പാലാ: കുടിവെള്ള വിതരണത്തിനായി ലക്ഷങ്ങള് മുടക്കി നഗരസഭ വാങ്ങിയ ടാങ്കര് ലോറി നോക്കുകുത്തിയായി. വേനല് കടുത്തതോടെ ശുദ്ധജല ദൗര്ലഭ്യം അനുഭവിക്കുന്ന ഭാഗങ്ങളില് വെള്ളമെത്തിക്കുന്നതിന് നഗരസഭ വാങ്ങിയ വാഹനം സാങ്കേതിക പ്രശ്നത്തില് കുടുങ്ങിയാണ് പ്രവര്ത്തന രഹിതമായത്. കുടിവെള്ള വിതരണത്തിന് യോഗ്യമായ രീതിയില് വെള്ളം ശുദ്ധീകരിക്കുന്നതിന് നഗരസഭയ്ക്ക് ട്രീറ്റ്മെന്റ് പ്ലാന്റും സൗകര്യങ്ങളും ഇല്ലാത്തതാണ് കുടിവെള്ള വിതരണം മുടങ്ങാന് ഇടയായത്. ശുദ്ധീകരിക്കാത്ത വെള്ളം കുടിവെള്ളമെന്ന പേരില് വിതരണം നടത്താന് നഗരസഭയ്ക്ക് നിയമ പ്രശ്നങ്ങളും ഉണ്ട്.
കുടിവെള്ളക്ഷാമം അനുഭവിക്കുന്ന വേലിക്കകം, മോന്തക്കര, കുന്നിന്, ചാമക്കാല, വെട്ടിക്കല് കവീക്കുന്ന് ഭാഗങ്ങളിലും ശുദ്ധജലം ആവശ്യമുള്ള മറ്റ് ഭാഗങ്ങളിലും വെള്ളമെത്തിക്കുന്നതിനാണ് നഗരസഭ കുടിവെള്ളവിതരണത്തിന് മാത്രമായി ടാങ്കര് വാങ്ങിയത്. ഒരുതുള്ളി വെള്ളം പോലും വിതരണം ചെയ്യാതെ ഭരണാധികാരികളുടെ കെടുകാര്യസ്ഥതയുടെയും പിടിപ്പുകേടിന്റെയും പ്രതീകമായി നഗരസഭയ്ക്ക് മുന്നില് സ്ഥാനം പിടിച്ചിരിക്കുകയാണിപ്പോള് ടാങ്കര് ലോറി.
മുത്തോലി പഞ്ചായത്തിന്റെ 11-ാം വാര്ഡായ നെയ്യൂരാണ് കുടിവെള്ളക്ഷാമം നേരിടുന്ന പ്രദേശം. 250 വീടുകള്ക്ക് പ്രയോജനം ലഭിച്ചിരുന്ന നെയ്യൂര് കുടിവെള്ളപദ്ധതിയാണ് ഈ പ്രദേശത്തിന്റെ ആശ്രയം. വേനല്ക്കാലത്ത് ഭൂമിയിലെ ജലനിരപ്പ് താഴ്ന്നതോടെ പദ്ധതിയില് നിന്നുള്ള ജലവിതരണവും ആഴ്ചയില് ഒന്നായി.
കൊഴുവനാല് പഞ്ചായത്തിലെ കെഴുവംകുളം കുടിവെള്ള പദ്ധതിക്കുള്ള കിണര് ഈ വാര്ഡില് സ്ഥാപിച്ചതും സമീപപ്രദേശത്തെ ജലനിരപ്പ് താഴുന്നതിനും ജലദൗര്ലഭ്യത്തിനും കാരണമായതായി വാര്ഡ് മെമ്പറും നാട്ടുകാരും പറയുന്നു. 800ഓളം കുടുംബങ്ങള്ക്ക് വെള്ളമെത്തിക്കുന്നതിനുള്ള ബൃഹദ് പദ്ധതിയാണിത്. ഇത് മൂലം സമീപ പ്രദേശങ്ങളിലെ കുടിവെള്ള ശ്രോതസുകളിലും ജലനിരപ്പ് താഴ്ന്നതായി ചൂണ്ടിക്കാണിക്കപ്പെടുന്നു.
കൊഴുവനാല് പഞ്ചായത്തിലെ ഉയര്ന്ന പ്രദേശങ്ങളായ മനക്കുന്ന് ആയില്ല്യക്കുന്ന്, തോടനാല്, കപ്പിലിക്കുന്ന് ഭാഗങ്ങളാണ് കുടിവെള്ളപ്രശ്നം നേരിടുന്നത്. തോടനാല്-മനക്കുന്ന കുടിവെള്ള പദ്ധതി പ്രവര്ത്തനം നിലച്ചതാണ് ഇവിടെ കുടിവെള്ള പ്രശ്നം രൂക്ഷമാക്കിയത്. ഔട്ടര് റിംഗ് റോഡ് വികസനം വന്നപ്പോള് ജലസംഭരണ ടാങ്കില് വെള്ളമെത്തിക്കുന്ന പ്രധാന പൈപ്പ് പൊട്ടിയത് പരിഹരിക്കാന് അധികൃതരുടെയും പഞ്ചായത്തിന്റെയും ഭാഗത്തുനിന്ന് ശ്രമം നടക്കാത്തത് മൂലം ഈ ഭാഗത്തെ നൂറ്കണക്കിന് കുടുംബങ്ങള് സ്വകാര്യ ജലവിതരണക്കാര്ക്ക് വന്തുക നല്കിയാണ് അത്യാവശ്യത്തിന് വെള്ളമെത്തിക്കുന്നത്.
മീനച്ചില് പഞ്ചായത്തിലെ വിളക്കുമാടം, ചാത്തന്കുളം, ഇടമറ്റം, മുട്ടിയാനിക്കല് എന്നിവിടങ്ങളില് ശുദ്ധജലക്ഷാമം നേരിടുന്ന ഭാഗങ്ങളാണ്. ഇവിടേക്ക് ശുദ്ധജലമെത്തിക്കുന്നതിനായി പഞ്ചായത്തിന് പദ്ധതികളില്ല. ഇടയ്ക്ക് ലഭിച്ച വേനല്വഴയാണ് പല കുടിവെള്ള പദ്ധതികള്ക്കും രക്ഷയായത്.
