കറുകച്ചാല്: കോട്ടയം – കോഴഞ്ചേരി സംസ്ഥാന പാതയോട് ചേര്ന്നുള്ള തോട്ടില് ശുചിമുറി മാലിന്യം നിക്ഷേപിച്ചു. ചമ്പക്കര മൃഗാശുപത്രിക്ക് സമീപമാണ് കഴിഞ്ഞ രാത്രി സാമൂഹ്യ വിരുദ്ധര് വാഹനത്തിലെത്തി മാലിന്യം തോട്ടിലേക്ക് തുറന്നു വിട്ടത്.
റോഡിന്റെ സംരക്ഷണ ഭിത്തിയിലൂടെ തോട്ടിലേക്ക് ഒഴുക്കിവിട്ട നിലയിലാണ് മാലിന്യം നിക്ഷേപിച്ചത്. പ്രശ്നം ശ്രദ്ധയില്പ്പെട്ട നാട്ടുകാര് പഞ്ചായത്ത് അധികൃതരെയും പൊലീസിനെയും വിവരം അറിയിച്ചു. തുടര്ന്ന് അധികൃതര് സ്ഥലത്തെത്തി മാലിന്യത്തിന് മീതെ കുമ്മായം വിതറി.
വരള്ച്ച അതിരൂക്ഷമായ വേളയില് നിരവധി തദ്ദേശ വാസികളുടെ കുടിവെള്ള സ്രോതസില് മാലിന്യം കലരാന് ഇടയാക്കുന്ന സാമൂഹ്യവിരുദ്ധരുടെ നടപടിയില് ജനങ്ങള് പ്രതിഷേധം പ്രകടിപ്പിച്ചു. ഇത്തരം സാമൂഹ്യ വിരുദ്ധ പ്രവൃത്തികള് ചെയ്യുന്ന ഏജന്സികളെ കണ്ടെത്തി നിയമത്തിന് മുന്നില് കൊണ്ടുവരാന് അധികൃതരും പൊലീസും കര്ശന നടപടിയെടുക്കണമെന്ന് നാട്ടുകാര് ആവശ്യപ്പെട്ടു.
സംസ്ഥാന പാത രാജ്യാന്തര നിലവാരത്തിലേക്ക് ഉയര്ത്തിയെങ്കിലും വഴിവിളക്കുകള് വേണ്ടത്രയില്ലാത്തതാണ് ഇത്തരം പ്രവൃത്തികള് ചെയ്യുന്നവര്ക്ക് സഹായകമാകുന്നത്. രാത്രി സമയത്തും മറ്റും സംശയകരമായ രീതിയില് ചുറ്റിത്തിരിയുന്ന ടാങ്കര് ലോറികളും മറ്റു വാഹനങ്ങളും പരിശോധിക്കുവാന് പോലീസ് തയാറാകണമെന്നും ജനങ്ങള് ആവശ്യപ്പെടുന്നു.
