കൊല്ലം: കേന്ദ്രമന്ത്രി സുരേഷ് ഗോപി നല്കിയ ഉറപ്പിനെ തുടര്ന്ന് നീണ്ടകരയില് വള്ളം മറിഞ്ഞ് കാണാതായ ഗൗതം കൃഷ്ണയുടെ അമ്മ രേഷ്മ തീരദേശ പൊലീസ് സ്റ്റേഷന് മുന്നില് നടത്തിയ സമരം അവസാനിപ്പിച്ചു.കൊല്ലം കമ്മീഷണറുമായി ചര്ച്ച സംസാരിച്ചെന്നും ഊര്ജിത ഇടപെടല് നടത്തുമെന്നും സുരേഷ് ഗോപി രേഷ്മയെ അറിയിച്ചു.താന് വെളളിയാഴ്ച രാവിലെ നീണ്ടകരയില് എത്തുമെന്നും അദ്ദേഹം ഉറപ്പ് നല്കി.
തെരച്ചില് തൃപ്തികരമല്ലെന്ന് പരാതിപ്പെട്ടാണ് രേഷ്മ നീണ്ടകര പൊലീസ് സ്റ്റേഷന് മുന്നില് കുത്തിയിരുന്ന് പ്രതിഷേധിച്ചത്.എസിപിയുമായി സംസാരിച്ചപ്പോള് തൃപ്തികരമായ മറുപടി കിട്ടാത്തതിനാലാണ് പ്രതിഷേധം നടത്തിയത്. സ്കൂബ ടീമിനെ ഉള്പ്പെടെ ഇറക്കി തിരച്ചില് നടത്തണണമെന്നാണ് രേഷ്മയുടെ ആവശ്യം.
ഗൗതം കൃഷ്ണയെ കടലില് കാണാതായി ഏഴ് ദിവസമായിട്ടും ഒരു വിവരവും ലഭിച്ചിട്ടില്ല.ഈ സാഹചര്യത്തിലാണ് അമ്മ പ്രതിഷേധവുമായി എത്തിയത്.
മൂന്നുപേരെ നഷ്ടപ്പെട്ട ഒരു വീട്ടില് നിന്ന് ഒരമ്മ വന്ന് ആവശ്യപ്പെട്ടപ്പോള് ഏഴാമത്തെ ദിവസം മാത്രമാണ് ഭരണകൂടം ഉണര്ന്നത്. ഓരോന്ന് ആലോചിച്ച് ഭ്രാന്ത് പിടിക്കുന്നു- പൊട്ടിക്കരഞ്ഞുകൊണ്ട് രേഷ്മ മാധ്യമങ്ങളോട് പറഞ്ഞു. ഇതുപോലൊരു അപകടത്തില് അച്ഛനെയും ഭര്ത്താവിനെയും നഷ്ടമായതാണെന്നും അവരുടെ മരണത്തിന്റെ ചടങ്ങുകള് നടക്കുമ്പോള് മകനെക്കുറിച്ച് യാതൊരു വിവരവും ലഭിക്കാതെ ഇരിക്കുകയും ചെയ്യുന്ന അവസ്ഥ തന്റെ സമനില തെറ്റിക്കുകയാണെന്ന് രേഷ്മ വിശദീകരിക്കുന്നു.
ഗൗതം കൃഷ്ണയെ കണ്ടെത്താനായി വെളളിയാഴ്ച രാവിലെ 6.30 മുതല് തെരച്ചില് പുനരാരംഭിക്കുമെന്ന് അധികൃതര് അറിയിച്ചു.
