അമ്പലപ്പുഴ: സമരം ശക്തമായതോടെ പറവൂരിലെ മദ്യവില്പന ശാല മണിക്കൂറുകള്ക്കുള്ളില് പൂട്ടി. ആലപ്പുഴ ബോട്ടുജെട്ടിക്കു സമീപം കണ്സ്യൂമര് ഫെഡിന്റെ ഉടമസ്ഥതയില് പ്രവര്ത്തിച്ചിരുന്ന വിദേശമദ്യ വില്പന ശാലയാണ് പറവൂര് ജങ്ഷനു സമീപം സ്വകാര്യ വ്യക്തിയുടെ കെട്ടിടത്തില് തിങ്കളാഴ്ച രാവിലെ മുതല് തുടങ്ങിയത്.
ഇതിനെതിരെ ജനകീയ സമരം സമിതിയുടെ നേതൃത്വത്തില് സമര പന്തല് കെട്ടി പ്രതിഷേധം ആരംഭിച്ചിരുന്നു. ഇന്നലെ ബിജെപിയുള്പ്പെടെയുള്ള സംഘടനകളുടെ നേതൃത്വത്തില് പ്രതിഷേധം ശക്തമാക്കുകയായിരുന്നു. രാവിലെ മുതല് നൂറുകണക്കിന് സ്ത്രീകള് ഉള്പ്പെടെയുള്ളവര് മദ്യവില്പശാലയ്ക്കു മുന്നില് ഉപരോധം തീര്ത്തിരുന്നു.
ഇതിനിടെ മതില് ചാടിക്കടന്ന് ജീവനക്കാര് ഉള്ളില് പ്രവേശിച്ചു. പോലീസിന്റെ സഹായത്താല് മദ്യപാനികളും മതില് ചാടിക്കടന്നു. മദ്യം വാങ്ങി. ഉച്ചയോടെ മദ്യവില്പന ശാല അടച്ച് ജീവനക്കാര് പുറത്തിറങ്ങുകയായിരുന്നു.
പഞ്ചായത്തിന്റെ അനുമതി ലഭിക്കാതെയാണ് മദ്യവില്പനശാല ഇവിടെ ആരംഭിച്ചതെന്നും ബിജെപി ഗ്രാമപഞ്ചായത്തംഗവും സമര സമിതി വൈസ് ചെയര്മാനുമായ എല്.പി. ജയചന്ദ്രന് പറഞ്ഞു. ജനകീയ സമര സമിതിയുടെ നേതൃത്വത്തിലായിരുന്നു പ്രക്ഷോഭം.
മണിക്കൂറുകള്ക്കുള്ളില് വിറ്റത്
16ലക്ഷത്തിന്റെ മദ്യം
അമ്പലപ്പുഴ: മാറ്റിസ്ഥാപിച്ച വിദേശ മദ്യശാലയില് മണിക്കൂറുകള്ക്കകം നടന്നത് 16 ലക്ഷം രൂപയുടെ കച്ചവടം. പറവൂര് ജങ്ഷനു സമീപം ആരംഭിച്ച മദ്യവില്പന ശാലയിലാണ് കച്ചവടം പൊടിപൊടിച്ചത്. തിങ്കളാഴ്ച രാവിലെയാണ് ഇവിടെ മദ്യവില്പനശാല തുറന്നത്. മണിക്കൂറുകള്ക്കുള്ളില് വിവിധ പ്രദേശങ്ങളില് നിന്ന് ആയിരങ്ങളാണ് ഇവിടെയെത്തിയത്.
ആലപ്പുഴ നഗരത്തിലും അമ്പലപ്പുഴ, തകഴി പ്രദേശങ്ങളിലും മദ്യവില്പനശാല അടച്ചിട്ടതോടെ തൃക്കുന്നപ്പുഴയിലും മുഹമ്മയിലും പോയി മദ്യം വാങ്ങേണ്ട ഗതികേടിലാണ് ഇവിടുത്തുകാര്. ഇവര്ക്ക് ഗുണകരമായി പറവൂരിലെ മദ്യവില്പനശാല. അതുകൊണ്ടുതന്നെ മണിക്കൂറുകള്ക്കകം ഇവടെ എത്തിച്ച മദ്യം മുഴുവന് വിറ്റഴിഞ്ഞു. ഇന്നലെ സമരപ്പന്തലില് മദ്യവില്പന ശാലയ്ക്കെതിരെ മുദ്രാവാക്യം വിളി ഉയര്ന്നപ്പോള് നൂറുകണക്കിന് കുടിയന്മാരാണ് ഇവരെ കൂകി വിളിച്ചത്. റോഡിനു അഭിമുഖമായി നിന്ന് ഇരുകൂട്ടരും മത്സരിച്ച് മുദ്രാവാക്യം വിളിക്കുകയായിരുന്നു.
