കോഴിക്കോട്: നാഗ്ജി ഇന്റര്‍നാഷണല്‍ ക്ലബ്ബ് ഫുട്ബാള്‍ ടൂര്‍ണമെന്റിന്റെ ആദ്യ സീസണിന്റെ വരവ് ചെലവ് കണക്കുകള്‍ അംഗീകരിച്ചു. ഇന്നലെ രാവിലെ കെഡിഎഫ്എ ഓഫീസില്‍ ചേര്‍ന്ന യോഗത്തിലാണ് വരവ് ചെലവ് കണക്കുകള്‍ അവതരിപ്പിച്ചത്. 6,13,18,986 രൂപ വരവും 12, 55, 87, 849 രൂപ ചെലവും 6,42,68,863 രൂപ നഷ്ടവും കാണിക്കുന്ന കണക്കാണ് അംഗീകരിച്ചത്. വിവിധ ചെലവുകള്‍ക്കായി രണ്ടു കോടി 20 ലക്ഷം രൂപയോളം കൊടുത്ത് തീര്‍ക്കാനുണ്ട്. ഇത് കൂടാതെ ടൂര്‍ണമെന്റ് ഇനത്തില്‍ പ്രസിഡന്റിന് മാത്രം അഞ്ച് കോടി ആറ് ലക്ഷം രൂപയോളം ബാധ്യതയായിട്ടുണ്ട്.
ആദ്യസീസണ്‍ സാമ്പത്തികമായ വലിയ ബാധ്യത ഉണ്ടാക്കിയെങ്കിലും രണ്ടാം സീസണിലൂടെ ആ നഷ്ടം നികത്താനാവുമെന്ന പ്രതീക്ഷയിലാണ് സംഘാടകര്‍. യോഗത്തില്‍ കെഡിഎഫ്എ വൈസ് പ്രസിഡന്റ് പി. കുട്ടിശങ്കരന്‍ അധ്യക്ഷത വഹിച്ചു. സെക്രട്ടറി പി. ഹരിദാസ് പ്രവര്‍ത്തന റിപ്പോര്‍ട്ടും ട്രഷറര്‍ സി. പ്രിയേഷ്‌കുമാര്‍ വരവ് ചെലവ് കണക്കും അവതരിപ്പിച്ചു.
