തൃശൂര്: തൃശൂര് പൂരത്തോടനുബന്ധിച്ചുള്ള പാറമേക്കാവിന്റെ ചമയപ്രദര്ശനം ക്ഷേത്രം അഗ്രശാലയില് തുടങ്ങി. കുടകളുടെയും നെറ്റിപ്പട്ടങ്ങളുടെയും മനോഹാരിത വര്ണ്ണപ്രപഞ്ചമാണ് ഇവിടെ ഒരുക്കിയിരിക്കുന്നത്.
50 സെറ്റ് കുടകളും നെറ്റിപ്പട്ടങ്ങളും ആലവട്ടങ്ങളും വെഞ്ചാമരങ്ങളും ഗജവീരന്മാരുടെ അരമണിയും കഴുത്തിലെ മണിയുമെല്ലാം അടുക്കോടെ ക്രമീകരിച്ചിരിക്കുന്നു.
പാറമേക്കാവ് ഭഗവതി, ശിവന്, പല വര്ണ്ണങ്ങളിലുള്ള പട്ടുടയാട ചുറ്റിയ ഭഗവതി, ഗണപതി, ശിവതാണ്ഡവം എന്നിവയുടെ ചിത്രങ്ങള് ആലേഖനം ചെയ്ത കുടകള് പ്രദര്ശനത്തിന് മാറ്റുകൂട്ടുന്നു.
ഇന്നലെ രാത്രി 10 വരെ ചമയപ്രദര്ശനം കാണാന് സൗകര്യം ഒരുക്കിയിരുന്നു. ഇന്ന് രാവിലെ മുതല് തുടങ്ങുന്ന പ്രദര്ശനം അര്ദ്ധരാത്രിവരെയും പൂരപ്രേമികള്ക്ക് ആസ്വദിക്കാം.
കൃഷി മന്ത്രി വി.എസ് സുനില്കുമാര് പ്രദര്ശനം ഉദ്ഘാടനം ചെയ്തു. കല്ദായ സുറിയാനി മെത്രാന് മാര് യോഹന്നാന് യൗസേപ്പ്, പാറമേക്കാവ് ദേവസ്വം സെക്രട്ടറി കെ.സതീഷ് മേനോന് എന്നിവര് സന്നിഹിതരായിരുന്നു. തിരുവമ്പാടി വിഭാഗത്തിന്റെ ചമയപ്രദര്ശനം ഇന്ന് രാവിലെ കൗസ്തുഭം ഹാളില് ആരംഭിക്കും.
