കണ്ണൂര്: കൈകളോ വിരലോ മുറിഞ്ഞു വീണെന്നു കരുതി ഒഴിവാക്കരുതെന്നും വിരലുകള്ക്കുണ്ടാകുന്ന അപകടങ്ങളില് 80 ശതമാനവും തുന്നിച്ചേര്ക്കാമെന്നും ചെന്നൈ അപ്പോളോ ആശുപത്രി ഹാന്ഡ് കെയര് വിഭാഗത്തിലെ പ്ലാസ്റ്റിക്, ഹാന്ഡ് ആന്ഡ് മൈക്രോ വാസ്കുലാര് സര്ജന് ഡോ.ശബരി ഗിരീഷ് അമ്പാട്ട്. റോഡിലും വ്യാവസായിക കേന്ദ്രങ്ങളിലും മാത്രമല്ല വീട്ടകങ്ങളിലെ അപകടങ്ങളും കൈക്ക് പരിക്കേല്ക്കാനുള്ള സാധ്യത വര്ധിപ്പിക്കുകയാണെന്ന് ഡോ.ശബരി ഗിരീഷ് അമ്പാട്ട് കണ്ണൂരില് വാര്ത്താസമ്മേളനത്തില് പറഞ്ഞു.
പൊള്ളലേല്ക്കലും െ്രെഗന്ഡറില് പെട്ടുപോകലുമൊക്കെയാണ് വീട്ടകങ്ങളില് കൈകള്ക്ക് പരിക്കേല്പിക്കാന് സാധ്യതയുള്ള അപകടങ്ങള്. ആദ്യ കുറച്ച് മണിക്കൂറുകള് അപകടത്തിനുശേഷം ഏറെ പ്രധാനപ്പെട്ടതാണ്. പരിക്കേറ്റയാളെ എത്രവേഗത്തില് ആശുപത്രിയിലെത്തിക്കുന്നു എന്നതിലാണ് കൈകളുടെ ചികിത്സയിലെ വിജയം ആശ്രയിച്ചിരിക്കുന്നത്. പേശികള് ഉള്ള സ്ഥലമാണെങ്കില് ആറു മുതല് എട്ടു മണിക്കൂര് വരെ സമയത്തിനുള്ളില് കൂട്ടി യോജിപ്പിക്കാം. വിരലുകള് 12 മണിക്കൂര് വരെ വൈകിയാലും കൂട്ടിയോജിപ്പിക്കാന് കഴിഞ്ഞിട്ടുണ്ടെന്നും അദ്ദേഹം പറഞ്ഞു. ചെന്നൈ അപ്പോളോ മെഡ് ആശുപത്രയിയില് റീ കണ്സ്ട്രക്ടീവ് ഹാന്ഡ് സര്ജറി, മൈക്രോസര്ജറി ആന്ഡ് പ്ലാസ്റ്റിക് സര്ജറി എന്നിവക്കുള്ള ദേശീയ ഇന്സ്റ്റിറ്റിയൂട്ട് രൂപവത്കരിച്ചിട്ടുണ്ട്. കൈകളുടെ എല്ലാ തരത്തിലുള്ള പരിചരണവും ഇവിടെ ലഭ്യമാണെന്നും ഡോക്ടര് കൂട്ടിച്ചേര്ത്തു. കൈകള്ക്ക് അപകടം സംഭവിച്ചാല് പരിക്കേറ്റ ഭാഗം ഉടന് തന്നെ അണുവിമുക്തമായ വെള്ളമുപയോഗിച്ച് വൃത്തിയാക്കണം. പിന്നീട് അണുവിമുക്തമാക്കപ്പെട്ട നേര്ത്ത തുണി കൊണ്ട് പൊതിയണം. യാതൊരു കാരണവശാലും മുറിവിലേക്ക് പഞ്ഞി നേരിട്ട് ഉപയോഗിക്കരുത്. പഞ്ഞിയിലെ തരികള് മുറിവില് ഒട്ടിപ്പിടിച്ചാല് പിന്നീട് മുറിവ് ഉണങ്ങുന്നതിനെ അത് സാരമായി ബാധിക്കും.
ഞരമ്പുകള് മുറിഞ്ഞാല് അധിക രക്തസ്രാവവുണ്ടാകും. അതു കുറയുന്നതിന് കൈകള് തലക്കു മുകളില് ഉയര്ത്തിപ്പിടിക്കണം. കംപ്രഷന് ബാന്ഡേജ് ഉപയോഗിക്കുന്നതാണ് മറ്റൊരു എളുപ്പവഴി. പൊള്ളലുകള് ഉണ്ടായാല് പരിക്കില് തണുത്ത വെള്ളമൊഴിക്കലാണ് പ്രഥമ ശുശ്രൂഷ.
ആയുധങ്ങള് കൊണ്ട് വിരലുകളോ മറ്റോ അറ്റുപാേവുകയാണെങ്കില് ഉടനെ അറ്റുപോയ ഭാഗമെടുത്ത് വൃത്തിയാക്കി പോളിത്തീന് കവറില് ഇട്ട് അടക്കുക. ഈ കവര് ഐസ് നിറഞ്ഞ പെട്ടിയിലോ ഫ്രീസറിലോ സൂക്ഷിച്ച് ഉടന് ആശുപത്രിയിലെത്തിക്കണം. അറ്റുപോയ ഭാഗത്ത് നേരിട്ട് ഐസ് തൊടരുതെന്നും അദ്ദേഹം പറഞ്ഞു.
