കഞ്ചിക്കോട്: വ്യവസായമേഖലയില് ഭൂഗര്ഭജലത്തിന്റെ അളവ് ക്രമാതീതമായി കുറയുന്നതായി റിപ്പോര്ട്ടുകള്. നിലവിലെ തുടര്ന്നാല് 10 കൊല്ലം കൊണ്ടു ശുദ്ധജലമില്ലാത്ത മേഖലയായി മാറുമെന്നും റിപ്പോര്ട്ടുകള് സൂചിപ്പിക്കുന്നു.
വ്യവസായ വകുപ്പിന്റെ കണക്കനുസരിച്ച് പ്രതിദിനം രണ്ടുകോടി ലിറ്റര് വെള്ളമാണ് കഞ്ചിക്കോട് വ്യവസായമേഖലയിലെ കമ്പനികള് ഉപയോഗിക്കുന്നത്.രണ്ടുദശലക്ഷം ലിറ്റര് കൂടി വെള്ളം മലമ്പുഴ ഡാമില് നിന്ന് വ്യവസായ മേഖലയിലേക്ക് വിതരണം ചെയ്യുന്നുണ്ട്.
ഇതില് നല്ലൊരു പങ്കും കമ്പനികള് വ്യാവസായിക ആവശ്യത്തിന് ഉപയോഗിക്കുന്നതായും കണ്ടെത്തിയിട്ടുണ്ട്. പെപ്സി കോള ബിയര് കമ്പനികള്, കുപ്പിവെള്ളക്കമ്പനികള്, ഡിസ്റ്റലറികള് എന്നിവയടക്കം വന്തോതില് ജലം ആവശ്യമുള്ള നൂറോളം കമ്പനികള് വ്യവസായ മേഖലയില് വെള്ളമൂറ്റുന്നുണ്ട്. ഇവയില് ഏറ്റവും കൂടുതല് ജലമൂറ്റുന്നത് പെപ്സിയായിരുന്നു. ഔദ്യോഗിക കണക്കനുസരിച്ച് പ്രതിദിനം 6.25 ലക്ഷം ലിറ്റര് വെള്ളമാണ് പെപ്സി കോളക്കമ്പനിമാത്രം ഉപയോഗിച്ചിരുന്നത്.
ഒരു ലിറ്റര് കോള ഉല്പ്പാദിപ്പിക്കാന് അഞ്ച് ലിറ്റര് വെള്ളം വേണമെന്നാണ് കണക്കാക്കിയിട്ടുള്ളത്. കോളക്കമ്പനി ഔദ്യോഗികമായി സമര്പ്പിച്ച ഉത്പ്പാദന കണക്കു മാത്രം പരിശോധിച്ചാല് 10 മുതല് 15 വരെ ദശലക്ഷം ലിറ്റര് വെളളം അവര് ഊറ്റിയെടുത്തിരുന്നു. ഇതിന്റെ കണക്ക് അധികൃതര് എടുത്തിട്ടില്ലെന്നു മാത്രമല്ല, വെള്ളമൂറ്റുന്നത് നിരീക്ഷിക്കാനുള്ള സംവിധാനവുമില്ല.
കമ്പനി വെച്ച മീറ്ററുകള് കമ്പനിയുടെ അനുവാദത്തോടെ മാത്രമേ വ്യവസായ വകുപ്പുദ്യോഗസ്ഥര്ക്കു പോലും കാണാനാവൂ എന്നതാണവസ്ഥ. ബിയര് കമ്പനികളും ഡിസ്റ്റിലറികളും ചേര്ന്ന് ഒരു ദിവസം 30 ദശലക്ഷം ലിറ്റര് ഭൂഗര്ഭജലം ഊറ്റിയെടുക്കുന്നുണ്ടെന്നാണ് കണക്ക്.
വ്യവസായ സ്ഥാപനങ്ങളുടെ അമിതമായ ജലചൂഷണം കഞ്ചിക്കോട്ടിന്റെ ആവാസവ്യവസ്ഥയെ തകര്ക്കുമെന്നാണ് ആശങ്ക.
700 അടി വരെ കുഴല് കിണറുകള് കുഴിച്ചാലും ഇവിടെ വെള്ളം കിട്ടാത്ത അവസ്ഥയാണെന്ന് നാട്ടുകാര് പറയുന്നു. വേനല് കനക്കുന്നതോടെ തമിഴ്നാട് അതിര്ത്തിയില് ജലക്ഷാമം രൂക്ഷമാകുന്നത് പതിവാണ്.
കൃഷി- വ്യവസായ ആവശ്യങ്ങള്ക്ക് കുഴല്ക്കിണറുകള് കുഴിക്കാന് ഭൂഗര്ഭ ജലവകുപ്പിന്റെ അനുമതി വാങ്ങണമെന്നാണ് നിയമമെങ്കിലും ആരും അതു പാലിക്കുന്നില്ല. വന്കിട കമ്പനികളുടെ ജല ഉപയോഗം 2.5 ലക്ഷം ലിറ്ററില് പരിമിതപ്പെടുത്തണമെന്ന് കോടതി ഉത്തരവുപ്രകാരം നിയമിക്കപ്പെട്ട വിദഗ്ദ സമിതിയുടെ നിര്ദ്ദേശമുണ്ട്. ഈ റിപ്പോര്ട്ട് ഇപ്പോഴും കോടതിക്കുമുന്നില് എത്തിയിട്ടില്ലെന്നു മാത്രം.
വ്യവസായമേഖലയിലെ ജലചൂഷണം പരിധി വിട്ടതോടെ, കിട്ടുന്ന കുടിവെള്ളത്തിന്റെ ശുദ്ധിയെക്കുറിച്ചും ആശങ്ക ഉയര്ന്നിട്ടുണ്ട്. ഫ്ളൂറോയ്ഡ്, ലെഡ്, കാഡ്മിയം എന്നിവയുടെ അളവ് കുടിവെളളത്തില് ക്രമാതീതമായി കൂടിയിട്ടുണ്ടെന്നും കണ്ടെത്തിയിട്ടുണ്ട്.
വ്യവസായമേഖലയുടെ സംരക്ഷണത്തിനായി രൂപീകരിച്ച കാവല് സംഘം ഇക്കാര്യങ്ങള് നിരവധി തവണ ചൂണ്ടിക്കാട്ടിയിട്ടുണ്ട്. പക്ഷേ, ഇതിലൊന്നും നടപടികളുണ്ടാകാറില്ല എന്നതാണ് സത്യാവസ്ഥ.
