ഇസ്ലാമാബാദ്: പാക്കിസ്ഥാൻ ക്രിക്കറ്റ് ടീമിന്റെ സൂപ്പർ ഓൾ റൗണ്ടർ താരം ഷാഹീദ് അഫ്രീദി അന്താരാഷ്ട്ര ക്രിക്കറ്റിനോട് വിട ചൊല്ലുന്നു. 21 വർഷത്തെ ക്രിക്കറ്റ് ജീവിതത്തോട് വിട പറയുന്ന കാര്യം ഞായറാഴ്ച അഫ്രീദി തന്നെയാണ് ലോകത്തെ അറിയിച്ചത്.
36കാരനായ അഫ്രീദി ഇപ്പോൾ ട്വിന്റി20 ക്രിക്കറ്റിൽ സജീവമായിരുന്നു. നേരത്തെ 2010ൽ ടെസ്റ്റ് ക്രിക്കറ്റിൽ നിന്നും 2015ൽ ഏകദിന മത്സരങ്ങളിൽ നിന്നും അഫ്രീദി വിരമിച്ചിരുന്നു. എന്നാൽ ആഭ്യന്തര ക്രിക്കറ്റിൽ രണ്ട് വർഷം കൂടി കളിക്കാൻ താനുണ്ടാകുമെന്ന് അദ്ദേഹം അറിയിച്ചു.
‘ബൂം ബൂം’ എന്ന പേരിലറിയപ്പെടുന്ന അഫ്രീദി ക്രിക്കറ്റ് ലോകത്തെ സൂപ്പർ ഓൾറൗണ്ടർമാരിലൊരാളാണ്. ബാറ്റിങിലും ബൗളിങിലും ഫീൽഡിങിലുമെല്ലാം പാക്ക് പടയ്ക്ക് കരുത്തേകിയ ഗ്ലാമർ താരമായിരുന്നു അഫ്രീദി. അദ്ദേഹം 1996ൽ ശ്രീലങ്കയ്ക്കെതിരെ 36 ബോളിൽ നേടിയ ശതകം ക്രിക്കറ്റ് ലോകത്തിലെ കൗതുകവും വെടിക്കെട്ട് ഇന്നിംഗിസുമായിരുന്നു. 17 വർഷം തികയുമ്പോഴും ഈ റെക്കോർഡ് ആർക്കും കീഴടക്കാൻ സാധിച്ചിട്ടില്ല.
അന്താരാഷ്ട്ര ക്രിക്കറ്റിനോട് വിട പറയുമ്പോൾ കൈയ്യിൽ ഒരു പിടി റൊക്കോർഡുകളും ഓർമ്മകളുമായിട്ടാണ് അദ്ദേഹം പടിയിറങ്ങുന്നത്. 27 ടെസ്റ്റ് മത്സരങ്ങളിൽ നിന്നായി 1,176 റൺസും 48 വിക്കറ്റും അദ്ദേഹം നേടി. ഏകദിന മത്സരങ്ങളിൽ നിറഞ്ഞാടിയ അദ്ദേഹം 398 കളികളിൽ നിന്നുമായി 8,064 റൺസും ഇടം കൈയ്യിലൂടെ 395 വിക്കറ്റുകളും സ്വന്തമാക്കി. 98 ട്വിന്റി20യിൽ മത്സരങ്ങളിൽ നിന്നുമായി 1,405 റൺസും 97 വിക്കറ്റും അദ്ദേഹം സ്വന്തമാക്കിയിട്ടുണ്ട്.
