പാലാ: സര്ക്കാര് രേഖകളും ബില്ലുകളും മൂന്നുമാസത്തിനകം പൂര്ണ്ണമായി മലയാളത്തില് നല്കണമെന്നും അല്ലാത്തപക്ഷം കര്ശന നടപടി സ്വീകരിക്കുമെന്നും മുന്നറിയിപ്പോടുകൂടി 2016 ആഗസ്റ്റില് സര്ക്കാര് ഇറക്കിയ ഉത്തരവ് ഇതുവരെ നടപ്പിലായില്ലെന്ന് ആക്ഷേപം.
സപ്ലൈകോ സൂപ്പര്മാര്ക്കറ്റ്, മാവേലി സ്റ്റോര്, പീപ്പിള്സ് ബസാര് തുടങ്ങിയ സര്ക്കാര് സ്ഥാപനങ്ങള് മുഖേന വില്ക്കുന്ന ഭക്ഷ്യ-നിത്യോപയോഗ സാധനങ്ങളും മറ്റ് സബ്സിഡി സാധനങ്ങളും വാങ്ങുന്നവര്ക്ക് ഇംഗ്ലീഷിലാണ് ഇപ്പോഴും ബില്ലുകള് നല്കുന്നത്.
ബില്ലുകള് ഇംഗ്ളീഷിലായതിനാല് വായിക്കാനറിയാത്ത നിരക്ഷരായ സാധാരണക്കാര് സാധനങ്ങള് വാങ്ങുമ്പോള് സബ്സിഡി വിലകള് തിരിച്ചറിയാന് കഴിയാതെ തട്ടിപ്പിന് ഇരയാവുന്നുവെന്നാണ് ആരോപണം.
മലയാളത്തില് ബില്ലുകള് നല്കണമെന്നുള്ള സര്ക്കാര് ഉത്തരവ് ചൂണ്ടിക്കാണിച്ചപ്പോള് സര്ക്കാര് ഇങ്ങനെ പല ഉത്തരവുകളും ഇറക്കും, അതെല്ലാം ഉടനെ നടപ്പിലാക്കാന് പറ്റുന്ന കാര്യമല്ലെന്നാണ് അധകൃതരുടെ ഭാഷ്യം.
ഇംഗ്ലീഷിലുള്ള സോഫ്റ്റ്വെയര് മലയാളത്തിലേക്ക് പരിഭാഷപ്പെടുത്തിയെടുക്കുവാന് മൂന്നു മാസത്തെ സമയമാണ് സര്ക്കാര് ഉത്തരവില് പറഞ്ഞിരുന്നത്.
ഒരു വര്ഷമായിട്ടും ഉത്തരവ് നടപ്പിലാക്കാത്തതിനെതിരെ കര്ശന നടപടി സ്വീകരിക്കണമെന്നും ഓണം-ക്രിസ്തുമസ്-റംസാന് തുടങ്ങിയ വിശേഷദിവസങ്ങളില് സര്ക്കാര് അധികമായി നല്കുന്ന ഭക്ഷ്യസാധനങ്ങള് എല്ലാ കാര്ഡുടമകള്ക്കും ലഭിക്കുന്നതിനും സബ്സിഡി സാധനങ്ങളുടെ അളവും വിലയും കാണിക്കുന്ന ബോര്ഡ് പൊതുജനങ്ങള്ക്ക് കാണാവുന്ന വിധത്തില് പ്രദര്ശിപ്പിക്കുന്നതിനും ബില്ലുകള് മലയാളത്തില് നല്കുന്നതിനും ആവശ്യമായ മേല്നടപടികള് സ്വീകരിക്കണമെന്നും ആവശ്യപ്പെട്ട് പാലാ പൗരാവകാശ സമിതി മുഖ്യമന്ത്രിക്കും ഭക്ഷ്യ സിവില് സപ്ളൈസ് മന്ത്രിക്കും പരാതി അയച്ചു.
