പറവൂര്: ജില്ലയിലെ പട്ടികവര്ഗ്ഗ വികസന പദ്ധതികള് അവതാളത്തിലേക്ക്. പല പഞ്ചായത്തുകളിലും പ്രമോട്ടര്മാരില്ലാത്തതും ഉദ്യോഗസ്ഥരുടെ അനാസ്ഥയും കാരണം ആദിവാസികള് വലയുകയാണ്. കോട്ടുവള്ളി, ഏഴിക്കര, വടക്കേക്കര, ചിറ്റാറ്റുകര എന്നീ പഞ്ചായത്തുകളിലും പറവൂര് മുനിസിപ്പാലിറ്റിയിലും മാസങ്ങള് കഴിഞ്ഞിട്ടും പ്രമോട്ടര്മാരെ നിയമിച്ചിട്ടില്ല.
ഈ മേഖലയില് താമസിക്കുന്നവര് പല പദ്ധതികളും അറിഞ്ഞിട്ട് പോലുമില്ല. പട്ടികവര്ഗ്ഗ വികസന പദ്ധതികള് ഈ വിഭാഗങ്ങളില് എത്തിക്കുന്നതിന് വേണ്ടിയാണ് പ്രമോട്ടര്മാരെ നിയമിക്കുന്നത്.
പട്ടികജാതി – പട്ടികവര്ഗ്ഗ ഫണ്ടുകള് അര്ഹതപ്പെട്ടവരിലേക്ക് എത്തിപ്പെടാതെ പാഴാക്കികളയുകയാണ് പല തദ്ദേശസ്വയംഭരണ സ്ഥാപനങ്ങളും. പട്ടികജാതി-ആദിവാസി വികസനം ലക്ഷ്യമിട്ട് നിരവധി പദ്ധതികള് ആവിഷ്കരിക്കുമ്പോള് ഇത് തകിടം മറിക്കാന് ചില ഉദ്യോഗസ്ഥര് ശ്രമിക്കുന്നതായും പ്രമോട്ടര്മാരെ ഉടന് നിയമിക്കണം അവരുടെ ഓണറേറിയം വര്ദ്ധിപ്പിക്കാന് സര്ക്കാര് തയ്യാറാകണമെന്നും ആദിദ്രാവിഡ സാംസ്കാരിക സഭ മദ്ധ്യമേഖല സെക്രട്ടറി കെ. സോമന് ആവശ്യപ്പെട്ടു.
