ചെറുതുരുത്തി: കേരള കലാമണ്ഡലം കല്പിത സര്വകലാശാലയിലെ കൂടിയാട്ടം, മിഴാവ് വിഭാഗങ്ങളുടെ ആഭിമുഖ്യത്തില് നടന്നുവരുന്ന രാമായണമാസാചരണം, കൂടിയാട്ടഗുരു പൈങ്കുളം രാമച്ചാക്യാര് അനുസ്മരണം എന്നിവയക്ക് സമാപനമായി.
ഇന്നലെ പൈങ്കുളം രാമച്ചാക്യാര് അനുസ്മരണ ദിനത്തില് കൂത്തമ്പലത്തില് രാമച്ചക്യാരുടെ ശിഷ്യന്മാരും, പ്രശിഷ്യന്മാരും പുഷ്പാര്ച്ചന നടത്തി. തുടര്ന്ന് മിഴാവ് വിഭാഗം അദ്ധ്യക്ഷന് കലാമണ്ഡലം അച്യുതാനന്ദന് ചിട്ടപ്പെടുത്തിയ മിഴാവില് പഞ്ചാരിമേളവും, നങ്ങ്യാര്കൂത്തും അവതരിപ്പിച്ചു.
വൈകീട്ട് നടന്ന അനുസ്മരണ സമ്മേളനത്തില് കലാമണ്ഡലം ഭരണസമിതിയംഗം ഡോ.എന്.ആര്. ഗ്രാമപ്രകാശ് അദ്ധ്യക്ഷത വഹിച്ചു. അക്കാദമിക് ഡയറക്ടര് ഡോ.സി.എം.നീലകണ്ഠന് ആമുഖ ഭാഷണം നടത്തി. നവതി ആഘോഷിച്ച കൂടിയാട്ട ഗുരു പി.കെ.നാരായണന് നമ്പ്യാരെ രജിസ്ട്രാര് ഡോ.കെ.കെ. സുന്ദരേശന് ആദരിച്ചു. ഭരണസമിതിയംഗം ടി.കെ. വാസു, പി.കെ.നാരായണന് നമ്പ്യാര്ക്ക് ഉപഹാരം സമര്പ്പിച്ചു. കലാമണ്ഡലം കനകകുമാര്, കലാമണ്ഡലം സംഗീത്, കലാമണ്ഡലം കൃഷ്ണേന്ദു തുടങ്ങിയവര് പങ്കെടുത്ത നിണത്തോടു കൂടിയ ശൂര്പ്പണഖാങ്കം കൂടിയാട്ടവും അരങ്ങേറി.
