റോം: ലോക ഫുട്ബോളിലെ ഏറ്റവും മികച്ച പരിശീലകരില് ഒരാളായ പെപ്പ് ഗ്വാര്ഡിയോള ഇറ്റലി ദേശീയ ഫുട്ബോള് ടീം പരിശീലകനാകില്ല. ലോകകപ്പിന് പിന്നാലെ ഇറ്റാലിയന് ഫുട്ബോള് ഫെഡറേഷന്(എഫ്ഐജിസി) പുതിയ കോച്ചിനായുള്ള ശ്രമങ്ങള് നടത്തിക്കൊണ്ടിരിക്കുകയാണ്.
ലോക ഫുട്ബോള് ആരാധകര്ക്കിടയില് വലിയൊരു ഫാന് ബേസ് ഉള്ള ടീമാണ് അസൂറികള് എന്ന് വിളിക്കപ്പെടുന്ന ഇറ്റാലിയന് ഫു്ടബോള് ടീം. തുടര്ച്ചയായ മൂന്ന് ലോകകപ്പുകളില് യോഗ്യത നേടാനാകാതെ വലിയ പ്രതിസന്ധിയാണ് ടീം അന്താരാഷ്ട്ര ഫുട്ബോളില് നേരിട്ടുകൊണ്ടിരിക്കുന്നത്. പുതിയ കോച്ചിനായി ഇറ്റാലിയന് ഫുട്ബോള് ഫെഡറേഷന് ആദ്യം തിരഞ്ഞത് പെപ്പ് ഗ്വാര്ഡിയോളയുടെ സാധ്യതയാണ്. ഇപ്പോള് തനിക്ക് യാതൊരു ചുമതലകളും ഏറ്റെടുക്കാനാവില്ലെന്ന് ഗ്വാര്ഡിയോള വ്യക്തമാക്കി.
ഇത്രയും കാലം വലിയ തിരക്കുകളിലായിരുന്നു. ഇനി കുറച്ചൊന്ന് വിശ്രമിക്കണം. കുടംബത്തോടൊപ്പം പരമാവധി സമയം ചിലവഴിക്കാനും യാത്രകള് ചെയ്യാനുമാണ് ആഗ്രഹിക്കുന്നതെന്ന് ഗ്വാര്ഡിയോള വ്യക്തമാക്കി. ഇക്കഴിഞ്ഞ സീസണ് പൂര്ത്തിയാക്കിയ ശേഷമാണ് പെപ്പ് മാഞ്ചസ്റ്റര് സിറ്റിയുടെ പരിശീലക ചുമതലയില് നിന്നൊഴിഞ്ഞത്. തുടര്ച്ചയായി പത്ത് വര്ഷമാണ് സിറ്റിയുടെ ചുമതല വഹിച്ചത്. ചാമ്പ്യന്സ് ലീഗ് അടക്കം 30ലേറെ കിരീടങ്ങള് പെപ്പ് ഈ കാലയളവില് നേടിക്കൊടുത്തു.
