തിരുവനന്തപുരം: അറഫ നൊയമ്പിന്റെ പേരില് കേരളത്തിലെ പൊതുവിദ്യാലയങ്ങളിലെ ഓണാഘോഷം അട്ടിമറിക്കാന് നീക്കം. ഓണപ്പരീക്ഷ ഒരുദിവസം മുന്നേ അവസാനിപ്പിച്ച് ആഗസ്റ്റ് 31ന് സ്കൂളുകളില് ഓണാഘോഷം സംഘടിപ്പിക്കാനായിരുന്നു വിദ്യാഭ്യാസവകുപ്പ് നല്കിയ നിര്ദ്ദേശം. സപ്തംബര് ഒന്നിന് ബക്രീദ് തീരുമാനിക്കപ്പെട്ടതോടെ 31 ലെ ഓണാഘോഷം വ്യാജപ്രചാരണങ്ങളിലൂടെ അട്ടിമറിക്കാനാണ് ഗൂഢനീക്കം. എന്നാല് ന്യൂനപക്ഷ വോട്ടുബാങ്ക് ലക്ഷ്യമിട്ടുള്ള ശ്രമം വിദ്യാഭ്യാസവകുപ്പ് കണ്ടില്ലെന്ന് നടിക്കുന്നു.
ഓണാവധി പ്രമാണിച്ച് 31 ന് വിദ്യാലയങ്ങള് അടയ്ക്കാനാണ് വിദ്യാഭ്യാസവകുപ്പ് നിര്ദ്ദേശിച്ചിരുന്നത്. അതിനാല് അന്ന് പൊതുവിദ്യാലയങ്ങളില് ഓണാഘോഷം സംഘടിപ്പിക്കാനും നിര്ദ്ദേശിച്ചു. സപ്തംബര് ഒന്നിന് ബക്രീദ് തീരുമാനിക്കപ്പെട്ടതോടെ ഈ നിര്ദ്ദേശം അട്ടിമറിക്കാന് ഒരുവിഭാഗം ഗൂഢനീക്കങ്ങളാരംഭിച്ചു. ബക്രീദിന്റെ തലേദിവസം അറഫ നൊയമ്പ് ആചരിക്കണമെന്നതിനാല് അന്നും അവധി വേണമെന്ന താത്പര്യമാണ് ഇതിനു പിന്നില്. അതിന്റെ ചുവടുപിടിച്ച് 31 ലെ ഓണാഘോഷം 25 ലേക്ക് മാറ്റിയെന്ന വ്യാജപ്രചാരണമാണ് നവസാമൂഹ്യമാധ്യമങ്ങളിലൂടെയും മറ്റും നടത്തിയത്. 25 ന് വിനായകചതുര്ഥി ദിവസമായതിനാല് കാസര്കോട് ജില്ലയിലും അത്തച്ചമയമായതിനാല് തൃപ്പൂണിത്തുറയിലെ വിദ്യാഭ്യാസസ്ഥാപനങ്ങള്ക്കും കളക്ടര്മാര് അവധി പ്രഖ്യാപിച്ചിട്ടുണ്ട്.
മാത്രമല്ല അന്ന് ഹൈസ്കൂള് ക്ലാസുകളില് പരീക്ഷയും നിശ്ചയിച്ചിട്ടുണ്ട്. ഈ വസ്തുതകള് കാറ്റില്പ്പറത്തിയാണ് ഒരുവിഭാഗം ഓണാഘോഷം അട്ടിമറിക്കാന് വ്യാജപ്രചാരണവുമായി രംഗത്തെത്തിയത്. മുമ്പ് ഇത്തരത്തില് ആശയക്കുഴപ്പങ്ങളുണ്ടാക്കാന് നീക്കം നടക്കുമ്പോള് വിദ്യാഭ്യാസവകുപ്പ് വ്യക്തതവരുത്തി ഉത്തരവിറക്കാറുണ്ടായിരുന്നു. ഇക്കുറി വിഷയം വിദ്യാഭ്യാസവകുപ്പ് മന്ത്രിയുടെ ശ്രദ്ധയില്പ്പെടുത്തിയെങ്കിലും അദ്ദേഹം അറിഞ്ഞമട്ടു കാണിച്ചിട്ടില്ല. വോട്ടുബാങ്ക് രാഷ്ട്രീയം മുന്നിര്ത്തി വിദ്യാഭ്യാസവകുപ്പില് നഗ്നമായ ന്യൂനപക്ഷപ്രീണനം അരങ്ങേറുകയാണെന്ന പരാതിക്ക് കൂടുതല് സാധുത നല്കിയിരിക്കുകയാണ് ഓണാഘോഷ അട്ടിമറി നീക്കം.
എന്ടിയു ശക്തമായി പ്രതിഷേധിച്ചു
തിരുവനന്തപുരം: കേരളത്തിലെ പൊതുവിദ്യാലയങ്ങളിലെ ഓണാഘോഷം അട്ടിമറിക്കാനുള്ള നീക്കത്തിനെതിരെ ശക്തമായ പ്രതിഷേധവുമായി ദേശീയ അധ്യാപകപരിഷത്ത്(എന്ടിയു). ഓണം കേരളത്തിന്റെ ആബാലവൃദ്ധം ജനങ്ങളുടെയും ഉത്സവമാണ്. ജാതിമത,വര്ഗ,വര്ണ ഭേദമില്ലാതെ മലയാളികളെല്ലാവരും ഓണം ആഘോഷിക്കാറുണ്ടെന്നും എന്ടിയു ചൂണ്ടിക്കാട്ടി. സമൂഹത്തില് മതസ്പര്ധ വളര്ത്തി പിഞ്ചുകുഞ്ഞുങ്ങളെ പോലും വിഭാഗീയതയുടെ ഇരകളാക്കാനുള്ള ശ്രമമാണ് ഇതിലൂടെ പുറത്തുവന്നിരിക്കുന്നത്. വിദ്യാഭ്യാസവകുപ്പ് ഇക്കാര്യത്തില് ഒളിച്ചുകളിക്കാതെ കൃത്യമായ നിലപാടെടുക്കണം. ഓണാഘോഷം അട്ടിമറിക്കാനുള്ള നീക്കം എന്തുവില കൊടുത്തും തടയുമെന്നും എന്ടിയു ജനറല് സെക്രട്ടറി പി.എസ്. ഗോപകുമാര് അറിയിച്ചു.
