ഞീഴൂര്: ലക്ഷംവീട് കോളനി പുനരുദ്ധാരണം പ്രവര്ത്തനങ്ങള് മന്ദഗതിയില്.ഇതോടെ ഇരുപത്തിയേഴോളം കുടംബങ്ങള് ദുരിതത്തിലായി. ഞീഴൂര് തിരുവമ്പാടി ലക്ഷം വീട് കോളനിയിലാണ് നവീകരണത്തിന്റെ ഭാഗമായി വീടുകളുടെ നിര്മ്മാണം ആരംഭിച്ചത്.
ഇതിനായി തദ്ദേശസ്വയംഭരണ സ്ഥാപനങ്ങളില് നിന്ന് ലക്ഷക്കണക്കിന് രൂപ അനുവദിച്ചിരുന്നു. ഇവിടെ താമസക്കാരായിരുന്നവരുടെ വീടുകള് പൊളിച്ച് മാറ്റി പുതിയ വീടിന്റെ നിര്മ്മാണ പ്രവര്ത്തനങ്ങള് ആരംഭിച്ചെങ്കിലും നിശ്ചയിച്ച സമയം കഴിഞ്ഞിട്ടും വീടുകളുടെ നിര്മ്മാണം പൂര്ത്തീകരിക്കാന് കഴിയാതെ വന്നിരിക്കുകയാണ്. മഴക്കാലത്തിന് മുമ്പ് നിര്മ്മാണം പൂര്ത്തീകരിക്കുമെന്നാണ് ഇവിടുത്തെ കുടുംബങ്ങളോട് അധികൃതര് പറഞ്ഞിരുന്നത്. ഇരുപത്തിയേഴോളം വരുന്ന കുടുംബങ്ങള് മഴക്കാലത്തും മറ്റിടങ്ങളില് അഭയം പ്രാപിച്ചിരിക്കുകയാണ്.
വീടുകളുടെ ഭിത്തി നിര്മ്മാണം പൂര്ത്തീകരിച്ചെങ്കിലും ഷീറ്റ് ഇടാന് കഴിഞ്ഞിട്ടില്ല. ഇതോടെ കോളനി നിവാസികള് പ്രതിസന്ധിയിലായിരിക്കുകയാണ്.
