ആലപ്പുഴ: സര്ക്കാര് പ്രഖ്യാപിച്ച പദ്ധതികള് പ്രയോജനപ്പെടുന്നില്ല, കയര് മേഖലയില് വീണ്ടും സമര നാളുകള്. ഇടനിലക്കാരായ ഡിപ്പോക്കാരുടെ ചൂഷണം തടയണമെന്ന് ആവശ്യപ്പെട്ട് ചെറുകിട കയര് ഫാക്ടറി ഉടമ സംഘടന സംയുക്ത സമരസമിതി പ്രത്യക്ഷ സമരത്തിലേക്ക്.
കഴിഞ്ഞ ഇടതുസര്ക്കാരിന്റെ കാലത്ത് മന്ത്രി ജി. സുധാകരന് കയര്വകുപ്പിന്റെ ചുമതല വഹിച്ചിരുന്നപ്പോള് ഡിപ്പോ സമ്പ്രദായം ഇല്ലാതാക്കിയിരുന്നു. ഇപ്പോള് വീണ്ടും ഡിപ്പോക്കാരുടെ ചൂഷണം തുടങ്ങിയതായി സമരസമിതി ഭാരവാഹികള് പറഞ്ഞു. വന്കിട കയര് കയറ്റുമതിക്കാര് ഡിപ്പോക്കാരെ സഹായിക്കുകയാണ്. സര്ക്കാരിന് ഇവരെ നിയന്ത്രിക്കാന് കഴിയുന്നില്ല. അതിനാലാണ് സമരമെന്നും അവര് വ്യക്തമാക്കി.
കയര് കോര്പ്പറേഷനില് കയര് ഉത്പന്നങ്ങള് കെട്ടിക്കിടക്കുകയാണ്. നാല്പ്പത് കോടിയുടെ ഉത്പന്നങ്ങളാണ് കെട്ടിക്കിടന്ന് നശിക്കുന്നത്. എന്നാല് ഇവിടെ നിന്ന് ഉത്പന്നങ്ങള് വാങ്ങുന്നതിന് പകരം സ്വകാര്യ കയറ്റുമതി സ്ഥാപനങ്ങള് ഡിപ്പോക്കാരില് നിന്നാണ് ഉത്പന്നങ്ങള് വാങ്ങുന്നത്.
ചെറുകിട ഫാക്ടറികള് 40 ശതമാനം വരെ വിലകുറച്ച് ഉത്പന്നങ്ങള് നല്കേണ്ട ഗതികേടിലാണ്. വിഎസ് സര്ക്കാരിന്റെ കാലത്ത് ഡിപ്പോ സമ്പ്രദായത്തിന് വിലക്കേര്പ്പെടുത്തി പകരം കയര് സഹകരണ സംഘങ്ങള് രൂപീകരിച്ചിരുന്നു. ഇപ്പോള് സഹകരണ സംഘങ്ങള് കടുത്ത പ്രതിസന്ധിയിലാണ്.
ചെറുകിട കയര്ഫാക്ടറി ഉടമകളുടെ സമരപ്രഖ്യാപന കണ്വന്ഷന് 22ന് നടക്കും. പ്രതിസന്ധിയിലേക്ക് കൂപ്പുകുത്തിയ കയര് മേഖലയെ രക്ഷിക്കാന് സര്ക്കാര് ആവിഷ്ക്കരിച്ച പദ്ധതികള് ഫലപ്രദമാകുന്നില്ലെന്നതിന് തെളിവാണ് ഇപ്പോഴത്തെ പ്രശ്നങ്ങള്. കയര് മന്ത്രി തോമസ് ഐസക്കിന്റെ നിര്ദേശ പ്രകാരം മേഖലയിലെ പ്രശ്നങ്ങള്ക്ക് പരിഹാരം കാണുന്നതിനായി കയര് വികസന വകുപ്പ് സര്വേ നടത്തിയിരുന്നു.
ഇതില് നിന്നു ലഭിക്കുന്ന പരിഹാരമാര്ഗങ്ങള് ചര്ച്ച ചെയ്തു പുതിയ കയര് നയം രൂപീകരിക്കുമെന്ന് മന്ത്രി പ്രഖ്യാപിച്ചെങ്കിലും യാഥാര്ത്ഥ്യമായില്ല. തമിഴ്നാടിന്റെ കടന്നു കയറ്റം സംസ്ഥാനത്തെ കയര്പിരിമേഖലയെ ഏറെ നാളായി സാരമായി ബാധിക്കുന്നുണ്ട്. നിലവില് കയറ്റുമതിക്കാര് കേരളത്തിലെ പരമ്പരാഗത തൊഴിലാളികള് ഉല്പ്പാദിപ്പിക്കുന്ന കയര് വാങ്ങാതായതാണ് പ്രതിസന്ധിക്ക് കാരണം.
