കോട്ടയം: കേരളത്തിലെ അസംഘടിത മേഖലയിലെ ലക്ഷക്കണക്കിന് തൊഴിലാളികളുടെ ആശ്രയമായ ക്ഷേമനിധി ബോര്ഡുകളുടെ പ്രവര്ത്തനം കാര്യക്ഷമമാക്കാന് എല്ഡിഎഫ് സര്ക്കാര് യാതൊന്നും ചെയ്യുന്നില്ലെന്ന് കേരള കോണ്ഗ്രസ് ചെയര്മാന് പി.സി.തോമസ്. കെടിയുസി സംസ്ഥാന പ്രവര്ത്തകയോഗം ഉദ്ഘാടനം ചെയ്യുകയായിരുന്നു അദ്ദേഹം.
ക്ഷേമനിധി ബോര്ഡുകളില് കോടികളുടെ വരുമാനമുണ്ടായിട്ടും ഉദ്യോഗസ്ഥരെ നിയമിക്കുന്നതിനോ ബോര്ഡ് പുനഃസംഘടിപ്പിച്ച് ചെയര്മാന്മാരെ നിയമിക്കുന്നതിനോ എല്ഡിഎഫിലെ തമ്മിലടിമൂലം ഇന്നേവരെ കഴിഞ്ഞിട്ടില്ല. പുതിയ അംഗങ്ങളെ ചേര്ക്കാനുള്ള രജിസ്ട്രേഷന് നടപടിയും ഈ സര്ക്കാര് വന്നതിനുശേഷം നടത്താത്തത് തൊഴിലാളികളോട് ചെയ്യുന്ന കൊടുംവഞ്ചനയാണ്. നിലവിലുള്ള എല്ലാ ക്ഷേമനിധി ബോര്ഡുകളിലെയും ആനുകൂല്യങ്ങള് തുല്യമാക്കണമെന്നും മിനിമം പെന്ഷന് 5,000 രൂപയായി വര്ദ്ധിപ്പിക്കണമെന്നും അദ്ദേഹം സംസ്ഥാന സര്ക്കാരിനോട് ആവശ്യപ്പെട്ടു.
സംസ്ഥാന വര്ക്കിങ് പ്രസിഡന്റ് കെ.ജെ. ജോസഫ് കോടിക്കുളം അദ്ധ്യക്ഷത വഹിച്ചു. സ്റ്റീഫന് ചാഴിക്കാടന്, ജോസ് പന്തപ്പള്ളി, സജി ചമ്പേട്ട്, സാബു പേക്കാവില്, മാത്തുക്കുട്ടി മുക്കാട്ട്, പ്രസന്നകുമാര്, ടി.ഡി. ഡേവിഡ്, തൈക്കാട്ട് കൃഷ്ണന്കുട്ടി, ജയിംസ് കുന്നപ്പിള്ളി, ജോയിച്ചന് പീലിയാനിക്കല് എന്നിവര് പ്രസംഗിച്ചു.
