തിരുവനന്തപുരം: ശ്രീപദ്മനാഭസ്വാമി ക്ഷേത്രത്തിലെ പുഷ്പാഞ്ജലി സ്വാമിയാരുടെ അവരോധം ഇന്നു നടക്കും. മുഞ്ചിറ മഠം സ്വാമിയാര് ശ്രീപരമേശ്വര ബ്രഹ്മാനന്ദതീര്ഥരെയാണ് ക്ഷേത്രത്തിലെ പുഷ്പാഞ്ജലി സ്വാമിയാരായി അവരോധിക്കുന്നത്.
പുതിയ സ്വാമിയാരെ നിശ്ചയിച്ചുള്ള നീട്ടുകള് ഇപ്പോഴത്തെ തൃപ്പാപ്പൂര് മൂപ്പനായ മൂലം തിരുനാള് രാമവര്മ തുല്യം ചാര്ത്തി കൊട്ടാരത്തില് നിന്ന് കൊടുത്തയയ്ക്കും. രാവിലെ ഏഴിന് തിരുവാമ്പാടി ക്ഷേത്രത്തിലെ തെക്കേമുറിയില് തിരുവനന്തപുരത്തു സഭ യോഗം ചേരും. സഭയുടെ അനുവാദത്തോടെ ആ നീട്ടുകള് വായിക്കും. അതിനുശേഷം പുതിയ പുഷ്പാഞ്ജലി സ്വാമിയാരെ തൃപ്പാപ്പൂര് മൂപ്പന്റെ പ്രതിനിധിയും ദേശിയും കൂടി സാദരം തിരുവാമ്പാടിയിലെ തെക്കേമുറിയിലേക്ക് കൊണ്ടുവന്ന് കൂര്മാസനത്തില് ഇരുത്തും. പിന്നീട് കൊടിവിളക്ക്, ശംഖനാദം, പഞ്ചവാദ്യം എന്നിവയുടെ അകമ്പടിയോടെ പുതിയ സ്വാമിയാരെ യോഗത്തില് പോറ്റിമാരും ശ്രീകാര്യവും കൂടി മിത്രാനന്ദപുരം തീര്ഥക്കടവിലേക്ക് കൊണ്ടുപോകും. തീര്ഥസ്നാനത്തിനുശേഷം സ്വാമിയാര് ശ്രീപദ്മനാഭസ്വാമി ക്ഷേത്രത്തിലെ നാലമ്പലത്തിന്റെ വടക്കേനട വഴി കയറി അപ്രദക്ഷിണമായി തെക്കേ ചെറുചുറ്റുവഴി ഒറ്റക്കല് മണ്ഡപത്തിന്റെ സമീപത്തെത്തും. അവിടെ പെരിയനമ്പി കൊണ്ടിട്ട കൂര്മാസനത്തില് സ്വാമിയാര് ഇരിക്കും. അപ്പോള് സ്വാമിയാരുടെ അകമ്പടിക്കാരന് നീട്ടെഴുതിയ ഉദ്യോഗസ്ഥനുള്പ്പടെ പണം നല്കും. പിന്നീട് പെരിയനമ്പി കൈവട്ടകയില് ജലം കൊണ്ടുവന്ന് സ്വാമിയാരുടെ പാദം കഴുകും. ശേഷം നമ്പി നല്കുന്ന ജലം കൊണ്ട് സ്വാമിയാര് മുഖം കഴുകി ആചമിച്ച് (ഭക്തിപൂര്വം തീര്ഥം സേവിക്കുന്നതു പോലെ) ഒറ്റക്കല് മണ്ഡപത്തില് കയറി ഗര്ഭഗൃഹത്തിലെ അന്തരാളത്തില് പ്രദക്ഷിണം വയ്ക്കും. ഇതു കഴിഞ്ഞു സ്വാമിയാര് ശ്രീലകത്തു കയറി കീഴ്നടപ്പനുസരിച്ച് പുഷ്പാഞ്ജലി ചെയ്യും. പിന്നീട് അദ്ദേഹം നരസിംഹസ്വാമിക്കും ശ്രീകൃഷ്ണനും പുഷ്പാഞ്ജലി കഴിക്കും. ഇതാണ് അവരോധക്രിയകളുടെ ചുരുക്കം.
തിരുവനന്തപുരത്ത് സഭയുടെ അധ്യക്ഷന് പുഷ്പാഞ്ജലി സ്വാമിയാരാണ്. കൂപക്കരപ്പോറ്റി, വഞ്ചിയൂര് അത്തിയറപ്പോറ്റി, കൊല്ലൂര് അത്തിയറപ്പോറ്റി, മുട്ടവിളപ്പോറ്റി, കരുവാപ്പോറ്റി, നെയ്തശ്ശേരിപ്പോറ്റി എന്നിവരും സഭാഞ്ജിതനായ (സെക്രട്ടറി) ശ്രീകാര്യത്തുപോറ്റിയും സഭയില് അംഗങ്ങളാണ്. എട്ടംഗങ്ങളുള്ള സഭയും അരചനും (തൃപ്പാപ്പൂര് മൂപ്പനും) ചേരുന്ന ക്ഷേത്രഭരണസംവിധാനമായിരുന്നു എട്ടരയോഗം. ഇപ്പോഴും ആചാരപരമായ കാര്യങ്ങളില് എട്ടരയോഗത്തിന് നിര്ണായകസ്ഥാനമാണുള്ളത്.
