ബെംഗളൂരു: ഹിന്ദുസ്ഥാൻ പെട്രോളിയം കോർപ്പറേഷൻ ലിമിറ്റഡുമായി (എച്ച്പിസിഎൽ) സഹകരിച്ച് ക്വിക്ക് കൊമേഴ്സ് പ്ലാറ്റ്ഫോമായ ഇൻസ്റ്റാമാർട്ട്, രാജ്യത്തെ ആദ്യത്തെ ഓൺ-ഡിമാൻഡ് എൽപിജി സിലിണ്ടർ ഡെലിവറി സേവനം ആരംഭിച്ചതായി റിപ്പോർട്ട്.
ഇൻസ്റ്റാമാർട്ട് ആപ്പ് വഴി ഉപഭോക്താക്കൾക്ക് നേരിട്ട് എൽപിജി സിലിണ്ടറുകൾ ഓർഡർ ചെയ്യാനും വീട്ടുപടിക്കൽ ലഭ്യമാക്കാനും സാധിക്കുന്നതാണ് പുതിയ സേവനം.
നിലവിൽ ബെംഗളൂരുവിൽ പരീക്ഷണാടിസ്ഥാനത്തിലാണ് സേവനം ആരംഭിച്ചിരിക്കുന്നത്. നഗരത്തിലെ സുബ്രഹ്മണ്യപുര മേഖലയിലാണ് ജൂലൈ 15ന് പൈലറ്റ് പദ്ധതി ആരംഭിച്ചതെന്ന് ദി ഇക്കണോമിക് ടൈംസും ഡെക്കാൻ ഹെറാൾഡും റിപ്പോർട്ട് ചെയ്തു.
പദ്ധതിയുടെ ഭാഗമായി എച്ച്പിസിഎല്ലിന്റെ 5 കിലോഗ്രാം മെറ്റൽ എൽപിജി സിലിണ്ടറിനൊപ്പം പുതുതായി പുറത്തിറക്കിയ 10 കിലോഗ്രാം കോമ്പോസിറ്റ് എൽപിജി സിലിണ്ടറായ ‘എച്ച്പി നവ്യ’യും ഉപഭോക്താക്കൾക്ക് ഇൻസ്റ്റാമാർട്ട് വഴി ബുക്ക് ചെയ്യാം.
എൽപിജി സിലിണ്ടർ വിതരണത്തിൽ കൂടുതൽ വേഗതയും സൗകര്യവും ഉറപ്പാക്കുകയാണ് പുതിയ സേവനത്തിലൂടെ ലക്ഷ്യമിടുന്നതെന്നാണ് റിപ്പോർട്ടുകൾ സൂചിപ്പിക്കുന്നത്.
