കോട്ടയം: കുറഞ്ഞ വിലയ്ക്ക് മരുന്നുകള് ലഭിക്കാന് കേന്ദ്രസര്ക്കാര് തുടങ്ങിയ ജന്ഔഷധി കേന്ദ്രങ്ങള് ജനകീയമാവുന്നു. മരുന്ന് വ്യാപാര മേഖലയിലെ കൊള്ള ഒഴിവാക്കാന് ജന് ഔഷധി കേന്ദ്രങ്ങളുടെ വരവോടെ കഴിഞ്ഞിട്ടുണ്ട്. വ്യക്തികളെ കൂടാതെ കുടുംബശ്രീ, സഹകരണബാങ്കുകള് എന്നിവയും ജന് ഔഷധി കേന്ദ്രങ്ങള് തുടങ്ങാന് മുന്നോട്ട് വന്നിട്ടുണ്ട്. വിലക്കുറവും ഗുണമേന്മയുമാണ്് ഇവയുടെ മുഖ്യ ആകര്ഷണം. മരുന്നുകള്ക്ക് 60 മുതല് 80 ശതമാനം വരെയാണ് വിലകിഴിവ്. ജില്ലയില് കോട്ടയം, ചങ്ങനാശേരി, ഗാന്ധിനഗര്, പാലാ മുരിക്കുമ്പുഴ, ചെത്തിമറ്റം, കടുത്തുരുത്തി, വൈക്കം, കാരിത്താസ്, പള്ളിക്കത്തോട്, പെരുവ, കൊല്ലപ്പള്ളി, കുറുപ്പന്തറ, രാമപുരം, കാഞ്ഞിരപ്പള്ളി, കങ്ങഴ, ചേര്പ്പുങ്കല്, കടപ്ലാമറ്റം, തെങ്ങണ,കിടങ്ങൂര്,പുതുപ്പള്ളി എന്നിവടങ്ങളില് ജന്ഔഷധി കേന്ദ്രങ്ങളുണ്ട്.
361 മരുന്നുകളാണ് ജന് ഔഷധി പദ്ധതിയില് ഉള്ക്കൊള്ളിച്ചിരിക്കുന്നത്. ബ്യൂറോ ഓഫ് ഫാര്മ പബ്ലിക് സെക്ടര് അണ്ടര് ടേക്കിംഗ് ഓഫ് ഇന്ത്യ (ബിപിപിഐ) അംഗീകാരത്തോടെ ഓരോ ജന് ഔഷധികളും പ്രവര്ത്തിക്കുന്നത്. ബ്രാന്ഡഡ് മരുന്നുകളേക്കാള് മൂന്ന് മുതല് പതിനാല് മടങ്ങുവരെ വിലക്കുറവ് ജന് ഔഷധി സ്റ്റോറുകളില് ലഭ്യമാണ്. അതേസമയം ബ്രാന്ഡ് നാമത്തിലുള്ള മരുന്നുകളുടെ അതേ ഗുണനിലവാരം ഇവയ്ക്കുണ്ടെന്നതാണ് ഇതിന്റെ പ്രത്യേകത. പ്രമേഹം, പ്രഷര്, കൊളസ്ട്രോള് തുടങ്ങിയ ജീവിതശൈലീ രോഗങ്ങള്ക്ക് ഉള്പ്പെടെയുള്ള മരുന്നുകള്, പാരസെറ്റോമോള് മുതല് വിവിധ തരം ആന്റിബയോട്ടിക്കുകള്, അസിഡിറ്റിക്ക് ഉപയോഗിക്കുന്ന പാന്റോട്രാസന്, ഒമിറ്റ്റോസോള്, റാനിട്രിസോള്, കൊളസ്ട്രോളിന് ഉപയോഗിക്കുന്ന ആറ്റ്റോവസ്റ്റാറ്റിന്, റോസോവസ്റ്റാറ്റിന്, രക്തസമ്മര്ദ്ദത്തിനുള്ള റ്റെലിമിസ്ട്രാ ഉള്പ്പെടെയുള്ള മരുന്നുകള് ഈ കേന്ദ്രങ്ങള്വഴി ലഭ്യമാണ്. പ്രമേഹരോഗ ചികിത്സയ്ക്കുള്ള മെറ്റ്ഫോര്മിന് ഹൈഡ്രോ ക്ലോറൈഡിന് ഒരു മില്ലീഗ്രാമിന്റെ പത്ത് എണ്ണത്തിന് ജന് ഔഷധിയില് 29 രൂപ 70 പൈസ വാങ്ങുമ്പോള് മറ്റ് മെഡിക്കല് സ്റ്റോറുകളില് 70 രൂപ മുതല് 80 രൂപ വരെ വാങ്ങുന്നുണ്ട്.
വേദനസംഹാരി ആസ്പിരിന് ഗുളിക 10 എണ്ണത്തിന് നാലു രൂപ 50 പൈസയാണ് വില. പുറത്ത് കടകളില് പത്തുരൂപയാണ് വില. പനിയ്ക്കുള്ള പാരസെറ്റാമോള് ഒരെണ്ണത്തിന് വെറും 45 പൈസയാണ് വില. കാന്സര് രോഗ ചികിത്സക്കായി ഉപയോഗിക്കുന്ന ഓക്സാലി പഌറ്റിന് 500 മില്ലി ഗ്രാമിന്റെ ഗുളികയ്ക്ക് 430 രൂപയാണ് വില. ഇവയ്ക്ക് മറ്റ് മെഡിക്കല് സ്റ്റോറുകളില് 900 രൂപ വരെയാണ്. കൊളസ്ട്രോള് ചികിത്സയ്ക്കുള്ള റോസു വസ്റ്റാലിന് 20 മില്ലിഗ്രാമിന് ഇരുപത്തിയേഴ് രൂപ 50 പൈസയാണ് വില.
സംസ്ഥാന സര്ക്കാറിന്റെ കീഴിലുള്ള ഡ്രഗ് കണ്ട്രോളറാണ് മരുന്നിന്റെ ഗുണ നിലവവാരം പരിശോധിക്കുന്നത്. നാഷണല് അക്രഡിറ്റേഷന് ബോര്ഡ് ഫോര് ലബോറട്ടറി (എന്എബിഎല്) പരിശോധിച്ചതിന് ശേഷമാണ് മരുന്നുകള് ജന് ഔഷധിയില് എത്തുന്നത്. അതുകൊണ്ട് തന്നെ ഗുണനിലവാരവും മെച്ചപ്പെട്ടതായിരിക്കുമെന്ന് ഡ്രഗ് കണ്ട്രോളിംഗ് വിഭാഗം അധികൃതര് പറഞ്ഞു.
