ന്യൂദല്ഹി: മാതൃത്വത്തിന്റെ തത്വങ്ങള് ശാശ്വതമാണെന്നും അത് കാലത്തിനൊത്ത് മാറേണ്ടതല്ലെന്നും ആര്എസ്എസ് സര്സംഘചാലക് ഡോ. മോഹന് ഭാഗവത്. വിശ്വമംഗല്യ സഭ അംബേദ്കര് ഇന്റര്നാഷണല് സെന്ററില് നടത്തിയ ജ്ഞാനോദയ യോഗത്തിന്റെ സമാപന സമ്മേളനത്തില്, യുഗാനുകൂല മാതൃത്വം എന്ന വിഷയത്തില് സംസാരിക്കുകയായിരുന്നു അദ്ദേഹം. പുരാതന കാലം മുതല് ഈ വിഷയത്തെക്കുറിച്ചുള്ള ഭാരതീയ കാഴ്ചപ്പാട് വ്യക്തമാണ്. സ്വാമി വിവേകാനന്ദന്, ഗാന്ധിജി, രവീന്ദ്രനാഥ ടാഗോര് തുടങ്ങിയവര് സമഗ്രമായി ചിന്തിക്കുകയും അവരുടെ കാഴ്ചപ്പാടുകള് അവതരിപ്പിക്കുകയും ചെയ്തിട്ടുണ്ട്.
മാതൃത്വത്തിന്റെ മാറ്റമില്ലാത്ത തത്വങ്ങളില് കൂടിയാണ് കാലത്തിന് തന്നെ മാറ്റം വരുത്തുന്നവര് ജനിക്കുന്നത്. പ്രപഞ്ച പ്രവര്ത്തനം തന്നെ മാതൃത്വത്തിന്റെ അടിസ്ഥാനത്തിലാണ്. എല്ലാ ജീവജാലങ്ങളിലും അമ്മയുണ്ട്. അതില്ലാതെ സൃഷ്ടിയും വളര്ച്ചയും ഉപജീവനവും അസാധ്യമാണ്. സൃഷ്ടിയുടെ വികാസത്തിനും നിലനില്പ്പിനും തുടര്ച്ചയ്ക്കും മാതൃത്വം അടിസ്ഥാന അടിത്തറയാണ്, സര്സംഘചാലക് പറഞ്ഞു.
മനുഷ്യന്റെ ഏറ്റവും വലിയ ശക്തി ചിന്തകളാണ്, എന്നാല് ആ ചിന്തകളെ ശരിയായ ദിശയിലേക്ക് നയിക്കുന്നത് അമ്മയാണ്. അമ്മ വ്യക്തിയുടെ ആദ്യ അദ്ധ്യാപികയാണ്, ജീവിതത്തിലുടനീളം വൈകാരികമായ ആ പിന്തുണ വളര്ച്ചയുടെ പ്രാഥമിക ഉറവിടമായി തുടരുന്നു. കുടുംബത്തിനായി കൂടുതല് സമയം ചെലവഴിക്കുകയും ആശയവിനിമയം നിലനിര്ത്തുകയും ചെയ്യുന്നത് ഇന്ന് പരമപ്രധാനമായ ആവശ്യമാണെന്ന് അദ്ദേഹം ചൂണ്ടിക്കാട്ടി. അച്ഛനമ്മമാര് കുട്ടികളുടെ ജിജ്ഞാസയെ അഭിസംബോധന ചെയ്യണം, അതിനായി അവരവരുടെ അറിവ് തുടര്ച്ചയായി വികസിപ്പിക്കേണ്ടത് അത്യാവശ്യമാണ്. പ്രസംഗത്തിലൂടെയല്ല അനുകരണത്തിലൂടെയാണ് കുട്ടികള് പഠിക്കുന്നത്, അതുകൊണ്ട് തന്നെ അച്ഛനമ്മമാരുടേത് ആദര്ശപരമായ പെരുമാറ്റമായിരിക്കണം.
സമൂഹത്തിലെ പല ചര്ച്ചകളും ബോധപൂര്വമോ അല്ലാത്തതോ ആയ തെറ്റിദ്ധാരണകള് സൃഷ്ടിക്കുന്നുണ്ട്. വളരെക്കാലമായി, ഭാരതീയ സംസ്കാരത്തെക്കുറിച്ച് തെറ്റിദ്ധാരണകള് പ്രചരിപ്പിക്കപ്പെട്ടിട്ടുണ്ട്. നമ്മുടെ പാരമ്പര്യങ്ങള് തെറ്റാണെന്ന് അവര് പറയുന്നു. എന്നാല് നമ്മുടെ സാംസ്കാരിക അടിത്തറ ശക്തവും വ്യക്തവുമാണ് എന്നതാണ് യാഥാര്ത്ഥ്യം. ചരിത്രത്തിലും ശാസ്ത്രത്തിലും പാരമ്പര്യങ്ങളിലും വിശ്വാസമര്പ്പിച്ച് നാം മുന്നോട്ട് പോകണം, മോഹന് ഭാഗവത് പറഞ്ഞു.
ഭാരതത്തില് ജീവിക്കുമ്പോള്, നമ്മുടെ സംസ്കാരത്തിനും മൂല്യങ്ങള്ക്കും അനുസൃതമായി ജീവിക്കണം. മറ്റ് രാജ്യങ്ങളുടെ ജീവിതശൈലികളെ അന്ധമായി സ്വീകരിക്കുന്നതിനുപകരം ഭാരതീയ കാഴ്ചപ്പാടില് അധിഷ്ഠിതമായ സമൂഹത്തെയും കുടുംബവ്യവസ്ഥയെയും ശക്തിപ്പെടുത്തുക എന്നതാണ് കാലഘട്ടത്തിന്റെ ആവശ്യമെന്ന് അദ്ദേഹം കൂട്ടിച്ചേര്ത്തു.
