പോണ്ടിച്ചേരി: സീനിയര് വനിതകള്ക്കായുള്ള സീചെം ട്രോഫിയില് തുടര്ച്ചയായ മൂന്നാം വിജയവുമായി കേരളം. ഹിമാചല്പ്രദേശിനെ 14 റണ്സിനാണ് കേരളം തോല്പ്പിച്ചത്. ആദ്യം ബാറ്റ് ചെയ്ത കേരളം 20 ഓവറില് ഏഴ് വിക്കറ്റ് നഷ്ടത്തില് 137 റണ്സെടുത്തു. മറുപടി ബാറ്റിങ്ങിനിറങ്ങിയ ഹിമാചല്പ്രദേശ് 20 ഓവറില് 123 റണ്സിന് ഓള്ഔട്ടാവുകയായിരുന്നു. തുടര്ച്ചയായ മൂന്നാം മത്സരത്തിലും പ്ലെയര് ഓഫ് ദി മാച്ച് പുരസ്കാരം നേടിയ ക്യാപ്റ്റന് ആശ ശോഭനയാണ് കേരളത്തിന്റെ വിജയശില്പ്പി.
ടോസ് നേടി ആദ്യം ബാറ്റ് ചെയ്ത കേരളത്തിന് ഓപ്പണര് ടി. ഷാനിയുടെ വിക്കറ്റ് തുടക്കത്തില് തന്നെ നഷ്ടമായി. എന്നാല് കിരണ് നവ്ഗിരെയുടെയും(20) നജ്ല സി.എം.സി.യുടെയും(46) ഇന്നിങ്സുകള് കേരളത്തിന് തുണയായി.
തുടര്ന്നെത്തിയ ക്യാപ്റ്റന് ആശ ശോഭന(19), സജന സജീവന്(17) എന്നിനപും ഭെദപ്പെട്ട പ്രകടനം പുറത്തെടുത്തു. ഹിമാചല്പ്രദേശിനു വേണ്ടി ജ്യോതി ഠാക്കൂര്, നീന ചൗധരി എന്നിവര് രണ്ട് വിക്കറ്റ് വീതം വീഴ്ത്തി.
മറുപടി ബാറ്റിങ്ങിനിറങ്ങിയ ഹിമാചല്പ്രദേശിനു വേണ്ടി 23 റണ്സെടുത്ത ക്യാപ്റ്റന് ശിവാനി സിങ്ങും 21 റണ്സെടുത്ത മോണിക്ക ദേവിയും മാത്രമാണ് ഭേദപ്പെട്ട പ്രകടനം കാഴ്ചവെച്ചത്. നാല് ഓവറില് 13 റണ്സ് മാത്രം വിട്ടുകൊടുത്ത് നാല് വിക്കറ്റ് വീഴ്ത്തിയ ആശ ശോഭനയുടെ ബൗളിങ് മികവാണ് ഹിമാചല് ബാറ്റിങ് നിരയെ തകര്ത്തത്.
നിയ നസ്നീന്, സജന സജീവന് എന്നിവര് രണ്ട് വിക്കറ്റ് വീതവും വീഴ്ത്തി.
