ന്യൂദൽഹി: കശ്മീരിലെ എല്ലാ പ്രശ്നങ്ങൾക്കും 2022ഓട് കൂടി പരിഹാരം കാണുമെന്ന് കേന്ദ്ര ആഭ്യന്തരമന്ത്രി രാജ്നാഥ് സിങ്. കശ്മീരിനു പുറമെ രാജ്യത്തെ പ്രതിസന്ധിയിൽ നിർത്തുന്ന ഭീകരവാദം, നക്സലിസം, വടക്കു കിഴക്കൻ സംസ്ഥാനങ്ങളിലെ കലാപങ്ങൾ തുടങ്ങിയ പ്രശ്നങ്ങൾക്കെല്ലാം പരിഹാരം കാണാൻ കേന്ദ്രസർക്കാരിന് കഴിയുമെന്നും അദ്ദേഹം പറഞ്ഞു. ലക്നൗവിൽ നടന്ന ന്യൂ ഇന്ത്യ മൂവ്മെന്റ്(2017-2022) പരിപാടിയിൽ സംസാരിക്കുകയായിരുന്നു അദ്ദേഹം.
ഭീകരവാദം, നക്സലിസം, കശ്മീർ പ്രശ്നങ്ങളെല്ലാം രാജ്യത്തെ ഏറെ ബാധിക്കുന്നുണ്ട്. ഇവയെ പറ്റി കൂടുതൽ വിവരണം നൽകേണ്ടതിന്റെ ആവശ്യകതയില്ല, എന്നാൽ 2022ഓട് കൂടി ഈ പ്രശ്നങ്ങളെല്ലാം തുടച്ചു നീക്കാൻ കേന്ദ്ര സർക്കാരിനാകും, 2022ഓടു കൂടി ഒരു പുതിയ ഇന്ത്യയായിരിക്കും ജനങ്ങൾക്ക് മുന്നിലുണ്ടാകുക- രാജ്നാഥ് സിങ് പറഞ്ഞു.
രാജ്യത്തെ എല്ലാ വിധ ദുഷിപ്പുകളിൽ നിന്നും മുക്താമാക്കാൻ ജനങ്ങൾ ഒന്നായി പരിശ്രമിക്കണം. ഭീകരവാദം, മാലിന്യം, വർഗീയ സംഘർഷങ്ങൾ, ജാതി വർണ വിവേചനങ്ങൾ എന്നിവയെല്ലാം ഉന്മൂലനം ചെയ്യാൻ ജനങ്ങൾ പരിശ്രമിക്കണമെന്നും അദ്ദേഹം പറഞ്ഞു. ഒരു പുതിയ ഇന്ത്യയെ വാഗ്ദാനം ചെയ്ത പ്രധാനമന്ത്രിക്ക് നന്ദി സമർപ്പിക്കുന്നതായും രാജ്നാഥ് സിങ് കൂട്ടിച്ചേർത്തു.
