കഴക്കൂട്ടം : ടെക്നോപാര്ക്കിലെ ഐടി ജീവനക്കാരുടെ കുട്ടികള്ക്കായി പ്രതിധ്വനിയുടെ ആഭിമുഖ്യത്തില് നടത്തുന്ന മലയാളം പള്ളിക്കൂടത്തിന്റെ പ്രവര്ത്തനം ആരംഭിച്ചു. ആദ്യദിനം 60 കുട്ടികളാണ് പള്ളിക്കൂടത്തിലേയ്ക്ക് എത്തിച്ചേര്ന്നത്. ടെക്നോപാര്ക്കിലെ ക്ലബ് ഹൗസില് കവി മധുസൂദനന് നായരുടെ അദ്ധ്യക്ഷതയില് സംവിധായകന് അടൂര്ഗോപാലകൃഷ്ണന് നിലവിളക്ക് കൊളുത്തി ഉദ്ഘാടനം ചെയ്തു. ഡോ.അച്യുത്ശങ്കര്, ഐടി സെക്രട്ടറി എം.ശിവശങ്കര്, മേയര് വി.കെ.പ്രശാന്ത്, പത്രപ്രവര്ത്തക യൂണിയന് ജില്ലാ പ്രസിഡന്റ് സുരേഷ് വെള്ളിമംഗലം, വട്ടപ്പറമ്പില് പീതാംബരന്, ആര്ട്ടിസ്റ്റ് നാരായണഭട്ടതിരി, മലയാളം പള്ളിക്കൂടം കാര്യദര്ശി ജെസ്സി നാരായണന്, പ്രതിധ്വനി സെക്രട്ടറി രാജീവ്കൃഷ്ണന്, പ്രതിധ്വനി എക്സിക്യൂട്ടീവ് അംഗം മീര എം.എസ്., സതീഷ്കുമാര് തുടങ്ങിയവര് പങ്കെടുത്തു.
ടെക്നോപാര്ക്ക് ജീവനക്കാര് കുടുംബ സമേതമാണ് ചടങ്ങിനെത്തിയത്. തേങ്ങാപ്പൂളും മധുരമായി കല്ക്കണ്ടവും നല്കി, പ്ലാവിലത്തൊപ്പി അണിയിച്ചാണ് കുട്ടികളെ പ്രതിധ്വനിയുടെ നേതൃത്വത്തില് എതിരേറ്റത്. കുട്ടികള്ക്കെല്ലാം സ്ളേറ്റും മഷിത്തണ്ടും ഒഎന്വി കുറുപ്പിന്റെ കയ്യൊപ്പോടു കൂടിയ അക്ഷര കലണ്ടറും സമ്മാനമായി നല്കി. വിശിഷ്ട വ്യക്തികള്ക്ക് വെറ്റിലയും വെള്ളിനാണയവും ഗുരുദക്ഷിണ നല്കിയ ശേഷമാണ് കുട്ടികള് പഠനം ആരംഭിച്ചത്. കാലിഗ്രാഫി ആര്ട്ടിസ്റ്റ് നാരായണ ഭട്ടതിരി കുട്ടികള്ക്ക് ചിത്രരചനയുടെ ആദ്യാക്ഷരങ്ങള് പകര്ന്നു നല്കി. നാട്ടുമൊഴികളും നാടന് പാട്ടുകളുമായി വിശിഷ്ടാതിഥികളും കുഞ്ഞുങ്ങള്ക്കൊപ്പം ചേര്ന്നു. കേരളത്തിന്റെ നാട്ടറിവുകളെ പരിചയപ്പെടുത്താന് നിരവധി നാടന് സസ്യങ്ങളും പരിപാടിയുടെ ഭാഗമായി ഒരുക്കിയിരുന്നു. എല്ലാ ശനിയാഴ്ചകളിലും രാവിലെ 10 മണി മുതല് ഉച്ചയ്ക്ക് 1 മണി വരെയാണ് ക്ലാസുകള് നടക്കുന്നത്.
