നെല്ല് വില ഉയര്‍ത്തിയത് കേന്ദ്ര സര്‍ക്കാരെന്ന് തെറ്റിദ്ധരിപ്പിച്ച് കൃഷി മന്ത്രി

കൊച്ചി: നെല്ലിന്റെ സംഭരണ വില സര്‍ക്കാര്‍ വര്‍ദ്ധിപ്പിച്ചെന്ന പ്രഖ്യാപനത്തിലൂടെ കൃഷി മന്ത്രി വി.എസ്. സുനില്‍കുമാര്‍ നിയമസഭയെ തെറ്റിദ്ധരിപ്പിച്ചു. കാര്‍ഷിക വിലയിടിവില്‍ പ്രതിഷേധിച്ച് കെ.എം. മാണി അവതരിപ്പിച്ച അടിയന്തരപ്രമേയ നോട്ടീസിലാണ് ബുധനാഴ്ച മന്ത്രി മറുപടി നല്‍കിയത്.

മന്ത്രിയുടെ മറുപടിക്ക് ശേഷവും, സര്‍ക്കാര്‍ പൂര്‍ണ പരാജയമാണെന്നും യുപി ഉള്‍പ്പെടെയുള്ള സംസ്ഥാനങ്ങള്‍ കാര്‍ഷിക കടങ്ങള്‍ എഴുതി തള്ളുമ്പോള്‍ കേരളം അത് പരിഗണിക്കുന്നില്ലെന്നും ആരോപിച്ച് മാണി വിഭാഗം സഭയില്‍ നിന്ന് ഇറങ്ങി പോയിരുന്നു.

ഈ ബഹളങ്ങള്‍ക്കിടയില്‍ ഏത് വിഹിതമാണ് വര്‍ദ്ധിപ്പിച്ചതെന്ന് പരിശോധിക്കാന്‍ അംഗങ്ങളും മുതിര്‍ന്നില്ല. നെല്ലിന്റെ സംഭരണ വില 22.50 രൂപയില്‍ നിന്ന് 23.30 രൂപയായി വര്‍ദ്ധിപ്പിച്ച് ഈ സീസണ്‍ മുതല്‍ നല്‍കുമെന്നാണ് മന്ത്രി പറഞ്ഞത്. കിലോയ്‌ക്ക് 80 പൈസയുടെ വര്‍ദ്ധന.

എന്നാല്‍ യഥാര്‍ഥത്തില്‍ 80 പൈസയുടെ വര്‍ദ്ധന നല്‍കിയിരിക്കുന്നത് കേന്ദ്ര സര്‍ക്കാരാണ്. കഴിഞ്ഞ പുഞ്ചക്കൃഷി വരെ സപ്ലൈക്കോയുടെ സൈറ്റുകളിലെ വില വിവരപ്രകാരം 22.50 രൂപയാണ് ഒരു കിലോ നെല്ല് സംഭരിക്കുമ്പോള്‍ കര്‍ഷകന് നല്‍കിയിരുന്നത്.

ഇതില്‍ 14.70 രൂപ കേന്ദ്ര വിഹിതവും 7.80 രൂപ സംസ്ഥാന വിഹിതവുമായി കൃത്യമായി രേഖപ്പെടുത്തിയിട്ടുണ്ട്. ഈ വരുന്ന രണ്ടാം കൃഷി മുതല്‍ നെല്ല് വില വര്‍ദ്ധിപ്പിച്ച് കിലോയ്‌ക്ക് 23.30 രൂപയായി സൈറ്റില്‍ കാണിച്ചിട്ടുണ്ട്. എന്നാല്‍ ഇതിലും സംസ്ഥാന സര്‍ക്കാര്‍ വിഹിതത്തില്‍ മാറ്റമില്ല.

7.80 രൂപയായി തന്നെയാണ് രേഖപ്പെടുത്തിയിരിക്കുന്നത്. കേന്ദ്ര വിഹിതം 14.70 രൂപയില്‍ നിന്നും 15.50 രൂപയായി ഉയര്‍ത്തിയിട്ടുമുണ്ട്. സപ്ലൈക്കോയുടെ ഉന്നത ഉദ്യോഗസ്ഥരും ഇക്കാര്യം നിഷേധിക്കുന്നില്ല. ഇതിനിടയിലാണ് നിയമസഭയെ തെറ്റിദ്ധരിപ്പിച്ച് സംസ്ഥാന സര്‍ക്കാര്‍ വില വര്‍ദ്ധിപ്പിച്ചെന്ന രീതിയില്‍ മന്ത്രിയുടെ മറുപടി വന്നത്.

നേരത്തെയും നെല്‍ക്കര്‍ഷകരെ കബളിപ്പിക്കുന്ന പ്രഖ്യാപനങ്ങള്‍ മന്ത്രി നടത്തിയിരുന്നു. 2016 ജൂണ്‍ 14ന് കുട്ടനാട്ടിലെ കായല്‍ പാടശേഖരങ്ങള്‍ സന്ദര്‍ശിക്കവേ സംഭരിക്കുന്ന നെല്ലിന് 10 ദിവസത്തിനകം വില നല്‍കുമെന്ന് മന്ത്രി ഉറപ്പ് കൊടുത്തിരുന്നെങ്കിലും പാലിച്ചില്ല.

കഴിഞ്ഞ ബജറ്റ് പ്രസംഗത്തില്‍ ധനമന്ത്രി തോമസ് ഐസക്ക് നെല്ല് സംഭരിക്കാനായി 700 കോടി രൂപയാണ് പ്രഖ്യാപിച്ചത്. എന്നാല്‍ കര്‍ഷകര്‍ക്ക് ഒരു മാസത്തിനകം പോലും വില പൂര്‍ണമായും കൊടുത്ത് തീര്‍ക്കാന്‍ സര്‍ക്കാരിന് കഴിഞ്ഞിട്ടില്ല. കൃഷിനാശം ഉള്‍പ്പടെയുള്ള നഷ്ടപരിഹാരങ്ങളിലും മൂന്ന് വര്‍ഷത്തെ വരെയുള്ള കുടിശ്ശികയാണ് കര്‍ഷകര്‍ക്ക് കിട്ടാനുള്ളത്.

കൃഷി മന്ത്രിയുടെ വാക്കുകള്‍ക്ക് ചുവട് പിടിച്ച് മുഖ്യമന്ത്രി പിണറായി വിജയനും കര്‍ഷകന് ന്യായവില ലഭ്യമാകുമെന്ന മറുപടി നല്‍കി വിഷയം അവസാനിപ്പിക്കുകയായിരുന്നു.