കോഴിക്കോട്: വയനാട് റോഡില് സിവില്സ്റ്റേഷനുസമീപം നിയന്ത്രണം വിട്ട റോഡ് റോളര് ഇടിച്ച് മധ്യവയ്സ്കന് മരിച്ച സംഭവത്തില് പോലീസ് കേസെടുത്തു.വാഹനം ഓടിച്ചയാള്ക്കെതിരേയാണ് മന:പൂര്വമല്ലാത്ത നരഹത്യക്ക് നോര്ത്ത് ട്രാഫിക് പോലീസ് കേസെടുത്തത്. എന്നാല് ഇയാളുടെ അറസ്റ്റ് രേഖപ്പെടുത്തിയിട്ടില്ല.ചുള്ളിയോട് റോഡില് എടവഴിപ്പുറം വയലില് നടുക്കണ്ടി വീട്ടില് ഗിരീഷ് കുമാറാണ്(56) മരിച്ചത്.
റോഡ് റോളര് ഇടിച്ച് മരണമടഞ്ഞ ഗിരീഷ് കുമാറിന്റെ സംസ്കാരം ഇന്നലെ മാവൂര് റോഡ് ശ്മശാനത്തില് നടന്നു. സജിതയാണ് ഗിരീഷിന്റെ ഭാര്യ. നേഹ, നികിത എന്നിവര് മക്കളാണ്. സഹോദരങ്ങള്: സോമന്, കുമുദം, ജലജ.
ചൂള്ളിയോട് റോഡരികിലെ പെട്ടിക്കടയും തകര്ത്ത് നീങ്ങിയ റോളര് സമീപത്തെ മതിലും തകര്ത്താണ് നിന്നത്. റോളറിനും മതിലിനും ഇടയില്പെട്ടാണ് ഗിരീഷ് കുമാര് മരിച്ചത്. എരഞ്ഞിപ്പാലം ഭാഗത്തേക്ക് വരികയായിരുന്ന റോഡ് റോളര് ഇറക്കത്തില് വച്ച് നിയന്ത്രണം വിട്ടതിനെ തുടര്ന്ന് ഡ്രൈവര്ലൈറ്റിട്ടും അലറിവിളിച്ചും റോഡരികില് നിന്നവരോട് മാറാന് ആവശ്യപ്പെട്ടിരുന്നതായി ദൃക്സാക്ഷികള് പറഞ്ഞു.എന്നാല് ഓടി മാറാന് ശ്രമിക്കുന്നതിനിടെ ഗിരീഷ് കുമാര് റോളറിനടയില്പ്പെട്ടുപോകുകയായിരുന്നു.
