പുരുഷാധിപത്യത്തെ ചോദ്യം ചെയ്യുന്ന സ്ത്രീകള്‍ക്ക് ബേബിയുടെ അഭിവാദ്യം

തിരുവനന്തപുരം: പുരുഷന്മാർ പറയും സ്ത്രീകൾ അനുസരിക്കുമെന്ന കാലം കഴിഞ്ഞുവെന്ന് സിപിഎം പോളിറ്റ് ബ്യൂറോ അംഗം എം.എ. ബേബി. സിനിമയിലെ പഴയ തലമുറ ഈ മാറ്റം കാണണം. സിനിമാ രംഗത്തെ വനിതകൾ രൂപീകരിച്ച വിമൻ ഇൻ സിനിമ കളക്ടീവ് വിപ്ലവകരമായ ആശയമാണ്. പുരുഷാധിപത്യത്തെ ചോദ്യം ചെയ്യുന്ന സ്ത്രീകൾക്ക് അഭിവാദ്യമെന്നും എം.എ.ബേബി ഫേസ്‌ബുക്കിൽ കുറിച്ചു.

സിനിമയില്‍ മാത്രമല്ല കേരള സമൂഹത്തിലാകെ ദീര്‍ഘകാലത്തേക്കുള്ള മാറ്റം വരുത്തുന്നതാണ് ഈ സംഭവവികാസങ്ങളെന്നും അദ്ദേഹം പറഞ്ഞു. സിനിമയിലുള്ളവര്‍ക്ക് സമൂഹത്തിലുള്ള സ്വാധീനം വളരെ വലുതാണ്. യുവനടി തനിക്ക് നേരെയുണ്ടായ ആക്രമണത്തെക്കുറിച്ച്‌ പരാതിപ്പെടാനുള്ള ധീരത കാണിച്ചു. പലപ്പോഴും ഇത്തരം കാര്യങ്ങള്‍ മൂടി വയ്‌ക്കപ്പെടാറാണുള്ളതെന്നും ബേബി തന്റെ ഫേസ്‌ബുക്ക് പേജില്‍ പറയുന്നു.