെയും അടുത്തറിയുക എന്നതാണ് പ്രധാന ലക്ഷ്യം. ഫോട്ടോഗ്രഫി ഏറെ ഇഷ്ടപ്പെടുന്ന ഈ പെണ്കുട്ടി യാത്രയിലുടനീളമുള്ള കാഴ്ചകള് തന്റെ ക്യാമറയില് പകര്ത്തുന്നുണ്ട്. ഇവയെല്ലാം ചേര്ത്ത് പ്രദര്ശനം സംഘടിപ്പിക്കാനും പദ്ധതിയുണ്ട്.
മൂന്നുവര്ഷങ്ങള്ക്ക് മുമ്പ് സഹോദരിയോടൊപ്പം ഭാരതം മുഴുവന് പൊതുവാഹനങ്ങളില് സഞ്ചരിക്കാനായിരുന്നു തീരുമാനിച്ചിരുന്നത്. എന്നാല് അസൗകര്യങ്ങള് നിമിത്തം സഹോദരി പിന്മാറി. പക്ഷേ രാധിക മുന്നോട്ടുപോയി. ഏറെനാളത്തെ തയ്യാറെടുപ്പുകള്ക്ക് ശേഷമാണ് യാത്ര ആരംഭിച്ചത്. ശാരീരിക ഉറപ്പിനുവേണ്ടി ബോക്സിംഗ് പരിശീലിച്ച രാധിക ജിംനേഷ്യത്തിലും പോയി. യാത്രയ്ക്ക് ഉപയോഗിച്ച ഇരുചക്രവാഹനത്തിന്റെ മെക്കാനിക്കല് പണിയും പഠിച്ചു. രാവിലെ 6 ന് ആരംഭിക്കുന്ന യാത്ര വൈകിട്ട് 6 ന് അവസാനിപ്പിക്കുമായിരുന്നു. ഇതിനിടയില് വിദ്യാര്ഥികള്, കര്ഷകര്, പൊതുപ്രവര്ത്തകര് തുടങ്ങിയവരോടെല്ലാം ആശയവിനിമയം നടത്തിയാണ് ഓരോ സ്ഥലത്തു നിന്നും വിട പറഞ്ഞിരുന്നത്.
കൊമേഴ്സ് ബിരുദവും കലാക്ഷേത്രയില് നിന്ന് സംഗീതവും രാധിക അഭ്യസിച്ചിട്ടുണ്ട്. അച്ഛന് ജനാര്ദ്ദന റാവുവും അമ്മ സരസ്വതിയും നല്കിയ ആത്മവിശ്വാസമാണ് യാത്രയ്ക്ക് കരുത്തായതെന്ന് രാധിക പറയുന്നു. നിരവധി ഭാഷകള് കൈകാര്യം ചെയ്യാനാകുന്ന ഈ പെണ്കരുത്ത് ചെന്നൈയിലാണ് താമസം. എവറസ്റ്റ് കീഴടക്കണമെന്ന സ്വപ്നം യഥാര്ഥ്യമാക്കാന് കാത്തിരിക്കുകയാണ് രാധിക റാവു എന്ന ഈ സാഹസിക.
