ന്യൂദല്‍ഹി: നമസ്‌തേ…പ്രതിരോധമന്ത്രി നിര്‍മല സീതാരാമന്‍ ചൈനീസ് സൈനികരെ അഭിവാദ്യം ചെയ്തു. എന്നിട്ട് അവരോടു ചോദിച്ചു, നമസ്‌തേയുടെ അര്‍ഥം അറിയുമോ? അറിയാമെന്ന് ഒരാള്‍. പരസ്പരം അഭിവാദ്യം ചെയ്യുമ്പോള്‍ ചൈനീസ് ഭാഷയില്‍ നി ഹാവോ എന്നാണു പറയുക എന്നും ചൈനീസ് സൈനികന്‍ പറഞ്ഞു.
സിക്കിമില്‍ നാഥു ലാ സന്ദര്‍ശിക്കുമ്പോഴാണ്, അതിര്‍ത്തിക്കരികില്‍ എത്തി പ്രതിരോധ മന്ത്രി ചൈനീസ് സൈനികരുമായി സംസാരിച്ചത്.
വാങ് എന്നു പരിചയപ്പെടുത്തിയ ചൈനീസ് സൈനികനാണ് ഇംഗ്ലീഷില്‍ നിര്‍മല സീതാരാമനുമായി സംസാരിച്ചത്. തന്റെ കമാന്‍ഡര്‍ അടക്കമുള്ളവരെ വാങ് പരിചയപ്പെടുത്തി. അപ്പോഴാണ് നമസ്‌തേ എന്നു അഭിവാദ്യം ചെയ്ത് അര്‍ഥമറിയുമോ എന്നു നിര്‍മല ചോദിച്ചത്.
ഇന്ത്യക്കാര്‍ അഭിവാദ്യം ചെയ്യുമ്പോള്‍ ഉപയോഗിക്കുന്ന വാക്കാണെന്ന് അറിയാം എന്ന് വാങ് പറഞ്ഞു. അവിടെയുണ്ടായിരുന്ന എല്ലാ ചൈനീസ് സൈനികരോടും നിര്‍മല നമസ്‌തേ പറഞ്ഞു. വാങ് എന്ന വാക്കിന്റെ അര്‍ഥം രാജാവ് എന്നാണെന്ന് ഈ ചൈനീസ് സൈനികന്‍ പറഞ്ഞപ്പോള്‍, താങ്കള്‍ പരിഭാഷയുടെ കാര്യത്തിലും രാജാവാണെന്ന് നിര്‍മല പറഞ്ഞത് സൈനികര്‍ക്കിടയില്‍ ചിരി പടര്‍ത്തി.
ഇരുരാജ്യങ്ങള്‍ക്കുമിടയില്‍ കുറച്ചു നാള്‍ മുമ്പു രൂപപ്പെട്ടിരുന്ന സംഘര്‍ഷത്തില്‍ കാര്യമായ അയവു വന്നു എന്നു തെളിയിക്കുന്നതാണ് നിര്‍മലയുടെ നാഥു ലാ സന്ദര്‍ശനം. ചൈനീസ് സൈനികരെ കൈയുയര്‍ത്തി അഭിവാദ്യം ചെയ്യുന്ന ചിത്രം ട്വിറ്ററില്‍ നേരത്തെ നിര്‍മല പോസ്റ്റ് ചെയ്തിരുന്നു. അതിനു പിന്നാലെയാണ് ചൈനീസ് സൈനികരോടു നമസ്‌തേ പറയുന്നതിന്റെ വീഡിയോ പ്രതിരോധ മന്ത്രിയുടെ ഓഫീസ് പോസ്റ്റ് ചെയ്തത്. മികച്ച പ്രതികരണമാണ് ആഗോള തലത്തില്‍ ഈ വീഡിയോയ്‌ക്കു ലഭിക്കുന്നത്. നാഥു ലായില്‍ ഇന്ത്യയുടെ സൈനികരുമായും ഇന്‍ഡോ- ടിബറ്റന്‍ പോലീസ് സേനാംഗങ്ങളുമായും നിര്‍മല ആശയവിനിമയം നടത്തി.
Snippet of Smt @nsitharaman interacting with Chinese soldiers at the border at Nathu-la in Sikkim yesterday. Namaste! pic.twitter.com/jmNCNFaGep
— रक्षा मंत्री कार्यालय/ RMO India (@DefenceMinIndia) October 8, 2017
