തിരുവനന്തപുരം: സംസ്ഥാനത്തെ ലക്ഷക്കണക്കിന് വിദ്യാർത്ഥികൾ ഉറ്റുനോക്കുന്ന ഹയർ സെക്കൻഡറി ഒന്നാം വർഷ (പ്ലസ് വൺ) പൊതുപരീക്ഷാ ഫലം ഈ മാസം വെള്ളിയാഴ്ച പുറത്തുവിടും. പരീക്ഷാ ഫലപ്രഖ്യാപനം രണ്ട് തവണ നീട്ടിവെച്ച ശേഷമാണ് ഇപ്പോൾ പുതിയ തീയതി നിശ്ചയിച്ചിരിക്കുന്നത്.നേരത്തെ ജൂൺ 10ന് ഫലം വരുമെന്ന് അറിയിച്ചിരുന്നെങ്കിലും പിന്നീട് അത് ജൂലൈ 15ലേക്ക് മാറ്റുകയും, സാങ്കേതിക കാരണങ്ങളാൽ വീണ്ടും ജൂലൈ 17ലേക്ക് നീട്ടുകയുമായിരുന്നു.
മാർച്ച് 5 മുതൽ 27 വരെയായിരുന്നു കേരളത്തിലും ഗൾഫ് മേഖലയിലുമായി പ്ലസ് വൺ പരീക്ഷകൾ ക്രമീകരിച്ചിരുന്നത്. എന്നാൽ പശ്ചിമേഷ്യൻ രാജ്യങ്ങളിലുണ്ടായ യുദ്ധസമാനമായ സാഹചര്യത്തെ തുടർന്ന് ഗൾഫ് കേന്ദ്രങ്ങളിലെ പരീക്ഷകൾ നിശ്ചിത സമയത്ത് പൂർത്തിയാക്കാൻ സാധിച്ചിരുന്നില്ല. തുടർന്ന് ഈ മേഖലകളിൽ പ്രത്യേകമായി നടത്തിയ പരീക്ഷകളുടെ ഉത്തരക്കടലാസ് മൂല്യനിർണ്ണയം കൂടി പൂർത്തിയാക്കി, ഒപ്പമുള്ള ഫലപ്രഖ്യാപനം ഉറപ്പാക്കാനാണ് തീയതി നീട്ടിയതെന്ന് പരീക്ഷാ വിഭാഗം നേരത്തെ വ്യക്തമാക്കിയിരുന്നു.
പരീക്ഷാഫലം ലഭ്യമാകുന്ന മുറയ്‌ക്ക് വെബ്‌സൈറ്റുകളിലും മൊബൈൽ ആപ്ലിക്കേഷനുകളിലും ഫലം ലഭ്യമാകും. വെബ്സൈറ്റുകൾ:nammudekeralam.kerala.gov.in, www.re sults.hse.k erala.gov.in, www.p rd.kerala.gov.in, results.ke rala.gov.in, results.digilocker.gov.in, www.results.kit e.kerala.gov.in, examresu lts.kerala.gov.in. മൊബൈൽ ആപ്പുകൾ: SAPHALAM 2026, iExaMS-Kerala
പരീക്ഷാഫലം അറിയുന്നതിനായി വിദ്യാർത്ഥികൾ തങ്ങളുടെ രജിസ്റ്റർ നമ്പറും ജനനത്തീയതിയും കൈവശം കരുതേണ്ടതാണ്. വ്യക്തിഗത ഫലങ്ങൾക്ക് പുറമെ അതത് സ്കൂളുകൾക്ക് തങ്ങളുടെ സ്കൂൾ കോഡ് ഉപയോഗിച്ച് ലോഗിൻ ചെയ്ത് ഗ്രേഡ് വിവരങ്ങൾ ഒന്നിച്ച് പരിശോധിക്കാനുള്ള സൗകര്യവും പോർട്ടലുകളിൽ ഉണ്ടായിരിക്കും.
