കണ്ണൂര്‍: ആധുനിക കാലഘട്ടത്തില്‍ നിയമങ്ങളെക്കുറിച്ച് സമൂഹത്തിന് ബോധവല്‍ക്കരണം നല്‍കേണ്ടത് അത്യന്താപേക്ഷിതമാണെന്ന് തലശ്ശേരി പ്രിന്‍സിപ്പാള്‍ ഡിസ്ട്രിക് സെഷന്‍സ് ജഡ്ജ് വി.ജയറാം പറഞ്ഞു. എന്‍എസ്എസ് കണ്ണൂര്‍ താലൂക്ക് യൂനിയന്‍ ആരംഭിക്കുന്ന സൗജന്യ നിയമസേവന കേന്ദ്രം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. അതത് വിഷയത്തില്‍ ജ്ഞാനമുളളവരെ ബോധവല്‍ക്കരണത്തിനായി ഉപയോഗിക്കണം. നിസ്സാര പ്രശ്‌നങ്ങള്‍ പോലും കോടതിക്ക് മുന്നിലെത്തുന്നത് ഒഴിവാക്കാന്‍ ഇത് സഹായകകമാകും. നിയമങ്ങളെക്കുറിച്ച് അടിസ്ഥാനജ്ഞാനം ഓരോ പൗരനും ഉണ്ടാകേണ്ടതുണ്ട്. സാമൂഹ്യക്ഷേമ വകുപ്പിന്റ കീഴില്‍ ഇത്തരം സംവിധാനങ്ങളുണ്ടെങ്കിലും കാര്യങ്ങള്‍ വേണ്ടരീതിയില്‍ സാധാരണക്കാരില്‍ എത്തുന്നില്ല. സാമാന്യമായ നീതിബോധവും നിയമ ബോധവും ജനതയുണ്ടെങ്കില്‍ അത് രാജ്യത്തിന് അഭിമാനകരമാണ്. നിയമഞ്ജരുടെ സേവനം എല്ലാ മേഖലയിലും ഒഴിച്ചുകൂടാന്‍ പറ്റാത്തതാണ്. സമൂഹത്തില്‍ സൗഹാര്‍ദ്ദപൂര്‍വ്വമായ അന്തരീക്ഷം നിലനിര്‍ത്താന്‍ ഇത്തരം നിയമസേവന കേന്ദ്രങ്ങള്‍വഴി സാധിക്കുമെന്നും അദ്ദേഹം പറഞ്ഞു. നാം ജീവിക്കുന്നത് പല പ്രതികൂല സാഹചര്യങ്ങളെ അഭിമുഖീകരിച്ചാണ്. പലവിധ ചൂഷണത്തിനും വിധേയരാകുന്നു. അതുകൊണ്ടുതന്നെ നിയമങ്ങളെക്കുറിച്ച് അറിവില്ലാതായിക്കഴിഞ്ഞാല്‍ സമൂഹത്തില്‍ നിന്നും പിന്തളളപ്പെടുമെന്നും അദ്ദേഹം പറഞ്ഞു. കണ്ണൂര്‍ താലൂക്ക് എന്‍എസ്എസ് യൂനിയന്‍ ചെയര്‍മാന്‍ ഇ.പത്മനാഭന്‍ നമ്പ്യാര്‍ അധ്യക്ഷത വഹിച്ചു. കേണല്‍ രാംദാസ്, എന്‍എസ്എസ് വനിതാ യൂണിയന്‍ താലൂക്ക് പ്രസിഡണ്ട് മീര പ്രേംനാഥ് തുടങ്ങിയവര്‍ സംസാരിച്ചു. എന്‍എസ്എസ് എച്ച്ആര്‍ കോഡിനേറ്റര്‍ അഡ്വ.കെ.എന്‍.ഷാജി സ്വാഗതവും യൂനിയന്‍ സെക്രട്ടറി പി.കനകരാജന്‍ നന്ദിയും പറഞ്ഞു.
നിയമങ്ങളെക്കുറിച്ച് സമൂഹത്തിന് ബോധവല്‍ക്കരണം അത്യന്താപേക്ഷിതം : വി.ജയറാം
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.