അനുമോള് പരീക്ഷ എഴുതുന്നു
പൂച്ചാക്കല്: അമ്മയുടെ ആഗ്രഹം സഫലമാക്കാന് വേദന മനസിലൊതുക്കി അനുമോള് പ്ലസ്വണ് പരീക്ഷയെഴുതി. തൈക്കാട്ടുശേരി പഞ്ചായത്ത് രണ്ടാം വാര്ഡില് നന്ദിശേരി വില്സന്റെ ഇളയ മകള് അനുമോളാണ് മാതാവ് അജിതയുടെ ചേതനയറ്റ ശരീരത്തിന് അരുകില് നിന്ന് പരീക്ഷയെഴുതാന് എത്തിയത്. ശ്രീകണ്ഠേശ്വരം ഹയര് സെക്കന്ററി സ്കൂളിലെ വിദ്യാര്ത്ഥിനിയായ അനു ബുധനാഴ്ച പരീക്ഷ കഴിഞ്ഞ് വീട്ടിലെത്തിയപ്പോഴാണ് കാന്സര് ബാധിച്ച് ചികിത്സയിലായിരുന്ന അമ്മ മരണമടഞ്ഞത് അറിഞ്ഞത്. ബന്ധുക്കള് തൊട്ടടുത്ത വീട്ടില് പഠിയ്ക്കുന്നതിനുള്ള സൗകര്യം ഒരുക്കുകയായിരുന്നു. ഇന്നലെ അനു ഇംഗ്ലീഷ് പരീക്ഷ എഴുതി മടങ്ങി എത്തിയ ശേഷമായിരുന്നു സംസ്കാരം. ദുഃഖം അടക്കാന് കഴിഞ്ഞില്ലെങ്കിലും പഠിച്ചുമിടുക്കിയായി കുടുബത്തിന് തണലാകണമെന്ന് അമ്മ ആഗ്രഹിച്ചിരുന്നത് മൂലമാണ് പരീക്ഷ എഴുതിയതെന്ന് അനു പറഞ്ഞു. സഹോദങ്ങള് അമൃത, എഡ്വിന്.
