തിരുവനന്തപുരം: ട്രഷറികളില് അക്കൗണ്ട് ഉള്ളവര്ക്ക് സര്ക്കാരിന്റെ ഓണ്ലൈന് സേവനം ലഭ്യമാക്കാന് സാഹചര്യം ഒരുക്കുമെന്ന് മുഖ്യമന്ത്രി പിണറായി വിജയന് പറഞ്ഞു. മൊബൈല് ഫോണിലൂടെ ഇത്തരം ഇടപാടുകള് നടത്താനുള്ള സംവിധാനവും ഉണ്ടാക്കും. ട്രഷറികളില് ഏര്പ്പെടുത്തിയ സംയോജിത ധനമാനേജ്മെന്റ് സംവിധാനം ഉദ്ഘാടനം ചെയ്യുകയായിരുന്നു മുഖ്യമന്ത്രി.
സാങ്കേതികവിദ്യാരംഗത്തു ട്രഷറി കൈവരിച്ചിരിക്കുന്ന നേട്ടം അഭിമാനകരമാണ്. ഇപ്പോള് ഏര്പ്പെടുത്തിയിരിക്കുന്ന ധനമാനേജ്മെന്റ് സാമ്പത്തിക സുതാര്യത ഉറപ്പുവരുത്തും. ഇത് സര്ക്കാരിനു പലതരത്തില് മെച്ചമുണ്ടാക്കും. ട്രഷറിയിലെ യഥാര്ത്ഥ ധനസ്ഥിതി അപ്പപ്പോള് അറിയാന് കഴിയുന്നതിനാല് ഊഹത്തിന്റെ അടിസ്ഥാനത്തില് കടമെടുക്കുന്നത് ഒഴിവാക്കാനാകും. പലിശയിനത്തില് വലിയ തുക ഇതുവഴി ലാഭിക്കാനാകും.
ട്രഷറികളില് അക്കൗണ്ടുള്ളവര്ക്കെല്ലാം അവര് മുന്കൂട്ടി നിര്ദ്ദേശിക്കുന്ന പ്രകാരം അതതു തീയതികളില് അവരുടെ പ്രതിമാസ അടവുകള് സ്വയമേവ അടയ്ക്കാനുള്ള സൗകര്യം കൈവന്നിരിക്കുകയാണ്. മുഴുവന് ജീവനക്കാരും ട്രഷറിയില് അക്കൗണ്ട് തുടങ്ങുന്നതോടെ അവര്ക്കെല്ലാം ഇതു സൗകര്യമാകും. ഉപഭോക്താക്കള്ക്ക് ഉപകാരപ്രദമാകുന്ന കൂടുതല് സാങ്കേതികവിദ്യകള് ഇനിയും പ്രയോഗിക്കണമെന്നു മുഖ്യമന്ത്രി നിര്ദ്ദേശിച്ചു. ട്രഷറിയുടെ സോഫ്റ്റ്വെയറിന്റെയും വിവരശേഖരത്തിന്റെയും പൂര്ണ്ണസുരക്ഷ ഉറപ്പുവരുത്തും.
ലോകത്ത് എവിടെനിന്നും 24 മണിക്കൂറും ഏത് അക്കൗണ്ടിലേക്കും പണം കൈമാറാനും ഏതു ട്രഷറിയില്നിന്നും പണം പിന്വലിക്കാനും നിക്ഷേപിക്കാനും ഒക്കെയുള്ള സൗകര്യമാണ് ഇപ്പോള് കൈവന്നിരിക്കുന്നതെന്ന് ചടങ്ങില് അദ്ധ്യക്ഷത വഹിച്ച ധനമന്ത്രി ഡോ. റ്റി.എം. തോമസ് ഐസക്ക് പറഞ്ഞു. ജീവനക്കാരെല്ലാം അക്കൗണ്ട് തുറക്കുന്നത് ട്രഷറിയില് ധനലഭ്യത ഉറപ്പാക്കാന് സഹായിക്കുമെന്നും അദ്ദേഹം കൂട്ടിച്ചേര്ത്തു.
നവീകരിച്ച പാസ്ബുക്കിന്റെയും ചെക്കുബുക്കിന്റെയും പ്രകാശനം കെ. മുരളീധരന് എംഎല്എ നിര്വഹിച്ചു. അഡീഷണല് ചീഫ് സെക്രട്ടറി ഡോ. കെ.എം എബ്രഹാം സംയോജിത ധനമാനേജ്മെന്റ് സിസ്റ്റത്തെപ്പറ്റി വിശദീകരിച്ചു.
റിസര്വ്വ് ബാങ്ക് റീജിയണല് ഡയറക്ടര് നരസിംഹസ്വാമി ,ഡെപ്യൂട്ടി അക്കൗണ്ടന്റ് ജനറല് പി. സുഗേന്ദ്രന്,കൗണ്സിലര് പാളയം രാജന്, ധനവിഭവസെക്രട്ടറി മിന്ഹാജ് ആലം, ഐറ്റി മിഷന് ഡയറക്ടര് ശ്രീറാം സാംബശിവറാവു, എന്ഐസി സ്റ്റേറ്റ് ഇന്ഫോമാറ്റിക്സ് ഓഫീസര് റ്റി. മോഹന്ദാസ്, ട്രഷറി ഡയറക്ടര് ജെ.സി. ലീല, ചീഫ് കോ-ഓര്ഡിനേറ്റര് എം.ആര്. രഘുനാഥന് ഉണ്ണത്താന് എന്നിവര് സംസാരിച്ചു.
